IVangeli Elabhalwa NguMathewu 11:1-30
11 UJesu wathi eseqedile ukutshela abafundi bakhe abangu-12 okwakumele bakwenze, wasuka waya kwamanye amadolobho ukuze ayefundisa futhi atshumayele kuwo.+
2 UJohane wathi esejele+ wezwa ngemisebenzi kaKhristu, wasethuma abafundi bakhe+
3 ukuthi bayembuza bathi: “Unguye yini ozayo kumbe kufanele silindele omunye?”+
4 UJesu wabaphendula wathi: “Hambani liyetshela uJohane elikubonayo lelikuzwayo:+
5 Iziphofu sezibona,+ izigoga sezihamba, abalobulephero+ bayahlanjululwa, izacuthe sezisizwa, abafileyo bayavuswa futhi abayanga batshelwa izindaba ezinhle.+
6 Uyathokoza lowo ongasitholiyo isizatho sokukhubeka ngami.”+
7 Abafundi bakaJohane bathe sebesukile, uJesu waqalisa ukukhuluma labantu ngoJohane esithi: “Lasuka lisiyabonani enkangala?+ Umhlanga ophetshulwa ngumoya?+
8 Pho lalisiyabonani? Indoda egqoke izembatho ezibutshelezi?* Phela abagqoka izembatho ezibutshelezi basezindlini zamakhosi.
9 Manje lalisiyabonani? Umphrofethi yini? Ye, ungumphrofethi sibili futhi uqakatheke kulabo bonke abaphrofethi.+
10 Nguye okubhalwe ngaye ukuthi: ‘Ngithuma isithunywa sami phambi kwakho, sizalungisa indlela yakho wena ungakafiki!’+
11 Ngiqinisile ngithi kini, kwabazelwe ngabesifazana akukabi loyedwa omkhulu kuloJohane uMbhabhathizi, kodwa omncane eMbusweni wamazulu mkhulu kulaye.+
12 Kusukela ezinsukwini zikaJohane uMbhabhathizi kuze kube khathesi, abantu bebezama ngamandla wonke ukuthola uMbuso wezulu futhi labo abaphikelelayo bayawuthola.+
13 Phela bonke abaPhrofethi kanye loMthetho baphrofetha kwaze kwafika uJohane.+
14 Kungelani ukuthi liyakukholwa yini lokhu kumbe alikukholwa, yena nguye ‘u-Elija okwathiwa uzabuya.’+
15 Olendlebe kalalele.
16 “Isizukulwane lesi ngingasifanisa lobani?+ Sifanana labantwana abancane abahlezi emakethe, abamemeza abadlala labo
17 besithi: ‘Silitshayele ifluthi kodwa alizange ligide, sakhala kodwa alizange litshaye izifuba zenu lilila.’
18 UJohane laye kadli futhi kanathi kodwa abantu bathi, ‘Uledimoni.’
19 INdodana yomuntu yona iyadla njalo iyanatha+ kodwa abantu bathi, ‘Khangelani! Indoda eyisihwaba, ephilela ukunatha iwayini lengumngane wabathelisi lezoni.’+ Lanxa kunjalo, ukuhlakanipha kukhanya ngemisebenzi yakho* ukuthi kulungile.”+
20 Waqalisa ukusola amadolobho ayefike wenza kuwo izimangaliso zakhe ezinengi ngoba abantu bakhona babengaphendukanga. Wathi:
21 “Maye kuwe Khorazini! Maye kuwe Bhethisayida! Ngoba aluba izimangaliso ezenzakala kini zazenzakale eThire leSidoni, ngabe abantu balapho kudala baphenduka bagqoka izembatho zamasaka futhi bahlala emlotheni.+
22 Kodwa ngithi kini, okuzalehlela ngoSuku Lokwahlulela kuzabe kunzima kakhulu kulalokho okuzakwehlela iThire leSidoni.+
23 Lawe Khaphenawume,+ uzaphakanyiselwa ezulwini yini? Hatshi! Uzakwehlela engcwabeni+ ngoba aluba izimangaliso ezenzakala kuwe zazenzakale eSodoma, ngabe ilokhu ikhona kuze kube lamuhla.
24 Kodwa ngithi kuwe, okuzakwehlela ngoSuku Lokwahlulela kuzabe kunzima kakhulu kulalokho okuzakwehlela idolobho leSodoma.”+
25 Ngalesosikhathi uJesu wathi: “Ngikudumisa phambi kwabo bonke Baba, Nkosi yezulu lomhlaba ngoba izinto lezi uzifihlele abahlakaniphileyo labafundileyo, waziveza ebantwaneni abancane.+
26 Awu Baba, le yiyo indlela ofuna kube yiyo.”
27 UJesu waqhubeka wathi: “UBaba usengiphe zonke izinto.+ Akulamuntu oyazi ngokugcweleyo iNdodana ngaphandle kukaBaba,+ futhi kakho omazi ngokugcweleyo uBaba ngaphandle kweNdodana lalowo iNdodana efuna ukumveza kuye.+
28 Wozani kimi lina lonke elikhatheleyo lelisindwayo, ngizaliphumuza.*
29 Thwalani ijogwe lami lifunde kimi ngoba ngimnene futhi ngithobekile enhliziyweni.+ Lingenza njalo lizathola ukuphumula
30 ngoba ijogwe lami lilula, lomthwalo wami awusindi.”
