UJobe 36:1-33
36 U-Elihu waqhubeka wathi:
2 “Ngicela ungibekezelele ngichasise,Ngiseselokunye engifuna ukukutsho ngoNkulunkulu.
3 Ngizakhuluma konke engikwaziyo,Ngizathi uMenzi wami ulungile.+
4 Engizakukhuluma kuliqiniso,Ngoba kuvela kulowo okwazi konke.+
5 UNkulunkulu ulamandla+ njalo kalahli muntu.
Ukuhlakanipha kwakhe kuyamangalisa.
6 Abenza okubi kasoze abayekele bephila,+Kodwa abahluphekayo ubahlulela kuhle.+
7 Uhlala ebakhangele abalungileyo,+Uyabaphakamisa babe njengamakhosi,+ babe lodumo kuze kube nini lanini.
8 Nxa bebotshwe ngamaketane,Bethandelwe zintambo zokuhlupheka,
9 Uyabachasisela abakuphambanisileyo,Abatshele isono abasenzileyo ngenxa yokuzigqaja kwabo.
10 Uyabavula indlebe ukuze abaqondise,Abatshele ukuthi batshiye ukwenza okubi.+
11 Nxa bangamlalela futhi bamkhonze,Bazaphila impilo emnandi,Bathokoze iminyaka yonke besaphila.+
12 Kodwa nxa bengamlaleli bazabulawa ngenkemba,+Bafe bengelalwazi.
13 Abenza okubi* bafukamela intukuthelo.
Lanxa uNkulunkulu ebabopha abazihluphi ngokudinga uncedo.
14 Bafa besesebancane,+Ngenxa yokuphila lamawule esilisa ahlala ethempelini.+
15 Kodwa uNkulunkulu uyabakhulula abahluphekayo,Abancede bamlalele ngesikhathi besebunzimeni.
16 Uyakukhipha ekuhluphekeni,+Akuse endaweni evulekileyo engelamngcele,+Akududuze ngokukunika ukudla okulomsoco.+
17 Lapho-ke wena uzasizwisisa isahlulelo sabenza okubi,+Nxa sekukhitshwa isigwebo esifaneleyo.
18 Kodwa nanzelela ungazondi uze ucine usuphindisela,+Ungamukeli isivalamlomo ngoba sizakuphambukisa.
19 Kambe ukukhalela uncedo
Lokusebenza nzima kungakuqeda yini ukuhlupheka kwakho?+
20 Ungabufisi ubusuku,Lapho abantu abachitheka khona baye ezindaweni zabo.
21 Nanzelela ungacini ususenza okubi,Uze ucine usubona kungcono ukuthi wenze okubi kulokuthi uhlupheke.+
22 UNkulunkulu uphakeme ngenxa yamandla akhe.
Ngubani ongafundisa njengaye?
23 Ngubani oke wamqondisa,*+
Kumbe wathi kuye, ‘Okwenzileyo akulunganga’?+
24 Ungakhohlwa ukubabaza imisebenzi yakhe,+Leyo abantu abahlabela ngayo.+
25 Bonke bayibonile,Kodwa bayazela khatshana.
26 UNkulunkulu mkhulu ngendlela esingeke siyizwisise,+Leminyaka yakhe ngeke senelise ukuyibala.*+
27 Uqoqa amathonsi amanzi,+Inkungu ihlangane ibe lizulu,
28 Amayezi alithululele phansi,+Line emhlabeni abantu bathole amanzi.
29 Ukhona yini ongazwisisa ukuhlala kwamayezi emkhathini,Lomdumo ozwakala etendeni likaNkulunkulu?+
30 Khangela ubone ukuthi ukhanyisa njani emayezini ngombane wakhe,+Asibekele inziki yolwandle ngamanzi.
31 Lokhu yikho akwenzayo ukuze anakekele abantu,Abanike ukudla okunengi.+
32 Uyawuvalela umbane ezandleni zakhe,Abesewuthuma lapho okumele utshaye khona.+
33 Umdumo wakhe ubika ukuza kwakhe,Lezifuyo ziyatsho ukuthi ngubani ozayo.*
Amabala angaphansi
^ Kumbe, “Abahlamukayo.”
^ Ezinye inguqulo zithi, “wamsola.”
^ Kumbe, “ngeke siyizwisise.”
^ Ezinye inguqulo zithi, “kuyini okuzayo.”
