UDutheronomi 17:1-20
17 “Akumelanga lenzele uJehova uNkulunkulu wenu umhlatshelo ngenkunzi loba imvu elesici loba elokunye nje okusolekayo kuyo, ngoba isifuyo esinjalo siyenyanyeka kuJehova uNkulunkulu wenu.+
2 “Nxa kungatholakala indoda loba owesifazana phakathi kwenu, kwelinye lamadolobho enu uJehova uNkulunkulu alinika wona, owenza okubi phambi kukaJehova uNkulunkulu wenu, esephula isivumelwano sakhe,+
3 abesephambuka ayekhonza abanye onkulunkulu abakhothamele kumbe akhothamele ilanga loba inyanga kumbe lonke nje ibutho elisemazulwini,+ esenza lokho engingazange ngililaye khona,+
4 njalo nxa lingabikelwa ngendaba leyo kumbe ifike endlebeni zenu kumele lidingisise ngayo okuzwayo. Nxa kungatholakala ukuthi into eyenyanyeka njengaleyo yenzakele sibili+ ko-Israyeli,
5 kumele lithathe indoda leyo kumbe owesifazana lowo owenze into embi limkhiphele ngaphandle kwamagedi edolobho njalo indoda leyo loba owesifazana lowo kumele atshaywe ngamatshe aze afe.+
6 Umuntu lowo kumele abulawe. Kodwa kumele abulawe nxa lokho akwenzileyo kufakazelwa ngofakazi ababili kumbe abathathu.+ Akumelanga abulawe nxa kulofakazi oyedwa kuphela.+
7 Ofakazi labo yibo okumele babe ngabokuqala ukumfaka isandla ukuze bambulale, besekulandela bonke abanye abantu. Kumele lisuse okubi phakathi kwenu.+
8 “Nxa kwelinye lamadolobho enu kungavuka indaba enzima kakhulu ukuthi liyahlulele, kungelani lokuthi ngephathelane lokubulala+ loba yindaba emangaliweyo loba udlakela olwenzakeleyo loba okunye nje ukungazwanani, kumele liye endaweni uJehova uNkulunkulu wenu azayikhetha.+
9 Kufanele liye kubaphristi abangamaLevi lakumahluleli+ oyabe ekhona ngalezonsuku liyebuzisisa ngodaba lwenu futhi bazalitshela isinqumo sabo.+
10 Ngemva kwalokho kumele lilandele isinqumo abazalinika sona endaweni uJehova azayikhetha. Kumele libe leqiniso lokuthi liyakwenza konke abalitshela khona.
11 Kumele lilandele umthetho abazalitshengisa wona njalo lilandele lesinqumo abazalitshela sona.+ Lingaphambuki kuleso sinqumo abazalinika sona liye kwesokudla loba kwesenxele.+
12 Umuntu ozazenza iqhalaqhala angalaleli umahluleli kumbe umphristi osebenzela uJehova uNkulunkulu wenu kumele abulawe.+ Kumele lisuse okubi ko-Israyeli.+
13 Ngemva kwalokho bonke abantu bazakuzwa besabe futhi kakho ozaphinda abe liqhalaqhala.+
14 “Nxa selingenile elizweni uJehova uNkulunkulu wenu alinika lona, selilithethe laba ngelenu futhi selihlala kulo beselisithi, ‘Asikhetheni inkosi njengazo zonke izizwe ezisigombolozeleyo,’+
15 nxa kungaba njalo kumele libe leqiniso lokuthi libeka inkosi ekhethwe nguJehova uNkulunkulu wenu.+ Kumele likhethe inkosi phakathi kwabafowenu, lingakhethi umuntu wesinye isizwe ongasimfowenu ukuthi alibuse.
16 Inkosi leyo akumelanga ibe lamabhiza amanengi+ kumbe ithume abantu ukuthi babuyele eGibhithe ukuze bayezuza amabhiza amanengi khonale+ ngoba uJehova walitshela wathi, ‘Akumelanga liphinde libuyele eGibhithe.’
17 Inkosi akumelanga ithathe abafazi abanengi ukuze inhliziyo yayo ingaphambuki+ futhi akumelanga ibuthelele isiliva esinengi kanye legolide.+
18 Nxa isihlala esihlalweni sobukhosi embusweni wayo, kumele ithathe ibhuku* izibhalele uMthetho lo kulo, iwuthatha kulelo eligcinwe ngabaphristi abangamaLevi.+
19 “Kumele ihlale ilawo njalo iwubale kuzo zonke insuku zokuphila kwayo,+ ukuze ifunde ukumesaba uJehova uNkulunkulu futhi igcine wonke amazwi oMthetho lo kanye lemilayo le ngokuyilandela.+
20 Lokhu kuzakwenza ukuthi ingaziphakamisi, izibone ingcono kulabafowabo futhi ayisoze iphambuke emthethweni iye kwesokudla loba kwesenxele, ukuze ihlale isikhathi eside embusweni wayo yona kanye lamadodana ayo phakathi kwabantu bako-Israyeli.
Amabala angaphansi
^ Kumbe, “incwadimgoqwa.”