KuThithusi 2:1-15
2 Kodwa wena qhubeka ukhuluma ngezinto ezivumelana lemfundiso eqondileyo.*+
2 Amadoda amadala kawabe ngazibambayo kukho konke akwenzayo, angathathi izinto lula, asebenzise kuhle ingqondo, aqine ekukholweni, athande abanye njalo abe ngaqiniselayo ebunzimeni.
3 Labesifazana abadala kabaziphathe ngendlela etshengisa ukuthi bayakhonza, bangabi ngabanyundelayo, bangabi yizigqili zewayini, bafundise okuhle
4 ukuze bacebise abesifazana* abasesebatsha ukuthi bathande omkabo, bathande abantwababo,
5 basebenzise kuhle ingqondo zabo, babe msulwa, basebenze emizini yabo,* benze okuhle njalo bazehlise kubomkabo+ ukuze abantu bangakhulumi kubi ngelizwi likaNkulunkulu.
6 Qhubeka ukhuthaza lamajaha ukuthi asebenzise kuhle ingqondo zawo,+
7 lawe ube yisibonelo ngazo zonke izindlela emisebenzini emihle. Fundisa izinto ezihlanzekileyo,* ungathathi izinto lula,+
8 usebenzise amazwi aqondileyo* angeke achothozwe+ ukuze abaphikisayo bayangeke, bangabi lalutho olubi abangalukhuluma ngathi.+
9 Izigqili kazizehlise kubanikazi bazo ezintweni zonke,+ zizame ukubathokozisa, zingabaphenduli kubi,
10 zingabatshontsheli+ kodwa zitshengise ukuthi zithembekile kukho konke ukuze zicecise imfundiso yoMsindisi wethu uNkulunkulu ngazo zonke izindlela.+
11 Umusa omkhulu kaNkulunkulu usubonakalisiwe waletha insindiso kuyo yonke imihlobo yabantu.+
12 Umusa lo usifundisa ukuthi silahle izifiso zomhlaba+ lezenzo ezitshengisa ukungamesabi uNkulunkulu lokuthi siphile ngendlela etshengisa ukuthi sisebenzisa kuhle ingqondo, sibe ngabalungileyo labazinikele kuNkulunkulu phakathi komumo lo wezinto*+
13 ngesikhathi sisalindele ithemba+ elithokozisayo kanye lokubonakaliswa okukhazimulayo kukaNkulunkulu uSomandla lokoMsindisi wethu uJesu Khristu.
14 Yena wazinikela ngenxa yethu+ ukuze asikhulule*+ kukho konke ukungabi lamthetho njalo azihlambululele abantu abayimpahla yakhe eqakathekileyo labatshisekela imisebenzi emihle.+
15 Qhubeka ukhuluma ngezinto lezi, useluleka* futhi ukhuza ngoba uwaphiwe amandla okuthi wenze njalo.+ Ungavumeli muntu akukhangelele phansi.
Amabala angaphansi
^ Kumbe, “ephilisayo; encedayo.”
^ Kumbe, “baqondise ukucabanga kwabesifazana; baqeqetshe abesifazana.”
^ Kumbe, “banakekele imizi yabo.”
^ Ezinye inguqulo zithi, “ngendlela engelasici.”
^ Kumbe, “aphilisayo; ancedayo.”
^ Khangela iNgcazelo Yamabala.
^ NgesiGrikhi, “asihlawulele; asihlenge.”
^ Kumbe, “ukhuthaza.”
