UDutheronomi 19:1-21
19 “Nxa uJehova uNkulunkulu wenu esetshabalalise izizwe ezihlala elizweni uJehova uNkulunkulu wenu alinika lona ukuthi libe ngelenu futhi nxa selizithathele ilifa lazo, selihlala emadolobheni azo lasezindlini zazo,+
2 kumele likhethe amadolobho amathathu phakathi kwelizwe lenu, uJehova uNkulunkulu wenu alinika lona ukuthi libe ngelenu.+
3 Kumele lehlukanise ilizwe uJehova uNkulunkulu wenu alinike lona ukuthi libe ngelenu libe yizigaba ezintathu njalo lilungise imigwaqo ukuze umuntu obulele omunye abalekele kwelinye lamadolobho lawo.
4 “Nanku okumele kwenzakale nxa umbulali angabalekela khona ukuze aphile: Nxa enze iphutha wabulala omunye engahlosanga futhi kuyingayisikho ukuthi ubemzonda,+
5 ngokwesibonelo, nxa angayatheza inkuni egangeni lomakhelwane wakhe,* abesephakamisa ihloka ukuthi agamule isihlahla, ihloka beselikhumuka emphinini liyetshaya umakhelwane wakhe afe, umbulali kumele abalekele kwelinye lamadolobho lawo ukuze aphile.+
6 Phela nxa umango wokuya edolobheni lokuphephela umude kakhulu, ophindiselayo*+ angamlandela ezonde efile amxotshanise aze amfice ambulale. Kodwa umuntu lowo kuyabe kungamelanga abulawe ngoba ubengamzondi umakhelwane wakhe.+
7 Yikho ngililaya ngisithi: ‘Khethani amadolobho amathathu.’
8 “UJehova uNkulunkulu wenu uzaqhelisa indawo yenu njengoba nje wafunga kubokhokho benu+ futhi alinike lonke ilizwe athembisa ukulinika okhokho benu.+
9 Kodwa ukuze lokhu kwenzakale kumele liwugcine ngokuthembeka umthetho lo engilinika wona lamuhla, limthande uJehova uNkulunkulu wenu futhi liqhubeke lihamba ezindleleni zakhe,+ lapho-ke kuzamele lengezelele amanye amadolobho amathathu phezu kwala amathathu.+
10 Ngaleyondlela akulagazi lomuntu ongelacala elizachithwa+ elizweni lenu uJehova uNkulunkulu wenu alinika lona ukuthi libe lilifa lenu njalo akulacala legazi elizakuba phezu kwenu.+
11 “Kodwa nxa kuyikuthi umuntu ubemzonda umakhelwane wakhe,+ wasemcathamela wamtshaya wambulala futhi yena wasebalekela kwelinye lamadolobho la,
12 abadala bedolobho lakibo kumele bambize, besebemhambisa kulowo ophindiselayo futhi kumele ambulale.+
13 Akumelanga* limzwele njalo kumele lisuse icala lokubulawa komuntu ongelacala ko-Israyeli+ ukuze kulihambele kuhle.
14 “Nxa selilitholile ilifa lenu elizweni uJehova uNkulunkulu wenu alinika lona ukuthi libe ngelenu, akulamuntu okumele atshedise umngcele kamakhelwane wakhe+ awususe lapho okhokho benu abawumisa khona.
15 “Umuntu akumelanga agwetshwe nxa icala loba isono asenzileyo sifakazelwa ngumuntu oyedwa.+ Yonke indaba kumele iqiniswe yibufakazi babantu* ababili kumbe abathathu. +
16 Nxa umuntu angafakaza amanga ngomunye umuntu futhi amgcone esithi ulecala,+
17 bobabili abamangalelanayo bazakuma phambi kukaJehova laphambi kwabaphristi kanye labahluleli abazabe bekhona ngalezonsuku.+
18 Abahluleli bazachwayisisa okuzwayo,+ nxa kungatholakala ukuthi umuntu lowo ungufakazi wamanga lokuthi lokho akutshoyo ngomfowabo akusilo qiniso,
19 kumele limenze khona kanye abefuna ukukwenza umfowabo+ futhi kumele lisuse okubi phakathi kwenu.+
20 Bonke abanye abantu bazakuzwa besabe futhi abasoze baphinde benze into embi njengale phakathi kwenu.+
21 Akumelanga* libe lozwelo:+ Impilo kumele iphindiselwe ngempilo,* ilihlo ngelihlo, izinyo ngezinyo, isandla ngesandla, unyawo ngonyawo.+
Amabala angaphansi
^ Kumbe, “lomunye wakhe; lomngane wakhe.”
^ Kumbe, “umphindiseli wegazi.”
^ NgesiHebheru, “Akumelanga ilihlo lakho.”
^ NgesiHebheru, “ngumlomo wabofakazi.”
^ NgesiHebheru, “Akumelanga ilihlo lakho.”
^ Kumbe, “Umphefumulo ngomphefumulo.”
