ImiSebenzi Yabaphostoli 15:1-41
15 Kwafika amanye amadoda evela eJudiya aqalisa ukufundisa abazalwane esithi: “Nxa lingasokwanga njengoba uMthetho kaMosi usitsho,+ alisoze lisindiswe.”
2 Kodwa uPhawuli loBhanabha abazange bavumelane lawo njalo kwaba lokuphikisana. Kwasekuhlelwa ukuthi uPhawuli loBhanabha labanye bahambise udaba lolu* kubaphostoli labadala eJerusalema.+
3 Amadoda la aphelekezelwa libandla okomangwana aseqhubeka ngohambo. Adabula eFenikhiya leSamariya elandisa konke okuphathelane lokuguquka kwabantu bezinye izizwe. Lokhu kwenza bonke abazalwane bathokoza kakhulu.
4 Athi efika eJerusalema emukelwa kuhle libandla langabaphostoli kanye labadala, aselandisa izinto ezinengi uNkulunkulu ayezenze ngawo.
5 Kodwa abanye abeqembu labaFarisi abasebengamakholwa basukuma ezitulweni zabo bathi: “Kumele basokwe futhi balaywe ukuthi balandele uMthetho kaMosi.”+
6 Ngakho abaphostoli labadala bahlanganisa amakhanda ukuze bahluze udaba lolu.
7 Bathi sebexoxe kabanzi njalo* okwesikhathi eside ngodaba lolu, uPhetro wasukuma wathi kubo: “Madoda, bafowethu, likwazi mhlophe ukuthi kusukela ezinsukwini zokuqala uNkulunkulu wangikhetha phakathi kwenu ukuze abantu bezinye izizwe balizwe ngomlomo wami ilizwi lezindaba ezinhle bakholwe.+
8 UNkulunkulu owazi inhliziyo+ wafakaza ngokubapha umoya ongcwele+ njengoba wayesiphile lathi
9 njalo waveza ukuthi awukho ngitsho umehluko phakathi kwethu labo,+ wahlambulula izinhliziyo zabo ngokholo.+
10 Manje selimlingelani uNkulunkulu ngokugaxa entanyeni zabafundi ijogwe+ thina labokhokho bethu esehluleka ukulithwala?+
11 Thina sikholwa ukuthi sisindiswa ngomusa omkhulu weNkosi uJesu+ futhi labo bayakukholwa ukuthi basindiswa ngawo.”+
12 Iqembu lonke lathi lisizwa lokhu lathula zwi, laselilalela uBhanabha loPhawuli belandisa ngezibonakaliso ezinengi lezimanga uNkulunkulu ayezenze ngabo ebantwini bezinye izizwe.
13 Sebeqedile ukukhuluma uJakhobe wathi: “Madoda, bafowethu, ngilalelani.
14 USimiyoni+ usesilandisele konke okumayelana lokuthi uNkulunkulu wabakhumbula njani abezinye izizwe ukuze aqalise ukuthatha abantu bebizo lakhe phakathi kwabo.+
15 Lamazwi abaPhrofethi ayavumelana lalokhu njengoba nje kubhaliwe ukuthi:
16 ‘Ngemva kwalezizinto ngizaphenduka ngilivuse futhi itende* likaDavida eseliwile njalo ngizawakha kutsha amanxiwa alo ngilivuselele,
17 ukuze abantu abaseleyo bamdinge ngenhliziyo yonke uJehova* belabantu bezizwe zonke, abantu ababizwa ngebizo lami, kutsho uJehova* owenza izinto lezi+
18 ezivele zisaziwa kusukela endulo.’+
19 Ngakho bengicabanga* ukuthi singabahluphi abavela kwezinye izizwe abaphendukela kuNkulunkulu,+
20 kodwa sibabhalele ukuthi baxwaye izinto ezingcoliswe yizithombe,+ lokufeba,*+ lezinto eziklinyiweyo* kanye legazi.+
21 Kusukela endulo abantu bebetshumayela ngoMosi kuwo wonke amadolobho futhi ngamasabatha wonke abantu bayabalelwa emasinagogeni izinto ezabhalwa nguMosi.”+
22 Abaphostoli labadala kanye lebandla lonke basebebona kungcono ukuthi bakhethe amanye amadoda phakathi kwabo ababengawathuma ukuthi ahambe loPhawuli loBhanabha e-Antiyokhi. Bathuma uJudasi owayebizwa ngokuthi nguBhasabha kanye loSila.+ Amadoda la ayekhokhela phakathi kwabazalwane.
