UZefaniya 1:1-18
1 Nanti ilizwi likaJehova elafika kuZefaniya* indodana kaKhushi, indodana kaGedaliya, indodana ka-Amariya, indodana kaHezekhiya ngesikhathi uJosiya+ indodana ka-Amoni+ eyinkosi yakoJuda:
2 “Ngizathanyela ngiqede konke okusemhlabeni,” kutsho uJehova.+
3 “Ngizatshabalalisa abantu lezinyamazana,Ngitshabalalise izinyoni lenhlanzi zolwandle,+Lezinto ezikhubayo*+ kanye lalabo abenza okubi,Ngizasusa abantu emhlabeni,” kutsho uJehova.
4 “Ngizakwelula isandla sami simelane loJuda
Labo bonke abahlala eJerusalema,Ngizasusa konke okukaBhali+ okuseleyo endaweni le,Lebizo labaphristi babonkulunkulu bezizweni kanye labaphristi bamanga,+
5 Lalabo abakhothama bephezu kwezindlu bekhonza ibutho elisemazulwini,+Labakhothama befunga ukuthi baqotho kuJehova,+Ngapha befunga lokuthi baqotho kuMalikhamu,+
6 Lalabo abaphambukayo bayekele ukulandela uJehova+Labangamdingiyo uJehova, labangabuziyo kuye.”+
7 Thula phambi kweNkosi Enkulu uJehova ngoba usuku lukaJehova luseduze.+
UJehova uselungise umhlatshelo, usebangcwelisile labo abanxusileyo.
8 “Ngosuku lomhlatshelo kaJehova ngizakwahlulela* izikhulu,Lamadodana enkosi+ kanye labo bonke abagqoke izigqoko zezizweni.
9 Ngalelolanga ngizakwahlulela* bonke abama phambi kwesihlalo sobukhosi,*Abagcwalisa indlu yenkosi yabo ngodlakela lobuqili.
10 Ngalolosuku,” kutsho uJehova,“Kuzazwakala umsindo wokukhala egedini lenhlanzi,+Lomkhosi esigabeni esitsha sedolobho,+Lomsindo omkhulu wokufohloza ozavelela emaqaqeni.
11 Hlabani umkhosi zakhamizi zeMakhitheshi,*Ngoba bonke abathengisayo sebebhuqwe baphela,*Bonke abakala isiliva babhujisiwe.
12 Ngalesosikhathi ngizahlolisisa iJerusalema ngezibane,Ngizajezisa bonke abanganaki lutho abathi enhliziyweni zabo,‘UJehova kasoze enze okuhle njalo kasoze enze okubi.’+
13 Bazathathelwa inotho yabo lezindlu zabo zidilizwe.+
Bazakwakha izindlu kodwa abasoze bahlale kuzo,Bazahlanyela amasimu amagilebisi kodwa kabasoze balinathe iwayini lawo.+
14 Usuku olukhulu lukaJehova seluseduze!+
Seluseduze futhi luza ngokuphangisa okukhulu!*+
Umsindo wosuku lukaJehova uyesabeka.+
Ngalelolanga iqhawe lizahlaba umkhosi.+
15 Lolosuku lusuku lolaka,+Usuku lokuhlupheka losizi,+Usuku lwesiphepho lokubhidlika,Usuku lobumnyama obukhulu,+Usuku lwamayezi lomnyama owesabekayo,+
16 Usuku lokukhala kophondo kanye lomsindo wokuhlasela kwempi,+Emadolobheni avikelwe ngemiduli lasemiphotshongweni esemakhoneni.+
17 Ngizabangela ukuhlupheka ebantwini,Bazahamba njengeziphofu,+Ngenxa yokuthi bonele uJehova.+
Igazi labo lizathululwa njengothuli,Lenyama yabo* njengobulongwe.+
18 Isiliva sabo legolide labo akusoze kubavikele ngosuku lolaka lukaJehova,+Umhlaba wonke uzaqothulwa yikuvutha kolaka lwakhe,*+Ngoba bonke abahlala emhlabeni uzabatshabalalisa ngendlela eyesabekayo.”+
Amabala angaphansi
^ Ibizo leli litsho ukuthi, “Lowo ofihlwe nguJehova.”
^ Lapha kungabe kutshiwo izinto kumbe imisebenzi ephathelane lokukhonza izithombe.
^ Kumbe, “ngizajezisa.”
^ Kumbe, “ngizajezisa.”
^ Kumbe, “eplathifomu.” Kungabe kuyiplathifomu eyayilapho okwakulesihlalo sobukhosi.
^ NgesiHebheru, “bathulisiwe.”
^ Kungenzakala ukuthi indawo le yayiphakathi kweJerusalema eduze legedi lenhlanzi.
^ Kumbe, “ngesiphangiphangi.”
^ NgesiHebheru, “Lamathumbu abo.”
^ NgesiHebheru, “ngomlilo wokutshiseka kwakhe.”
