UJobe 28:1-28
28 “Kulendawo yokugebha isiliva,Lendawo yokugebha igolide elizacengwa.+
2 Insimbi igejwa phansi,Lekhopha incibilikiswa emadwaleni.+
3 Umuntu ukhanyisa emnyameni,Ugebha aze ayefika endaweni ezimnyama tshu,Edinga amatshe aligugu.
4 Ugebha umgodi khatshana lalapho okuhlala khona abantu,Khonale ematshokotshokweni okungahambi muntu.
Abanye bangena emgodini basebenze belenga ngentambo.
5 Phezu komhlaba kumila izilimo,Kodwa ngaphansi bayawutshabalalisa angathi utshiswe ngumlilo.*
6 Ematsheni kulesafire,Ethulini kulegolide.
7 Akulanyoni edla inyama ekwazi indlela eya khona,Lomzwazwa omnyama awukaze uyithi tshazi.
8 Akulasilo esake sanyathela khona,Akulasilwane esake sazingela khona.
9 Umuntu uqhekeza idwala eliqinileyo ngezandla zakhe,Agenqule izintaba ezisekelweni zazo.
10 Uvula imigelo yamanzi+ emadwaleni,Amehlo akhe abona wonke amagugu.
11 Uvimba amanzi ageleza ezifuleni,Obekufihliwe akulethe ekukhanyeni.
12 Kodwa ukuhlakanipha kutholakala ngaphi?+
Ukuzwisisa kuthathwa ngaphi?+
13 Akulamuntu okunanzelelayo ukuthi kuligugu kangakanani,+Akutholakali emhlabeni.
14 Amanzi asenzikini athi, ‘Akukho kimi!’
Lolwandle luthi, ‘Angilakho!’+
15 Ngeke ukuthenge ngegolide elicengekileyo,Futhi ngeke ukutshintshise ngesiliva.+
16 Ngeke ukuthenge ngegolide le-Ofiri,+Kumbe nge-onekisi eligugu loba ngesafire.
17 Igolide legilasi ngeke kuqathaniswe lakho.
Ngeke ukutshintshise ngesitsha segolide elihlambulukileyo.+
18 Ikhorali* lekhristali kasikhulumi ngakho,+Ngoba ukuhlakanipha kuligugu ukwedlula isikhwama esigcwele amaphareli.
19 Ithophazi+ yaseKhushi ngeke iqathaniswe lakho,Ngeke ukuthenge ngegolide elicengekileyo.
20 Pho ukuhlakanipha kuvela ngaphi?
Ukuzwisisa kutholakala ngaphi?+
21 Kufihliwe ukuze kungabonwa ngabantu lezinyamazana,+Lezinyoni kazikuboni.
22 Ukufa lengcwaba* kuthi,‘Thina sizwe amahungahunga akho kuphela.’
23 UNkulunkulu uyayazi indlela eya kukho,Nguye kuphela okwaziyo ukuthi kuhlala ngaphi,+
24 Ngoba uyakhangela lasemikhawulweni yomhlaba,Abone konke okungaphansi kwamazulu.+
25 Wathi esenza ukuthi umoya ovunguzayo ube lamandla+
Njalo elinganisa amanzi,+
26 Wathi ebeka izikhathi zokuna kwezulu+
Elungisa lendlela yezulu elilesiphepho,+
27 Wakubona ukuhlakanipha wakuchasisa,Wakwakha njalo wakuhlola.
28 Wasesithi emuntwini:
‘Ukwesaba uJehova yikho ukuhlakanipha,+Lokubalekela okubi yikho ukuzwisisa.’”+
Amabala angaphansi
^ Lapha kungabe kutshiwo ukugejwa kwemigodi ngabantu abadinga amatshe aligugu.
^ Khangela iNgcazelo Yamabala.
^ NgesiHebheru, “lokutshabalala.”