UHezekheli 17:1-24
17 Ilizwi likaJehova laphinda lafika kimi lathi:
2 “Ndodana yomuntu, batshele umzekeliso futhi utsho ilibho leli ukhuluma ngabantu bako-Israyeli,+
3 uthi, ‘Nanku okutshiwo yiNkosi Enkulu uJehova: “Ukhozi olukhulu+ olulempiko ezinkulu lensiba ezinde ezimibalabala futhi ezinengi lwafika eLebhanoni+ lwakhipha isihloko* sesihlahla somsedari.+
4 Lwaqunta ihlumela elaliphezulu kulawo wonke lwahamba lalo elizweni labathengisayo* lwafika lwalihlanyela edolobheni labathengisayo.+
5 Ukhozi lolu lwathatha enye inhlanyelo yaselizweni*+ lwayihlanyela emhlabathini ovundileyo. Lwayihlanyela ukuze ikhule angathi yisihlahla esiseceleni kwamanzi amanengi.
6 Inhlanyelo yamila yaba yisihlahla samagilebisi esifitshane esinabayo,+ ingatsha zaso zigobele ngaphakathi lempande zaso zikhula khonapho ngaphansi kwaso. Sakhula-ke isihlahla samagilebisi saba lengatsha sakhipha lamahlumela.+
7 “‘“Kusenjalo kwafika olunye ukhozi olwalulukhulu+ lulempiko ezinkulu lensiba ezinde.+ Isihlahla samagilebisi sanabisela impande zaso lapho okwakulokhozi lolu, zisuka endaweni esasihlanyelwe kuyo. Selulela kulo ingatsha zaso ukuze ukhozi lusithelele ngamanzi.+
8 Kodwa sasivele sihlanyelwe endaweni evundileyo eduze kwamanzi amanengi ukuze sikhule sibe yisihlahla samagilebisi esihle esilengatsha njalo esithela izithelo.”’+
9 “Batshele uthi, ‘Nanku okutshiwo yiNkosi Enkulu uJehova: “Kambe isihlahla lesi sizakhula kuhle yini? Abasoze baquphune impande zaso yini,+ izithelo zaso zibole lamahlumela aso abune?+ Sizakutsha okokuthi akusoze kudingakale ingalo elamandla loba abantu abanengi ukuthi basisiphune.
10 Lanxa singasitshunwa siyehlanyelwa kwenye indawo, sizakhula kuhle yini? Asisoze sitshe yini nxa umoya wempumalanga ususitshaya? Sizakutsha somele endaweni esikhulele kuyo.”’”
11 Ilizwi likaJehova laphinda lafika kimi lathi:
12 “Ngicela ukhulume labantu laba abahlamukayo uthi kubo, ‘Kaliboni yini ukuthi izinto lezi zitshoni?’ Wothi kubo, ‘Inkosi yeBhabhiloni yafika eJerusalema yathatha inkosi lezikhulu zayo yaya labo eBhabhiloni.+
13 Yathatha omunye ozalwa esikhosini+ yenza laye isivumelwano yasimfungisa.+ Yaphinda yathatha lezikhulu zesizwe yahamba lazo,+
14 ukuze umbuso wehliselwe phansi ungaphindi ukhule, uqhubeke ukhona kuphela nxa engagcina isivumelwano sakhe.+
15 Kodwa inkosi yakoJuda ihlamukele inkosi yeBhabhiloni+ ngokuthuma izithunywa zayo eGibhithe ukuze bayinike amabhiza+ lebutho elikhulu.+ Kambe izaphumelela? Umuntu owenza izinto lezi uzaphunyuka yini angajeziswa? Kambe angephula isivumelwano aphunyuke?’+
16 “‘“Ngifunga ngami uqobo,” kutsho iNkosi Enkulu uJehova, “uzafela eBhabhiloni lapho okuhlala khona inkosi* eyambeka ukuthi abe yinkosi,* leyo adelele isifungo sayo wephula lesivumelwano ayesenze layo.+
17 Ibutho elikhulu kanye lamasotsha amanengi kaFaro awasoze abe loncedo empini+ nxa sekusakhiwa imiduli emikhulu yokuvimbezela lamadundulu okuhlasela ukuze kutshabalaliswe impilo zabantu abanengi.
18 Udelele isifungo, wephula isivumelwano. Wenze konke lokhu lanxa wayethembise ukuthi uzasigcina isivumelwano lesi, yikho engasoze aphunyuke.”’
19 “‘Ngakho nanku okutshiwo yiNkosi Enkulu uJehova: “Ngifunga ngami uqobo, ngizamjezisa ngoba udelele isifungo sami+ wephula lesivumelwano sami.
20 Ngizaphosela inethi yami phezu kwakhe ngimbambe.+ Ngizamletha eBhabhiloni ngimthonisise khona ngoba kazange athembeke kimi.+
21 Wonke amabutho akhe abalekayo azabulawa ngenkemba futhi aseleyo azasabalala indawo yonke.+ Lapho-ke lizakwazi ukuthi mina Jehova ngikhulumile.”’+
22 “‘Nanku okutshiwo yiNkosi Enkulu uJehova: “Ngizathatha ihlumela esihlokweni* sesihlahla somsedari+ eside besengilihlanyela. Ngizathatha ihlumela elibuthakathaka egatsheni lwaso oluphezulu,+ ngilihlanyele phezu kwentaba enkulu futhi ende.+
23 Ngizalihlanyela entabeni yako-Israyeli ende, likhule libe yisihlahla somsedari esihle esilengatsha ezinkulu lesithela izithelo. Zonke inyoni zizabuya zizokwakha izidleke kuso futhi zihlale emthunzini wengatsha zaso.
24 Zonke izihlahla zeganga zizakwazi ukuthi mina Jehova yimi engiwise isihlahla esikhulu ngaphakamisa leso esincane.+ Ngomise isihlahla esiluhlaza ngenza esomileyo sahluma.+ Mina Jehova ngikhulumile njalo ngikwenzile.”’”
Amabala angaphansi
^ Kumbe, “ugatsha olusesiqongweni.”
^ NgesiHebheru, “elizweni leKhenani.”
^ Lapha kungabe kutshiwo ilizwe lakoJuda.
^ Lapha kutshiwo uNebhukhadinezari.
^ Owabekwa ukuthi abe yinkosi nguZedekhiya.
^ Kumbe, “egatsheni olusesiqongweni.”
