IVangeli Elabhalwa NguMathewu 22:1-46
22 UJesu waphinda wakhuluma labo esebenzisa imizekeliso wathi:
2 “UMbuso wezulu ungafaniswa lenkosi eyalungisela indodana yayo idili lomtshado.+
3 Yasithuma izinceku zayo ukuthi ziyebiza ababenxuswe emtshadweni, kodwa bona bala ukubuya.+
4 Yaphinda yathuma ezinye izinceku yathi, ‘Tshelani abanxusiweyo lithi: “Sengilungisile ukudla, ngihlabe inkunzi zami lezinye izifuyo zami ezinonileyo, konke sekulungile. Buyani edilini lomtshado.”’
5 Kodwa abazange babe lendaba, omunye wasuka waziyela emasimini akhe, omunye waya ebhizimusini yakhe.+
6 Abanye bona babamba izinceku zenkosi bazikhahlameza bazibulala.
7 “Inkosi yazonda yabila, yasithumela amabutho ayo afika abulala labo ababebulele izinceku zayo atshisa ledolobho labo.+
8 Yasisithi ezincekwini zayo, ‘Idili lomtshado selilungile kodwa ebengibanxusile bebengafanelanga ukuba sedilini lami.+
9 Ngakho hambani emigwaqweni ephuma edolobheni. Loba ngubani elizamthola limnxuse edilini lomtshado.’+
10 Lakanye izinceku zaphuma zaya emigwaqweni zafika zabiza bonke ezazibathola, abalungileyo labangalunganga. Indawo okwakutshadelwa kuyo yagcwala abantu ababenxusiwe.
11 “Inkosi ithe isizokhangela izethekeli zayo yabona enye indoda eyayingagqokanga isembatho somtshado.
12 Yasisithi kuyo, ‘Ndoda, ungene njani lapha wena ungelasembatho somtshado?’ Indoda le yaswela ukuthi iphendule ithini.
13 Ngakho inkosi yathi ezincekwini zayo, ‘Mbopheni izandla lenyawo limphosele phandle emnyameni. Yikho lapho azakhalela khona atshayanise amazinyo.’
14 “Banengi abanxusiweyo kodwa balutshwana abakhethiweyo.”
15 AbaFarisi basebesuka bayabumba icebo lokumthiya ngamazwi akhe.+
16 Ngakho bathuma abafundi babo kanye labalandeli bakaHerodi+ kuye, bafika bathi: “Mfundisi, siyakwazi ukuthi wena uhlala ukhuluma iqiniso lokuthi ufundisa iqiniso ngendlela kaNkulunkulu. Kawenzi izinto uhlose ukuthabisa abantu ngoba awukhangeli ukuthi umuntu ulesikhundla bani.
17 Ngakho sitshele, ubona njani? Kusemthethweni* yini ukubhadala umthelo* kuKhesari kumbe hatshi?”
18 Kodwa uJesu esazi inhloso yabo embi wathi kubo: “Lingilingelani lina bazenzisi?
19 Ngitshengisani imali yomthelo.” Bamphathela udenariyu.*
20 Wasesithi kubo: “Ngumfanekiso kabani lo futhi libizo likabani elibhalwe lapha?”
21 Bathi kuye: “NgokukaKhesari.” Yena wathi kubo: “Ngakho buyiselani okukaKhesari kuKhesari, kodwa okukaNkulunkulu kuNkulunkulu.”+
22 Bathi besizwa lokho bamangala, bamtshiya bahamba.
23 Ngalelolanga kwafika abaSadusi ababesithi abafileyo abasoze bavuswe,+ bambuza bathi:+
24 “Mfundisi, uMosi wathi: ‘Nxa indoda ingafa ingelabantwana, umfowabo kufanele atshade lomkayo ayizalele abantwana.’+
25 Manje kwakulamadoda ayisikhombisa ayizelamani. Endala yatshada kodwa yafa ingelamntwana, umkayo wasala ethathwa ngumfowabo.
26 Kwaba yiso leso kweyesibili lakweyesithathu kwaze kwayafika kweyesikhombisa.
27 Ekucineni owesifazana lo laye wafa.
28 Manje phakathi kwamadoda la ayisikhombisa, uzakuba ngumkabani nxa sekuvuswa abafileyo? Phela wayeke waba yinkosikazi yawo wonke.”
29 UJesu wabaphendula wathi: “Lilahlekile ngoba aliyazi iMibhalo futhi aliwazi amandla kaNkulunkulu.+
30 Ekuvukeni kwabafileyo, amadoda awathathi labesifazana abendi. Bonke bayabe sebenjengezingilosi ezulwini.+
31 Mayelana lokuvuswa kwabafileyo, alikaze likubale yini okwatshiwo nguNkulunkulu kini, ukuthi:
32 ‘NginguNkulunkulu ka-Abrahama loNkulunkulu ka-Isaka loNkulunkulu kaJakhobe’?+ UnguNkulunkulu wabaphilayo hatshi owabafileyo.”+
33 Abantu bathi besizwa izinto ayebafundisa zona bamangala kakhulu.+
34 AbaFarisi bezwa ukuthi uJesu wayebaqume imilomo abaSadusi, basebebambana labo baba liqembu elilodwa.
35 Omunye wabo owayeyisazi soMthetho wambuza umbuzo emlinga, wathi:
36 “Mfundisi, yiwuphi umlayo oqakatheke kulayo yonke eMthethweni?”+
37 Yena wathi kuye: “‘Kumele uthande uJehova* uNkulunkulu wakho ngenhliziyo yakho yonke langomphefumulo* wonke langengqondo yonke.’+
38 Lo yiwo umlayo oqakatheke kulayo yonke njalo yiwo owokuqala.
39 Owesibili ohambelana lawo ngothi: ‘Kumele uthande umakhelwane wakho ngendlela ozithanda ngayo.’+
40 Wonke uMthetho+ labaPhrofethi kusekelwe emilayweni le emibili.”
41 AbaFarisi bathi belokhu besabuthene uJesu wababuza wathi:+
42 “Lithini ngoKhristu? Uyindodana kabani?” Bathi kuye: “NgekaDavida.”+
43 Wasebabuza wathi: “Pho kungani uDavida ephefumulelwe+ wambiza ngokuthi Nkosi? Phela wathi,
44 ‘UJehova* wathi eNkosini yami: “Hlala esandleni sami sokudla ngize ngibeke izitha zakho ngaphansi kwenyawo zakho.”’+
45 Manje nxa uDavida embiza ngokuthi Nkosi, uyindodana yakhe njani?”+
46 Akulamuntu owenelisa ukumphendula. Kusukela ngalelolanga kakho owaba lesibindi sokumbuza futhi.
Amabala angaphansi
^ Kumbe, “Kuqondile.”
^ Kukhanya umthelo lo kwakumele ubhadalwe ngumuntu ngamunye.
^ Khangela iSengezo ku-B14.
^ Khangela iSengezo ku-A5.
^ Khangela iNgcazelo Yamabala.
^ Khangela iSengezo ku-A5.