23 Babhala incwadi bawaphathisa. Incwadi leyo yayisithi:
“Ivela kubafowenu, abaphostoli labadala. Kini bafowethu be-Antiyokhi+ leSiriya leKhilikhiya, elingabezinye izizwe: Siyalibingelela!
24 Njengoba sesizwile ukuthi kulabanye abantu abasuke lapha bazolidalela uhlupho khonangapho ngalokho abakutshoyo+ bezama ukuliphambula, befundisa izinto esingabatshelanga zona,
25 sesivumelene senza isinqumo sokuthi sikhethe amadoda siwathume kini elabathandekayo bethu, uBhanabha loPhawuli,
26 amadoda adele impilo zawo ngenxa yebizo leNkosi yethu uJesu Khristu.+
27 Ngakho sithuma uJudasi loSila ukuze labo balitshele izinto ezisencwadini le.+
28 Kubonakale kufanele emoyeni ongcwele+ lakithi ukungalingezeleli omunye umthwalo ngaphandle kwalezizinto eziqakathekileyo,
29 ukuthi liqhubeke lixwaya izinto ezinikelwe ezithombeni,+ lixwaya legazi,+ lezinto eziklinyiweyo*+ kanye lokufeba.*+ Nxa lingaqhubeka lizibalekela lezizinto, lizaphumelela. Libe lempilakahle!”*
30 Kwathi amadoda la esetshelwe ukuthi ahambe, ehla aya e-Antiyokhi afika abuthanisa bonke abafundi abanika incwadi.
31 Bathi sebeyibalile bathokoza ngoba yayikhuthaza.
32 Njengoba uJudasi loSila labo babengabaphrofethi, bakhuthaza abazalwane ngamazwi amanengi babaqinisa.+
33 Amadoda la athi eseke ahlala isikhathi avalelisa, abazalwane bawafisela uhambo oluhle asebuyela kulabo ababewathumile.
34 *——
35 Kodwa uPhawuli loBhanabha basala e-Antiyokhi befundisa njalo betshumayela izindaba ezinhle zelizwi likaJehova* belabanye abanengi.
36 Ngemva kwensuku ezithile uPhawuli wathi kuBhanabha: “Asibuyele siyevakatshela abafowethu kuwo wonke amadolobho esatshumayela kuwo ilizwi likaJehova* siyebona ukuthi banjani.”+
37 UBhanabha wayezimisele ukuthi bahambe loJohane owayebizwa ngokuthi nguMakho.+
38 Kodwa uPhawuli wayengavumelani lokuthi bahambe laye ngoba wayebatshiyile ePhamfiliya wangahambi labo emsebenzini.+
39 Baphikisana kwaba luthuli bacina besehlukana. UBhanabha+ wasethatha uMakho baya eKhuphro ngesikepe,
40 uPhawuli yena wakhetha uSila. Abazalwane bathi sebenikele uPhawuli emuseni omkhulu kaJehova,*+ wasuka wahamba.
41 Wadabula eSiriya leKhilikhiya eqinisa amabandla.
Amabala angaphansi
^ Kumbe, “impikiswano le.”
^ Kumbe, “Bathi sebephikisane.”
^ Kumbe, “idumba; indlu.”
^ Khangela iSengezo ku-A5.
^ Khangela iSengezo ku-A5.
^ Kumbe, “isinqumo sami.”
^ Kumbe, “lalokho okubulawa kungophiswa.”
^ NgesiGrikhi, por·nei′a. Khangela iNgcazelo Yamabala.
^ Kumbe, “lalokho okubulawa kungophiswa.”
^ Kumbe, “Salani kuhle.”
^ NgesiGrikhi, por·nei′a. Khangela iNgcazelo Yamabala.
^ Khangela iSengezo ku-A3.
^ Khangela iSengezo ku-A5.
^ Khangela iSengezo ku-A5.
^ Khangela iSengezo ku-A5.
