UJobe 15:1-35
15 U-Elifazi+ umThemani waphendula wathi:
2 “Kambe kulomuntu ohlakaniphileyo ongaphendula ngamazwi angelasisindo,Kumbe agcwalise isisu sakhe ngomoya wempumalanga?
3 Amazwi angelasisindo ngeke amqondise umuntu,Lokukhuluma kuphela akusizi ngalutho.
4 UNkulunkulu kasahlonitshwa ngenxa yakho,Wenza abantu bangazihluphi ngaye.
5 Isono sakho yiso esenza ukhulume kanje,Amazwi akho ngaweqili.
6 Umlomo wakho yiwo okubeka icala, hatshi mina.
Amazwi akho yiwo atshengisa ukuthi wonile.+
7 Kanti nguwe yini umuntu owazalwa kuqala?
Wazalwa intaba zingakabi khona yini?
8 Nguwe yini oyaziyo imfihlo kaNkulunkulu?
Kumbe ubona angani nguwe wedwa ohlakaniphileyo?
9 Kuyini okwaziyo thina esingakwaziyo?+
Kukhona yini okuzwisisayo thina esingakuzwisisiyo?
10 Sibadala silapha futhi abanye bethu sebecutha olumhlophe,+Sibadala khatshana kuloyihlo.
11 Utsho ukuthi induduzo oyiphiwa nguNkulunkulu incane,Lamazwi akhe amnandi awakuqinisi?
12 Kungani uvumela ukufuqwa yinhliziyo?
Kungani amehlo akho egcwele ulaka?
13 Phela uzondele uNkulunkulu,Yikho ukhuluma amazwi amabi kangaka.
14 Uyini umuntu ukuthi angaba ngohlanzekileyo?
Kambe ukhona umuntu ozelwe ngowesifazana okungathiwa ulungile?+
15 Phela uNkulunkulu kazithembi lezingilosi zakhe,Lamazulu uwabona engahlambulukanga.+
16 Pho angamthemba yini umuntu owenyanyekayo loxhwalileyo?+
Angamthemba yini umuntu ohlala efuna ukwenza okubi?
17 Lalela ngikutshele!
Ngizakulandisela engikubonileyo,
18 Lokho amadoda ahlakaniphileyo akutshelwa ngoyise,+Asekulandisela abanye kulokuthi akufihle.
19 Ilizwe laphiwa bona kuphela,Njalo akulasihambi esake sadabula kulo.
20 Umuntu olesihluku futhi owenza okubi uyahlupheka impilo yakhe yonke,Uthwala nzima aze ayengena egodini.
21 Uzwa imisindo emethusayo,+Lanxa kulokuthula izigebenga ziyamhlasela.
22 Uyakwazi ukuthi kasoze aphume emnyameni,+Yena nje umelelwe yinkemba.
23 Ugcwala indawo yonke edinga ukudla, ezibuza ukuthi uzakuthola ngaphi,Ukwazi mhlophe ukuthi usuku lobumnyama selusondele.
24 Usehlala ekhathazekile ngoba inhlupho kazimehli,Ziyamehlula njengenkosi elamabutho alamandla,
25 Ngoba uphakamisa isandla sakhe alwe loNkulunkulu,Njalo uzama ukumisana loSomandla;
26 Uqinisa ikhanda esiyadibana laye,Ephethe ihawu elibanzi futhi eliqinileyo.
27 Ubuso bakhe buzimukile,Lomkhaba wakhe uyalenga.
28 Uhlala emadolobheni azadilizwa,Ezindlini ezizasala zingamanxiwa,Ezizacina seziyinqwaba yamatshe.
29 Impahla yakhe ngeke yande futhi kasoze anothe,Lezifuyo zakhe kazisoze zigcwale elizweni.
30 Kasoze aphume emnyameni,Ilangabi lizawomisa ingatsha zakhe,*UNkulunkulu uzakhwaza yena ahle afe.+
31 Akumelanga aziyenge athembe izinto ezingelancedo,Ngoba akulalutho azaluzuza.
32 Lokho kuzamehlela usuku lwakhe lungakafiki,Ingatsha zakhe azisoze zikhule.+
33 Uzakuba njengesihlahla samagilebisi esikhithiza amagilebisi angakavuthwa,Lanjengesihlahla sama-oliva esithintitheka amaluba.
34 Lapho okuhlangene khona abantu abenza okubi* akulanto ephumayo,+Lomlilo uzatshisa amatende alabo abathanda isivalamlomo.
35 Bacabanga izinto ezimbi bazenze,Ingqondo zabo zihlala zibumba amacebo alobuqili.”
Amabala angaphansi
^ Lapha kutshiwo ukuthi ngeke akuthole osekumlahlekele.
^ Kumbe, “abantu abahlamukayo.”
