Emazweni amanengi intengo yezinto ezinjengokudla, izigqoko lendawo yokuhlala iqhubeka iqansa. Lokhu sokubangele ukuthi impilo ibe nzima kwabanengi okugoqela laboFakazi bakaJehova. Kodwa kulokuthi ubunzima lobu bubaqede amandla oFakazi baduduzwa yikwazi ukuthi uJehova ‘kasoze azitshiye’ izinceku zakhe. (KumaHebheru 13:5) UJehova ulokhu esigcina isithembiso lesi. Wakwenza lokhu laselizweni lePhilippines elilabantu abanengi abaswelayo. Ngeminyaka yabo-1970 kusiya kubo-1980 izinto zazinzima kakhulu elizweni leli.

 Omunye udade okuthiwa nguVicky a uthi: “Kwezinye izikhathi ngangize ngikhale ngoba sasiyabe singelakho ukudla okweneleyo, silerayisi, isawudo lamanzi kuphela.” Omunye umfowethu okuthiwa nguFlorencio wayedinga umsebenzi kodwa engawutholi. Uthi: “Ngangilamayembe amathathu lamabhulugwe amathathu kuphela. Impahla lezi yizo engangizigqoka nxa ngisiya emihlanganweni yebandla lasemihlanganweni emikhulu.” Kuyini okwabanceda ukuthi baqinisele ebunzimeni lobu futhi baqhubeke bekhonza uJehova bethembekile? Isibonelo sabo singasinceda njani nxa izimo zethu zingatshintsha sizithole sesiphakathi kobunzima?

 Abafowethu labodadewethu basePhilippines babengathandabuzi ukuthi uJehova uzabanakekela ngalesosikhathi esinzima. (KumaHebheru 13:6) Lakanye wakwenza lokhu futhi kwezinye izikhathi wayekwenza ngendlela ababengayikhangelelanga. Ngokwesibonelo, omunye udade okuthiwa nguCecille uthi: “Ngelinye ilanga ekuseni sathi sesipheke inkomitsho yokucina yerayisi, mina lomkami labantwabethu ababili sasingasakwazi ukuthi sizakudlani. Sathandaza kuJehova simcela ukuthi asiphe ukudla kwalelolanga. Sathi sisadla irayisi esasiyiphekile kwafika omunye umzalwane esiphathele irayisi engamakhilogramu amahlanu. Zehla zodwa ezenjabulo futhi sambonga uJehova ngalokho ayesenzele khona. Sasihlala sisibona isandla sikaJehova.”

 Abafowethu labodadewethu baphinda basebenzisa lokuhlakanipha okuseLizwini likaNkulunkulu. (IZaga 2:6, 7) Ngokwesibonelo, omunye udadewethu okuthiwa ngu-Arcelita, owayengatshadanga futhi esanda kubhabhathizwa wayezithola nzima izinto zokuziphilisa. Yikho wathandaza kuJehova emtshela konke okwakumkhathaza wasecabangisisa ngamazwi akuZaga 10:4 athi: “Izandla zevila zibangela ubuyanga, kodwa izandla zokhutheleyo ziletha inotho.” Amazwi la amenza wazimisela ukulima. Uthi: “UJehova wayibusisa imizamo yami ngoba ngasengisenelisa ukuthola ukudla okweneleyo futhi okunye engangikulima ngangikuthengisa ukuze ngithole imali yokugada.”

 Abazalwane babengelamali yokuthenga indawo zokwakha amaWolu oMbuso. Kodwa lokhu akuzange kubenze bayekele ukulalela umlayo wokuhlangana ndawonye. (KumaHebheru 10:24, 25) Badinga ezinye indlela zokwakha indawo zokukhonzela. Ngokwesibonelo, omunye udade okuthiwa nguDeborah uthi: “Iqembu lethu elalilabantu abayisithupha lalingenela kokuyindlu okuncane esasikwakhile lomunye udade engangiphayona laye. Sasebenzisa imihlobo etshiyeneyo yezihlahla zelala ukuthi sakhe imiduli njalo siyifulele, sasesisenza izitulo ngezigodo zakhona.”

