UJobe 27:1-23
27 UJobe waqhubeka ekhuluma esithi:
2 “Ngifunga ngoNkulunkulu ophilayo ongazange angahlulele kuhle,+Ngifunga ngoSomandla ophilayo ongenze ngaphila kabuhlungu.+
3 Nxa nje ngisaphefumula,Lomoya kaNkulunkulu usesemakhaleni ami,+
4 Umlomo wami awusoze ukhulume okubi,Lolimi lwami alusoze luqile muntu!
5 Angisoze ngithi lilungile.
Ngizaze ngizifele ngilokhu ngiqotho!*+
6 Ngizakuma ngelokuthi ngilungile, lapho angitshintshi,+Inhliziyo yami ayisoze ingithonisise ngize ngiyekufa.
7 Isitha sami kasijeziswe njengomuntu owenza okubi,Lalabo abangihlukuluzayo kabehlelwe ngokuzakwehlela abangalunganga.
8 Umuntu omubi* angaba lethemba yini nxa uNkulunkulu esemtshabalalisile+
Waquma impilo yakhe?
9 UNkulunkulu uzamuzwa yini nxa esekhala?
Uzamnceda yini nxa esephakathi kobunzima?+
10 Kuzamthokozisa yini ukukhonza uSomandla?
Uzathandaza kuNkulunkulu zikhathi zonke yini?
11 Ngizalifundisa ngamandla kaNkulunkulu,*Angisoze ngifihle lutho olumayelana loSomandla.
12 Nxa kuyikuthi lonke libone imibono,Kuyini okulenza likhulume izinto ezingelangqondo?
13 Nansi isabelo uNkulunkulu asipha umuntu owenza okubi,+Ilifa uSomandla alipha lowo ocindezela abanye:
14 Lanxa amadodana akhe emanengi azabulawa ngenkemba,+Lezizukulwane zakhe zizaswela ukudla.
15 Abantwabakhe abaseleyo bazaqedwa yisifo,Abafelokazi babo abasoze babakhalele.
16 Lanxa engabuthelela isiliva esinengi angathi yinhlabathi,Abuthelele lezigqoko ezinhle angathi ubuthelela itshebetshebe,
17 Loba angaze azibuthelele izigqoko zakhe,Abalungileyo yibo abazazigqoka,+Lesiliva sakhe sizathathwa ngabantu abamsulwa.
18 Indlu ayakhileyo kayiqinanga, injengeyobulembu,Injengedumba+ elakhiwe ngumuntu olindayo.
19 Uzathi esiyalala enothile, kodwa konke alakho kuzaphelela emoyeni,Uzathi evula amehlo abone konke kungasekho.
20 Inhlupho ziyamkhukhula njengamanzi,Athathwe yisiphepho ebusuku.+
21 Umoya wempumalanga uzadlula laye anyamalale,Uzamphephula umsuse endaweni yakhe.+
22 Uzaphaphatheka ezama ukuwubalekela,+Kodwa wona uzamhwitha ngamandla awo amakhulu.+
23 Uzatshaya izandla zawo umhleka,Umtshayele umlozwi+ usendaweni yawo.*
Amabala angaphansi
^ Kumbe, “ngingabulahlanga ubuqotho bami.”
^ Kumbe, “ohlamukayo.”
^ Ezinye inguqulo zithi, “ngesandla sikaNkulunkulu.”
^ Ezinye inguqulo zithi, “Bamtshayela izandla bemhleka, bamtshayele lomlozwi besendaweni yabo.”
