UJobe 39:1-30
39 “Uyakwazi yini ukuthi igogo* lizala nini?+
Sewake wayibona yini impala* izala?+
2 Uyake ubale yini ukuthi inyamazana lezi zihlala inyanga ezingaki zimithi?
Uyasazi yini isikhathi ezizala ngaso?
3 Ziyaguqa nxa zizala amazinyane azo,Imihelo yazo ihle iphele.
4 Amazinyane azo akhulela eguswini aze aqine,Abesehamba angaphindi aphenduke kubonina.
5 Ngubani owakhulula ubabhemi weganga,+Wathukulula lemichilo ayebotshwe ngayo?
6 Ngenze inkangala yaba likhaya lakhe,Ngamhlalisa ezimunywini.*
7 Kalandaba lomsindo osedolobheni,Kakuzwa ukukhuza komtshayeli wabobabhemi.
8 Ubhodabhoda emaqaqeni edinga amadlelo,Edinga loba yini eluhlaza.
9 Inkunzi yeganga ingavuma yini ukukusebenzela?+
Ungayivalela esibayeni sakho ubusuku bonke?
10 Ungayidonsa yini ngomchilo uyifake emfolweni?
Ungayikhokhela yini ulime ngayo esigodini?
11 Ungawathemba yini amandla ayo amakhulu,Kube yiyo ekwenzela umsebenzi onzima?
12 Ungalayitsha ngayo amabele yini emasimini?
Kambe ingawathwala izowathululela esizeni* sakho?
13 Iyamangalisa indlela intshe etshaya ngayo amaphiko ayo,Kodwa insiba lempiko zayo zingafanana lezengabuzane yini?+
14 Intshe igqibela amaqanda ayo phansi,Akhudunyezwe yinhlabathi.
15 Iyakhohlwa ukuthi abantu bangawagxoba afe
Lokuthi anganyathelwa zinyamazana.
16 Iwaphatha kubi amatsiyane ayo angathi awasiwayo.+
Ayilandaba lokuthi ingasebenzela ize,
17 Ngoba uNkulunkulu wayincitsha ukuhlakanipha,Kazange ayinike ukuzwisisa.
18 Kodwa nxa ingasukuma ivule amaphiko ayo isigijima,Iyalihleka ibhiza lomgadi walo.
19 Nguwe yini onika ibhiza amandla?+
Nguwe owaligqokisa umhlonga oyabuzelayo yini?
20 Ungalenza leqe njengentethe yini?
Ukuhwabha kwalo kuyethusa.+
21 Liqothula umhlabathi ngamasondo alo liqolotshe,+Ligijimele empini.*+
22 Liyakuhleka ukwesaba njalo kalesabi lutho.+
Kalibuyeli emuva lanxa libona inkemba.
23 Isikhwama sezikhali siyakhehlezela phezu kwalo,Kuphazime umkhonto lejavelini.
24 Livuka idlabuzane ligijime ngesiqubu esikhulu.
Nxa uphondo lungakhala akuvumi ukuthi lime.
25 Lingezwa uphondo lukhala liyakhonya,Liyayinuka impi lisesekhatshana
Lizwe lokukhuza kwabakhokheli bamabutho lomsindo wempi.+
26 Yikuzwisisa kwakho yini okwenza uhelwane luqonge emoyeni,Luvule impiko zalo lusiya eningizimu?
27 Nguwe yini oyitshelayo ingqungqulu* ukuthi iphaphe iyephezulu,+Iyekwakha isidleke sayo esiqongweni?+
28 Nguwe yini oyitshelayo ukuthi ilale eliweni lentaba,Lokuthi ihlale endaweni evikelekileyo ezimbalwini zamadwala?
29 Isuka lapho iyedinga ukudla,+Amehlo ayo abona okukhonale khatshana.
30 Abantwabayo banatha igazi.
Kayiswelakali lapho okulezidumbu khona.”+
Amabala angaphansi
^ Kumbe, “imbuzi yeganga.”
^ Ibala lesiHebheru elisetshenziswe lapha litsho inyamazana ehambelana lempala.
^ Isimunyu yindawo elomhlabathi omunyu olesawudo.
^ Khangela iNgcazelo Yamabala.
^ NgesiHebheru, “Liphume lihlangabeze izikhali.”
^ Kumbe, “ukhozi.”