 Izikhathi ezinengi abafowethu labodadewethu babengenela imihlangano ezindlini zabazalwane. Udadewethu okuthiwa nguVirginia uthi: “Indlu yethu yayenziwe ngotshani lemizi eqatha. Yikho ngoMgqibelo sasikhipha impahla ukuze sivule indawo yokuthi abafowethu bangene imihlangano ngelanga elilandelayo.” Umfowethu okuthiwa nguNoel uthi: “Indlu esasingenela kuyo yayinethela, yikho nxa izulu lalisina sasifaka amabhakede ukuze sikhongozele amanzi. Lokhu kwakungasikhathazi kangako ngenxa yokuthi sasikholisa ukukhonza uJehova sindawonye labafowethu labodadewethu.”

 Lanxa abafowethu babeswela baqhubeka bekhuthele ekutshumayeleni. Udade okuthiwa nguLindina ohlala esihlengeni seNegros uthi: “Imuli yangakithi yayinkulu futhi ubaba nguye yedwa owayesebenza, yikho kwezinye izikhathi sasiyabe singelamali yokugada nxa sisiya ekutshumayeleni sicine sikhasabula ngenyawo. Lanxa kunjalo sasikukholisa ukuya ekutshumayeleni ngoba sasiyabe sibanengi futhi sasikwazi ukuthi imizamo esiyenzayo iyamthokozisa uJehova.”

 Obunye ubunzima abafowethu ababehlangana labo ngobokuyatshumayela ezindaweni ezikhatshana futhi ezilezintaba ngoba kwakunzima ukuthola imota eziya khona. Udade okuthiwa ngu-Esther, ohlala esihlengeni okuthiwa yiLuzon uthi: “Iqembu lethu elalibantu abangu-6 kusiya ku-12 lalihle lisuke ekuseni ngoba kwakumele sihambe umango omude. Sasitshona ilanga lonke sisekutshumayeleni yikho sasihle sihambe sithwele umphako esasiwudla sihlezi emthunzini wezihlahla. Lanxa abanye abafowethu labodadewethu babengelamphako babengayekeli ukubuya ekutshumayeleni. Sasisithi kubo: ‘Lingakhathazeki ukudla esilakho kuyasenela sonke.’”

 UJehova wayibusisa sibili imizamo yethu. Ngokwesibonelo, ePhilippines ngabo-1970 kwakulabamemezeli abangu-54 789. Kodwa ngo-1989, inani leli laseliqanse layafika ku-102 487. Ngo-2023, besekulabamemezeli abangu-253 876.

 Lanxa abafowethu babedonsa nzima baqhubeka belokhu bekhuthele ekukhonzeni. Umfowethu okuthiwa ngu-Antonio uthi: “ Lanxa sasiswela saqhubeka simthanda uJehova.” Udade okuthiwa nguFe Abad uthi: “Lanxa sasithwele nzima, mina lomkami saqhubeka simkhonza kuhle uJehova. Sasisuthiseka ngokuphila singelazinto ezinengi. Lokhu kwanceda labantwabethu ukuthi bafunde ukuqakatheka kokuthembela kuJehova.”

 Udadewethu okuthiwa nguLucila, ohlala esihlengeni okuthiwa yiSamar uthi: “Nxa sikhonza uJehova siyenelisa ukuthokoza lanxa siswela. Nxa singaqakathekisa ukukhonza uJehova, asisoze sizikhathaze ngezinto ezinengi kodwa sizasuthiseka ngokulutshwane esilakho. Okungithokozisa kakhulu yikubona abantu engangifunda labo iBhayibhili bethuthuka ekukhonzeni futhi abanye babo besiba ngamaphayona njengami.”

 Siyakwazi ukuthi sizahlangana lobunzima esikhathini esizayo yikho kumele sihlale sikhumbula amazwi akhulunywa ngumdala webandla okuthiwa nguRodolfo, wathi: “Iminyaka yabo-1970 kusiya kubo-1980 yayinzima kakhulu kodwa ngasibona isandla sikaJehova empilweni yami. Lanxa ngangilemali encane ngangingaziboni njengomuntu oswelayo kumbe ohlupheka kakhulu futhi uJehova wayehlala engipha engangikudinga. Ngiyayikholisa impilo njalo ngikulindele ngabomvu “ukuphila koqobo” emhlabeni omutsha.—1 KuThimothi 6:19.