UJobe 31:1-40
31 “Ngenze isivumelwano lamehlo ami,+Yikho ngeke ngikhangele intombi ngiyihawukele.+
2 Manje uNkulunkulu osezulwini uzanginika mvuzo bani?
Yiliphi ilifa uSomandla azangipha lona?
3 Umonakalo kawehleli abenza okubi yini?
Labangalunganga ayisibo yini abehlelwa zinhlupho?+
4 Kaziboni yini izindlela zami?+
Kakuboni yini konke engikwenzayo?
5 Ngake ngaqamba amanga yini?
Ukhona yini engake ngamqila?+
6 UNkulunkulu kangifake esikalini esilezilinganiso eziqondileyo,+Lapho-ke uzabona ukuthi ngiqotho.+
7 Nxa inyawo zami ziphambukile endleleni,+Inhliziyo yami yalandela engikubonayo,+Njalo ngangcolisa izandla zami,
8 Omunye umuntu kadle lokho engikulimileyo,+Lalokho engikuhlanyelayo akusitshunwe.
9 Nxa inhliziyo yami ike yathatheka ngowesifazana,+Ngayacathama+ emnyango wendlu kamakhelwane,
10 Umkami kacholele enye indoda amabele,Alale lamanye amadoda,+
11 Ngoba ngiyabe ngenze ihlazo,Ngadala icala okumele lithoniswe ngabahluleli bangijezise.+
12 Ngiyabe ngizokhele umlilo ozatshisa konke engilakho,+Ulobise konke engikusebenzeleyo.
13 Nxa ngala ukulalela izinceku lezincekukazi zami
Ngesikhathi zilensolo ngami,*
14 Ngizathini nxa uNkulunkulu esengibuza?
Ngizamphendula ngithini nxa esengithonisisa?+
15 Kanti lowo owangibumbayo esiswini sikamama ayisuye yini owabenzayo?+
Sonke asibunjwanga nguye yini eziswini zabomama bethu?+
16 Nxa ngala ukunika umyanga lokho ayekucela,+Ngenza lomfelokazi wakhala ezimathonsi;*+
17 Nxa ngazidlela ngedwa ukudla kwami,Ngancitsha izintandane;+
18 (Phela benginguyise wezintandane kusukela ngisesemutsha,Kusukela ngisesemncane* bengibasiza abafelokazi.)
19 Nxa ngabona umuntu edubeka engelazigqoko,Kumbe ngabona umyanga owayengelazembatho,+
20 Ngasengiyekela ukumnika izembatho+
Ukuze agqoke akhudumale abesengibonga,
21 Nxa ngethusela intandane ngesibhakela+
Ngesikhathi icela uncedo kimi egedini ledolobho,*+
22 Ingalo yami kayikhumuke,Yephuke endololwaneni.
23 Phela mina ngangisesaba ukujeziswa nguNkulunkulu,Ngangingeke ngiyimele inkazimulo yakhe.
24 Nxa ngasengithembe igolide,Kumbe ngathi egolideni elihlambulukileyo, ‘Wena ulithemba lami!’+
25 Nxa ngasengizigqaja ngenotho yami,+Ngiziphakamisa ngoba sengilempahla enengi,+
26 Nxa ngabona ilanga likhazimula,Ngabona lenyanga ihamba ibenyezela emkhathini,+
27 Inhliziyo yami yasithatheka ngezinto lezi,Ngaqabuza isandla sami ngazikhonza,+
28 Ngangiyabe ngenze icala okumele lithoniswe ngabahluleli bangijezise,Ngoba ngangiyabe ngimphikile uNkulunkulu osezulwini.
29 Ngake ngathokoza yini ngibona isitha sami sijeziswa,+Kumbe ngajabula ngoba sehlelwe ngokubi?
30 Angizange ngone ngomlomo wami
Ngokuthethisa isitha sami ngisifisela ukuthi sife.+
31 Abantu abahlala etendeni lami bajayele ukuthi,‘Ukhona yini ongathi kakaze adle asuthe lapha?’+
32 Akulasihambi* esasilala phandle,+Zonke izihambi ngangizamukela emzini wami.
33 Ngake ngazama yini ukufihla amacala ami njengamanye amadoda?+
Ngake ngafihla isono esikhwameni sesembatho sami yini?
34 Ngake ngesaba yini ukuthi abantu bazathini ngami,Kumbe ngesaba ukwenyanywa ngezinye izakhamizi,Ngacina sengizithulela ngingasaphumi laphandle?
35 Ngabe nje kulomuntu ongilalelayo,+Bengizasayina phansi ukuze kukhanye ukuthi engikutshoyo kuliqiniso.
USomandla kangiphendule!+
Aluba ongisolayo ubebhale icala angethesa lona encwadini,
36 Bengizayithwala ehlombe,Ngiyibophele ekhanda lami njengomqhele.
37 Bengizamtshela konke engakwenzayo,Ngisondele kuye ngingesabi lutho njengomkhokheli.
38 Nxa insimu yami ibingakhala ngami,Lemifolo yonke ekuyo ilile,
39 Nxa kuyikuthi ngidle izithelo zayo ngingabhadali,+Kumbe ngazwisa abanikazi bayo ubuhlungu,+
40 Akumile ameva esikhundleni sengqoloyi,Kumile lokhula olunuka kubi esikhundleni sebhali.”
Aphelela lapha amazwi kaJobe.
Amabala angaphansi
^ Kumbe, “zingethesa icala.”
^ NgesiHebheru, “Ngenza amehlo omfelokazi afiphala.”
^ NgesiHebheru, “ngisesibelethweni sikamama.”
^ Ezinye inguqulo zithi, “Ngithembe ukuthi abantu bazangisekela enkundleni.”
^ Kumbe, “Akulamuntu wesinye isizwe.”
