UHezekheli 12:1-28
12 Ilizwi likaJehova laphinda lafika kimi lathi:
2 “Ndodana yomuntu, uhlala phakathi kwabantu abahlamukayo. Balamehlo okubona kodwa kababoni, lendlebe zokuzwa kodwa kabezwa+ ngoba bangabahlamuki.+
3 Ngakho wena ndodana yomuntu, lungisa impahla yakho njengomuntu oya ekuthunjweni, ubusuphuma emini bekukhangele uye ekuthunjweni. Suka endlini yakho bekukhangele uye kwenye indawo njengomuntu oya ekuthunjweni. Mhlawumbe bazacabangisisa ngakho lanxa nje bengabahlamuki.
4 Kumele uthathe impahla yakho oyilungisele ukuya ekuthunjweni uyikhiphe emini bekhangele, besekusithi ntambama uphume bekhangele angathi ungumuntu othunjiweyo.+
5 “Kumele uvule isikhala emdulini abantu bekukhangele, ubusuphuma ngaso uthwele impahla yakho.+
6 Thwala impahla yakho emahlombe abantu besakukhangele, ubusungena emnyameni uhambe. Uvale ubuso bakho ukuze ungawuboni umhlabathi ngoba sengikwenze waba yisibonakaliso ebantwini bako-Israyeli.”+
7 Ngakwenza engangikutsheliwe. Emini ngakhiphela phandle impahla yami angathi yimpahla yokuya ekuthunjweni, kwathi ntambama ngavula isikhala emdulini ngezandla. Kuthe sekumnyama ngathatha impahla yami ngayithwala emahlombe ngasengihamba bengikhangele.
8 Ekuseni ilizwi likaJehova laphinda lafika kimi lathi:
9 “Ndodana yomuntu, abantu bako-Israyeli abahlamukayo abakubuzanga yini ukuthi wenzani?
10 Ngakho batshele uthi, ‘Nanku okutshiwo yiNkosi Enkulu uJehova: “Isimemezelo lesi siphathelane lomkhokheli+ oseJerusalema labo bonke abako-Israyeli abasedolobheni lelo.”’
11 “Khuluma labo uthi, ‘Mina ngiyisibonakaliso kini,+ engikwenzileyo yikho okuzakwenzakala kubo. Bazathunjwa bayekuba yizigqili.+
12 Umkhokheli ophakathi kwabo uzathwala impahla yakhe ehlombe aphume sekumnyama. Uzavula isikhala emdulini abesephuma ngaso ethwele impahla yakhe+ futhi uzavala ubuso bakhe ukuze angawuboni umhlabathi.’
13 Ngizaphosela inethi yami phezu kwakhe ngimbambe,+ besengimhambisa eBhabhiloni elizweni lamaKhaledi, kodwa kasoze alibone njalo uzafela kulo.+
14 Bonke abaseduze kwakhe, abamncedisayo kanye lebutho lakhe, ngizabachitha bagcwale indawo yonke,+ ngiphinde ngibaxotshanise ngiphethe inkemba.+
15 Bazakwazi ukuthi mina nginguJehova nxa sengibachithachithile ezizweni, ngabahaza emazweni wonke.
16 Kodwa ngizakwenza ukuthi abalutshwana babo basinde, bangabulawa yinkemba lendlala kanye lesifo, ukuze bayetshela abantu bezizwe abazakuya kuzo ngezinto zonke ezenyanyekayo ababezenza. Bazakwazi ukuthi mina nginguJehova.”
17 Ilizwi likaJehova laphinda lafika kimi lathi:
18 “Ndodana yomuntu, kumele udle isinkwa sakho uqhuqha, unathe lamanzi ukhathazekile.+
19 Khuluma labantu belizwe uthi, ‘Nanku okutshiwo yiNkosi Enkulu uJehova ngabantu abahlala eJerusalema elizweni lako-Israyeli: “Bazakudla isinkwa sabo bekhathazekile banathe lamanzi abo bethukile, ngoba ilizwe labo lizasala lilunxiwa+ ngenxa yodlakela lwabo bonke abahlala kulo.+
20 Amadolobho ahlala abantu azadilizwa futhi ilizwe lizasala liyinkangala.+ Lapho-ke lizakwazi ukuthi mina nginguJehova.”’”+
21 Ilizwi likaJehova laphinda lafika kimi lathi:
22 “Ndodana yomuntu, yisaga bani lesi elilaso ko-Israyeli esithi, ‘Insuku ziyadlula kodwa kasikho lesisodwa isiphrofetho esigcwalisekayo’?+
23 Batshele uthi, ‘Nanku okutshiwo yiNkosi Enkulu uJehova: “Ngizakwenza ukuthi isaga lesi siphele njalo asisoze siphinde sikhulunywe ko-Israyeli.”’ Uphinde uthi kubo, ‘Insuku sezisondele+ futhi zonke iziphrofetho zizagcwaliseka.’
24 Ko-Israyeli akusoze kuphinde kube labaphrofethi bamanga labantu abahlahlulayo beqila abanye.+
25 ‘“Mina Jehova ngizakhuluma njalo loba yiliphi ilizwi engilikhulumayo lizagcwaliseka masinyane.+ Ngensuku zenu+ lina bahlamuki, ngizakhipha ilizwi ngiphinde ngiligcwalise,” kutsho iNkosi Enkulu uJehova.’”
26 Ilizwi likaJehova laphinda lafika kimi lathi:
27 “Ndodana yomuntu, abantu bako-Israyeli bathi, ‘Umbono awubonayo ukhatshana ukugcwaliseka, futhi kusasele isikhathi eside ukuthi akuphrofethayo kwenzakale.’+
28 Ngakho batshele uthi, ‘Nanku okutshiwo yiNkosi Enkulu uJehova: “Kalikho ngitsho lelilodwa ilizwi lami elizaphuza, konke engikukhulumayo kuzakwenzakala,’ kutsho iNkosi Enkulu uJehova.”’”
