ImiSebenzi Yabaphostoli 11:1-30
11 Abaphostoli labazalwane ababeseJudiya bezwa ukuthi abantu bezinye izizwe labo basebelamukele ilizwi likaNkulunkulu.
2 Yikho uPhetro wathi efika eJerusalema, abantu ababesekela indaba yokusoka+ baqalisa ukumsola*
3 besithi: “Wena uhambe wayangena endlini yabantu abangasokanga wadla labo.”
4 UPhetro wabachasisela konke okwakwenzakele wathi:
5 “Bengisedolobheni leJopha ngithandaza ngasengifikelwa ngumbono, ngabona kusehla okungathi* lilembu elikhulu lelineni kuvela ezulwini kubanjwe ngamakhona womane, kwafika kwabekwa phambi kwami.+
6 Ngithe ngikhangelisisa phakathi ngabona kulezinyamazana zomhlaba ezilenyawo ezine, lezilo zeganga, lezinanakazana kanye lezinyoni.
7 Ngiphinde ngezwa lelizwi lisithi kimi: ‘Phetro sukuma uhlabe udle!’
8 Kodwa mina ngithe: ‘Ngeke ngikwenze lokho Nkosi ngoba emlonyeni wami akukaze kungene into engcolileyo loba engahlambulukanga.’
9 Ilizwi elivela ezulwini laselikhuluma okwesibili lathi: ‘Yekela ukubiza izinto esezihlanjululwe nguNkulunkulu ngokuthi zingcolile.’
10 Lokhu kwenzakale kwaze kwaba kathathu, konke kwasekudonselwa phezulu kwasiwa ezulwini.
11 Ngaso lesosikhathi kufike amadoda amathathu endlini ebesihlala kuyo, ethunywe kimi evela eKhesariya.+
12 Umoya wasungitshela ukuthi ngihambe lawo ngingathikazi ngitsho lakancane. Labazalwane laba abayisithupha bahambe lami safika sangena endlini yalowomuntu.
13 “Wasesilandisela ukuthi ubone ingilosi imi endlini yakhe isithi kuye: ‘Thuma abantu eJopha bayebiza uSimoni okuthiwa nguPhetro,+
14 uzakutshela ukuthi wena labantu bonke ohlala labo kumele lenzeni ukuze lisindiswe.’
15 Ngithe sengiqalisile ukukhuluma, umoya ongcwele wehlela phezu kwabo njengoba nje wehlela phezu kwethu ekuqaliseni.+
16 Sekunjalo ngikhumbule amazwi ayejayele ukukhulunywa yiNkosi athi: ‘UJohane wayebhabhathiza ngamanzi+ kodwa lina lizabhabhathizwa ngomoya ongcwele.’+
17 Ngakho nxa uNkulunkulu ebanike isipho samahala asinika sona thina esikholwa eNkosini uJesu Khristu, ngiyini mina ukuthi bengingavimba uNkulunkulu?”+
18 Abazalwane bathi besizwa lokhu bayekela ukuphikisana laye,* bakhazimulisa uNkulunkulu besithi: “Kutsho ukuthi uNkulunkulu usevumele labantu bezinye izizwe ukuthi baphenduke besebethola ukuphila.”+
19 Labo ababebalekele+ ukuhlukuluzwa okwaba khona ngemva kokufa kukaStefane bahamba baze bayafika eFenikhiya leKhuphro le-Antiyokhi, kodwa ilizwi babelitshela amaJuda kuphela.+
20 Lanxa kunjalo abanye phakathi kwabo ababevela eKhuphro leKhurene babuya e-Antiyokhi baqalisa ukuxoxa labantu abakhuluma isiGrikhi, betshumayela izindaba ezinhle ngeNkosi uJesu.
21 Isandla sikaJehova* sasilabo, yikho abanengi kakhulu baba ngamakholwa baphendukela eNkosini.+
22 Umbiko walokho ababekwenza wafika ebandleni elaliseJerusalema, kwasekuthunywa uBhanabha+ e-Antiyokhi.
23 Wathi efika wabona ukuthi uNkulunkulu wayebenzele umusa omkhulu. Lokhu kwamthokozisa waqalisa ukubakhuthaza bonke ukuthi baqhubeke beseNkosini bezimisele ngenhliziyo yonke.+
24 UBhanabha wayeyindoda elungileyo, egcwele umoya ongcwele futhi elokholo oluqinileyo. Abantu abanengi kakhulu bakholwa eNkosini.+
25 Ngakho waya eThasu esiyadinga uSawuli.+
26 Wathi esemtholile wabuya laye e-Antiyokhi. Okomnyaka wonke babehlangana lebandla lelo futhi befundisa abanengi ababelapho. Kwaqalisela e-Antiyokhi ukuthi abafundi babizwe ngokuthi ngamaKhristu njalo ibizo leli balithola beqondiswa nguNkulunkulu.+
27 Ngalezonsuku kwafika abaphrofethi+ e-Antiyokhi bevela eJerusalema.
28 Omunye wabo okwakuthiwa ngu-Agabhu+ wasukuma wakhuluma ekhokhelwa ngumoya wathi kwasekuzakuba lendlala enkulu emhlabeni wonke.+ Indlala le yaba khona sibili ngesikhathi sikaKlawudiyu.
29 Ngakho abafundi bazimisela ukuthi ngamunye wabo anikele okusemandleni akhe+ ukuze kuthunyelwe okokuncedisa+ abazalwane abahlala eJudiya.
30 Lakanye benza njalo, basebethuma uBhanabha loSawuli ukuthi bakuhambise ebadaleni.+
Amabala angaphansi
^ Kumbe, “ukuphikisana laye.”
^ NgesiGrikhi, “isitsha esingathi.”
^ NgesiGrikhi, “bathula.”
^ Khangela iSengezo ku-A5.
