U-Obhadiya 1:1-21
1 Umbono ka-Obhadiya:*
Nanku okutshiwo yiNkosi Enkulu uJehova mayelana lo-Edomi:+
“Sithole umbiko ovela kuJehova,Kulesithunywa esithunywe ezizweni ukuthi sithi:
‘Sukumani silungiselele ukulwa laye.’”+
2 “Khangela! Sengikwenze waba yisizwe esincane phakathi kwezizwe,Bakudelelile sibili.+
3 Ukuzigqaja kwakho kukuqilile,+Wena ohlala ezimbalwini zamadwala,Ohlezi endaweni ephakemeyo usithi enhliziyweni yakho,‘Kambe ngubani ongangethula lapho engikhona?’
4 Lanxa ungenza indawo yakho yokuhlala ibe phezulu njengeyokhozi,*Loba wakhe isidleke sakho lapho okulezinkanyezi khona,Ngizakwethula khonale,” kutsho uJehova.
5 “Nxa ubungangenelwa ngamasela loba izigebenga ebusuku,Bezingeke zitshontshe ezikufunayo kuphela yini?
Nxa abavuni bamagilebisi bebengafika kuwe,Bebengeke bavune batshiye okunye yini?+
Kodwa wena uzatshabalaliswa kungasali lutho!
6 U-Esawu bamzingele bamthathela konke alakho!
Amagugu akhe afihliweyo bawadinge baze bawathola!
7 Bakuxotshile bayakutshiya emngceleni.
Bonke abangane bakho* bakuqilile.
Obuzwanana labo bakunqobile.
Labo odla labo isinkwa bazakuthiya ngenethi,Njalo awusoze uyibone.
8 Ngalolosuku,” kutsho uJehova,“Angisoze ngibatshabalalise yini abahlakaniphileyo bako-Edomi?+
Angisoze ngibatshabalalise yini abakhaliphileyo abahlala elizweni lezintaba lako-Esawu?
9 Amaqhawe akho azakwesaba athithibale+ we Themani!+
Bonke abaselizweni lezintaba lako-Esawu bazabulawa kungasali loyedwa!+
10 Umenze isihluku umfowenu uJakhobe,+Yikho wena uzayangeka,+Utshabalale ungaphindi ube khona.+
11 Ngosuku owazimela ngalo eceleni wabukela,Ngosuku izitha zithumba ibutho lakhe,+Lapho abantu bezinye izizwe bengena egedini lakhe futhi besenza inkatho+ ngeJerusalema,Wenza angathi ungomunye wabo.
12 Bekungamelanga uthokoze ubona umfowenu esebunzimeni,+Bekungafanelanga uthokoze ngelanga lokubhujiswa kwabantu bakoJuda,+Njalo bekungamelanga ubahleke ngosuku lokuhlupheka kwabo.
13 Bekungamelanga ubuye egedini labantu bami ngesikhathi behlaselwa,+Bekungafanelanga uthokoze ngesikhathi besebunzimeni,Njalo bekungamelanga uthathe inotho yabo ngosuku lokuhlaselwa kwabo.+
14 Bekungafanelanga ume lapho okuhlangana khona imigwaqo ubulale abaphunyukileyo,+Bekungamelanga ubanikele ezitheni zabo ngosuku lokuhlaselwa kwabo,+
15 Ngoba usuku lokuthi uJehova alwe lezizwe zonke seluseduze.+
Okwenzileyo yikho okuzakwenziwa kuwe.+
Indlela ophathe ngayo abanye yiyo ozaphathwa ngayo.
16 Izizwe zizaqhubeka zinatha ulaka lwami+
Ngendlela wena onathe ngayo iwayini entabeni yami engcwele.
Zizalunatha zilubhije,Zitshabalale kube angathi azizange zibe khona.
17 Entabeni iZiyoni kuzakuba lalabo abaphunyukileyo,+Njalo izakuba ngcwele.+
Indlu kaJakhobe izathatha konke okwakungokwayo.+
18 Indlu kaJakhobe izakuba ngumlilo,Indlu kaJosefa ibe lilangabi,Indlu ka-Esawu yona ibe ngamahlanga.
Bazayithungela ngomlilo itshe iphele,Kakho ozasinda endlini ka-Esawu,+Ngoba uJehova usekhulumile.
19 Bazathumba iNegebhi lelizwe lezintaba lako-Esawu,+LeShefela kanye lelizwe lamaFilisti.+
Bazathumba indawo yako-Efrayimi leSamariya,+UBhenjamini athumbe iGiliyadi.
20 Abantu abathunjwe enqabeni le,+Bona kanye abantu bako-Israyeli, bazathatha ilizwe lamaKhenani libe ngelabo kuze kuyefika eZarefathi.+
Abathunjiweyo beJerusalema ababeseSefaradi bazathatha amadolobho eNegebhi,+
21 Lalabo abazakhulula abantu bazakhwela entabeni iZiyoni
Ukuze bahlulele abantu abahlala elizweni lezintaba lako-Esawu.+
Ubukhosi buzakuba ngobukaJehova.”+
Amabala angaphansi
^ Ibizo leli litsho ukuthi, “Inceku kaJehova.”
^ Ezinye inguqulo zithi, “ungaphapha uye phezulu njengokhozi.”
^ Kumbe, “abenze isivumelwano lawe.”