U-Isaya 13:1-22
13 Nansi isimemezelo salokho okuzakwehlela iBhabhiloni+ esabonwa ngu-Isaya+ indodana ka-Amozi embonweni:
2 “Phakamisa isibonakaliso*+ phezu kwentaba engelazihlahla.
Baphakamisele isandla ubamemeze,Ukuze babuye bangene eminyango yabahlonitshwa.
3 Sengibanike umlayo labo engibakhethileyo.*+
Sengibize amaqhawe ami ukuze ngitshengise ulaka lwami,Sengibize abantu bami abathokoziswa yikuzigqaja.
4 Lalelani! Kulexuku ezintabeni,Umsindo walo ungathi ngowabantu abanengi!
Lalelani! Imibuso iyaxokozela,Izizwe ezibuthene ndawonye ziyaxokozela!+
UJehova wamabutho uqoqa ibutho elizakuya empini.+
5 UJehova lezikhali zolaka lwakheSebesiza bevela elizweni elikhatshana,+Bevela emikhawuleni yamazulu,Bezobhidliza umhlaba wonke.+
6 Hlabani umkhosi ngoba usuku lukaJehova selusondele,
Ukubhujiswa okuvela kuSomandla kuzafika ngalolosuku.+
7 Ngenxa yalokhu izandla zonke zizaxega,Inhliziyo zabantu bonke zizaphela amandla.*+
8 Abantu sebebanjwe ngumhedehede.+
Sebebanjwe yinkantsho futhi basebuhlungwini,Njengowesifazana ohelelwayo.
Bayakhangelana bemangele,Ngobuso obugcwele usizi.*
9 Usuku lukaJehova luyeza,Luzabe lulesihluku lolaka oluvuthayo lentukuthelo etshisa bhe.
Luzakwenza ilizwe libe yinto engakhangelekiyo,+Lutshaye luthanyele izoni eziselizweni.
10 Izinkanyezi zamazulu kanye lamaqembu ezinkanyezi+Akusoze kukhanyise,Ilanga lizaphuma limnyama,Lenyanga ayisoze ikhiphe ukukhanya kwayo.
11 Ngizajezisa umhlaba wonke ngenxa yobubi bawo,+Ngijezise lababi ngenxa yeziphambeko zabo.
Ngizakuqeda du ukuzigqaja kwamaqhalaqhala,Ngehlise lokuzikhukhumeza kwalabo abacindezela abanye.+
12 Ngizakwenza abantu babe balutshwana kulegolide elicengiweyo,+Ngibenze babe balutshwana kulegolide lase-Ofiri.+
13 Ngizakwenza amazulu anyikinyeke,Lomhlaba uzazanyazanyiswa usuke endaweni yawo+Ngenxa yokuthukuthela kukaJehova wamabutho ngosuku lolaka lwakhe oluvuthayo.
14 Njengempala ezingelwayo lanjengomhlambi ongelamelusi,Umuntu ngamunye uzabuyela ebantwini bakibo,Ngamunye abalekele elizweni lakhe.+
15 Loba ngubani ozatholakala uzagwazwa,Futhi loba ngubani ozabanjwa uzabulawa ngenkemba.+
16 Abantwababo bazataklazelwa phansi phambi kwabo,+Lamakhosikazi abo abanjwe iganyavu.
Izindlu zabo zizagqekezwa.
17 Sengibavusela amaMede+ ukuthi ayemelana labo.
Phela kuwo isiliva asitsho lutho,Legolide kawalandaba lalo.
18 Amadandili* awo azachoboza amajaha,+Ngeke azwele loba yiluphi usana,Njalo ngeke abe lesihawu ebantwaneni.
19 IBhabhiloni umbuso owawukhazimula ukwedlula yonke,+Indawo amaKhaledi ayezigqaja ngobuhle bayo,+Izafanana lamadolobho eSodoma leGomora lapho echithwa nguNkulunkulu.+
20 Akulamuntu ozaphinda ahlale kuyoNjalo ayisoze ibe yindawo yokuhlala kuzo zonke izizukulwane.+
Kakho um-Arabhu ozamisa itende lakhe kuyoLabelusi abasoze baphumuze imihlambi yabo kuyo.
21 Izinyamazana zenkangala zizalala kuyo;Izindlu zabo zizagcwala izikhova.
Izintshe zizahlala khona,+Lamagogo* aqolotshe* kuyo.
22 Izinyamazana ezitshaya umkhulungwane zizabanga umsindo emiphotshongweni yayo,Lamakhanka azakhala ezigodlweni zayo ezinhle.
Isikhathi sayo sesiseduze njalo amalanga ayo awasoze angezelelwe.”+
Amabala angaphansi
^ Kumbe, “ugodo oluyisibonakaliso.”
^ NgesiHebheru, “abangcwele bami.”
^ NgesiHebheru, “zizancibilika ngokwesaba.”
^ Kumbe, “amalangabi osizi.”
^ Khangela iNgcazelo Yamabala.
^ Kumbe, “Lembuzi zeganga.” Ezinye inguqulo zithi, “Amadimoni aphose afanane lembuzi.”
^ Kumbe, “ayeqayeqe.”
