UJobe 42:1-17
42 UJobe waphendula uJehova wathi:
2 “Sengikwazi ukuthi uyenelisa ukwenza zonke izinto,Lokuthi akulalutho olucabangayo ongehluleka ukulwenza.+
3 Wena uthe, ‘Ngubani lowo ongazi lutho kodwa owenza izeluleko zami zingazwakali?’+
Ngikhulume ngingelalwazi
Ngezinto ezimangalisayo kodwa engingazi lutho ngazo.+
4 Uphinde wathi, ‘Ngicela ulalele, ngizakhuluma.
Mina ngizakubuza wena ungiphendule.’+
5 Indlebe zami besezizwile ngawe,Kodwa khathesi sengikubona ngamehlo ami.
6 Yikho ngiyazisola ngalokho engikukhulumileyo,+Sengize ngahlala emlotheni lasethulini ukuze kukhanye ukuthi ngiyazisola.”+
7 UJehova wathi eseqedile ukukhuluma loJobe, wakhuluma lo-Elifazi umThemani. UJehova wathi kuye:
“Ngikuzondele kakhulu wena labangane bakho ababili+ ngoba kalenzanga njengenceku yami uJobe, kodwa likhulume amanga ngami.+
8 Ngakho thathani inkunzi eziyisikhombisa lenqama eziyisikhombisa liye encekwini yami uJobe, lifike lenze imihlatshelo yokutshiswa ngoba kalenzanga njengaye kodwa likhulume amanga ngami. UJobe inceku yami uzalithandazela+ futhi ngizasamukela isicelo sakhe, ngingalijeziseli ubuphukuphuku benu.”
9 Ngakho u-Elifazi umThemani loBhilidadi umShuhi loZofari umNamathi bahamba bayakwenza lokho uJehova ayebatshele khona. UJehova wawulalela umthandazo kaJobe.
10 UJobe wathi esebathandazele abangane bakhe,+ uJehova waziqeda zonke inhlupho zakhe+ wambuyisela inotho ayelayo. UJehova wenza inotho yakhe yaba nengi okuphindwe kabili.+
11 Bonke abafowabo labodadewabo kanye labangane bakhe bakudala+ babuya bazokudla laye emzini wakhe. Bamkhalela bamduduza ngenxa yenhlupho zonke uJehova ayevumele ukuthi zimehlele. Ngamunye wabo wamnika imali lendandatho yegolide.
12 UJehova wambusisa uJobe eminyakeni yakhe yokucina kulakuqala.+ UJobe waba lezimvu ezingu-14 000, lamakamela angu-6 000, lezipani zenkomo ezingu-1 000 labobabhemi abasikazi abangu-1 000.+
13 Waba lamadodana ayisikhombisa lamadodakazi amathathu.+
14 Indodakazi yakhe yokuqala wayinika ibizo elithi Jemima, eyesibili wathi nguKheziya, eyesithathu wathi nguKhereni-haphukhi.
15 Elizweni lonke kakho owesifazana owayemuhle njengamadodakazi kaJobe njalo uyise wawanika ilifa phakathi kwabafowabo.
16 Ngemva kwalokho uJobe waphila iminyaka engu-140 futhi wabona abantwabakhe labazukulu bakhe, izizukulwane ezine.
17 UJobe wafa esemdala futhi esuthisekile ngempilo yakhe.
