UJobe 22:1-30
22 U-Elifazi+ umThemani waphendula wathi:
2 “Kambe umuntu anganceda uNkulunkulu?
Lanxa engabe ehlakaniphile angamsiza ngani?+
3 Ubona angani uSomandla ulendaba lokuthi* ulungile?
Kuyini akutholayo ngokuthi wena uqotho?+
4 Kambe angakujezisa yini
Njalo akuhambise emthethwandaba ngenxa yokuthi uyamhlonipha?
5 Akujezisela khona yikuthi kunengi okubi okwenzayo,Lezono zakho azipheli.+
6 Uthathela abafowenu impahla yabo usithi balesikwelede sakho,Uhlubule abantu izigqoko ubatshiye benqunu.+
7 Odiniweyo awumniki amanzi okunatha,Lolambileyo uyamncitsha ukudla.+
8 Ilizwe ngelenu lina elilamandla,+Liphiwa lina abanothileyo.
9 Abafelokazi wawubaxotsha belengise izandla,Njalo wawucindezela izintandane.
10 Yikho usuhanqwe yimijibila,+Usuhlalela evalweni.
11 Yikho ususemnyameni ungasaboni,Njalo usibekelwe ngamanzi amanengi.
12 UNkulunkulu kakho phezulu emazulwini yini?
Khangela ukuthi inkanyezi ziphezulu njani!
13 Kodwa wena uthi: ‘UNkulunkulu wazini?
Angahlulela njani kumnyama kangaka?
14 Kaboni lutho ngoba amayezi ayamsitha,Nxa ehambahamba khonale ezulwini.’
15 Kungani uhamba ngendlela yakudala
Eyayihamba abantu ababesenza okubi,
16 Abantu abafa masinyane,Izisekelo zabo zathathwa yizikhukhula?+
17 Babesithi kuNkulunkulu weqiniso: ‘Akusiyekele!’
Baphinde bathi, ‘USomandla uzasenzani?’
18 Kodwa nguye owabanika konke okuhle okwakusezindlini zabo.
(Mina angicabangi njengabantu laba ababi.)
19 Abalungileyo bazathokoza bebona umonakalo usehlela ababi,Njalo abangelacala bazahleka bathi:
20 ‘Izitha zethu sezitshabalele,Umlilo uzalobisa konke okwabo okuseleyo.’
21 Ungaba ngumngane wakhe uzaba lokuthula,Njalo uzathola okuhle.
22 Lalela nxa ekunika umthetho,Ugcine amazwi akhe enhliziyweni yakho.+
23 Nxa ungabuyela kuSomandla uzaphinda uphumelele.+
Nxa ungayekela ukwenza izinto ezimbi etendeni lakho,
24 Ulahlele igolide lakho phansi,Njalo uphosele igolide lase-Ofiri+ ezigodini ezilamatshe,
25 USomandla uzakuba ligolide lakho,Abe yisiliva sakho esihle.
26 Lapho-ke uzathokoza ngoSomandla,Ukhululeke ukuthandaza kuye.
27 Uzamncenga akuzwe;Ugcwalise izifungo zakho.
28 Konke ozakwenza kuzaphumelela,Lendlela yakho izakhanya.
29 Nxa ungakhuluma uqholoza uzakujezisa,Kodwa abathobekileyo uzabakhulula.
30 Uzabakhulula abangelacala,Yikho nxa izandla zakho zihlanzekile uzakhululwa.”
Amabala angaphansi
^ Kumbe, “kuyamthokozisa ukuthi.”
