UJoshuwa 5:1-15
5 Wonke amakhosi ama-Amori+ ayesentshonalanga kukaJodani, lawo wonke amakhosi aseKhenani+ ayehlala eceleni kolwandle aphela amandla+ futhi esaba kakhulu esizwa ukuthi uJehova womise umfula uJodani abako-Israyeli+ bachapha.
2 Ngalesosikhathi uJehova wathi kuJoshuwa: “Yenza izingqamu* usoke+ amadoda ako-Israyeli.”*
3 Ngakho uJoshuwa wenza izingqamu* wasesoka amadoda ako-Israyeli eGibheya-haralothi.*+
4 Nanku okwenza uJoshuwa wasoka amadoda ako-Israyeli: Wonke amadoda angamabutho* aphuma eGibhithe afela enkangala ngesikhathi besemangweni bevela eGibhithe.+
5 Bonke abantu abaphuma eGibhithe babesokile. Kodwa labo abazalelwa endleleni ngesikhathi abako-Israyeli besenkangala ngemva kokuphuma kwabo eGibhithe babengasokwanga.
6 Abako-Israyeli babhoda enkangala okweminyaka engu-40,+ amadoda angamabutho ayephume eGibhithe aze afa wonke ngoba ayengamlalelanga uJehova.+ UJehova wafunga kuwo ukuthi wayengasoze awavumele ukuthi alibone ilizwe+ uJehova athembisa okhokho bethu ukuthi uzasinika lona,+ ilizwe eligeleza uchago loluju.+
7 Esikhundleni sawo+ kwangena amadodana awo njalo yiwo uJoshuwa awasokayo ngoba ayengazange asokwe ngesikhathi besendleleni.
8 Amadoda wonke athi esesokiwe, abako-Israyeli baqhubeka behlala lapho ababekhona aze aphola.
9 UJehova wasesithi kuJoshuwa: “Lamuhla ngilisusile kini* ihlazo laseGibhithe.” Ngakho indawo leyo ilokhu ibizwa ngokuthi yiGiligali*+ kuze kube lamuhla.
10 Abako-Israyeli baqhubeka behlala eGiligali emagcekeni aseJerikho.* Benza iPhasika kusihlwa mhlaka 14 ngenyanga yokuqala.+
11 Ngosuku olwalandela ilanga lePhasika baqalisa ukudla ukudla kwalelolizwe. Badla isinkwa esingelamvubelo+ lamabele akhanzingiweyo.
12 Imana yacina ukuba khona ngelanga abako-Israyeli+ abadla ngalo ukudla kwalelolizwe njalo kabaphindanga bayidla futhi. Ngalowomnyaka+ baqalisa ukudla ukudla kwaseKhenani.
13 UJoshuwa wathi eseseduze leJerikho wathi uthi mehlo suka wabona indoda+ imi phambi kwakhe iphethe inkemba.+ Wasesiya kuyo wafika wayibuza wathi: “Ungowethu yini kumbe ungowezitha zethu?”
14 Yona yaphendula yathi: “Ngize lapha ngoba ngiyinduna yebutho likaJehova.”+ UJoshuwa uthe ekuzwa lokho wazilahla phansi wathi mbo ngobuso, wasesithi kuyo: “Inkosi yami ifuna ukuyitshelani inceku yayo?”
15 Induna yebutho likaJehova yaphendula uJoshuwa yathi: “Khipha amanyathela akho ngoba indawo omi kuyo ingcwele.” UJoshuwa wahle wenza njalo.+
Amabala angaphansi
^ NgesiHebheru, “izingqamu zamatshe.”
^ NgesiHebheru, “uphinde usoke amadodana ako-Israyeli okwesibili.”
^ NgesiHebheru, “izingqamu zamatshe.”
^ Ibizo leli litsho ukuthi, “Uqaqa lwamajwabu.”
^ Kumbe, “ayengaya empini.”
^ NgesiHebheru, “ngiligiqele khatshana lani.”
^ Ibizo leli litsho ukuthi, “Ukugiqela khatshana.”
^ Kumbe, “enkangala yeJerikho.”