Abafundi BeBhayibhili abacina sebesaziwa ngokuthi ngoFakazi bakaJehova baqalisa ukutshumayela eMexico ngo-1917. Abantu beMexico badume ngokuba lomusa lokwamukela kuhle abantu bemzini. Eminyakeni eyalandelayo, abantu abanengi abalenhliziyo eziqotho baqalisa ukukhonza uJehova. Ngempi Yomhlaba Yesibili, uhulumende weMexico wayengasasivumeli ukuthi sisebenzise loba yisiphi isakhiwo esisikhethileyo ukuze sikhonze uJehova.

 Ngalesosikhathi umthetho weMexico wawusithi zonke inkonzo kwakumele zenzelwe ezakhiweni zikahulumende. Lokhu kwakuluhlupho sibili ngoba imihlangano yethu emikhulu sasiyenzela endaweni zomphakathi, kuthi imihlangano yebandla eyenziwa maviki wonke siyenzele ezindlini zabanye oFakazi njalo sasitshumayela emigwaqweni lasendlini ngendlu.

 Ukuze silandele umthetho lo, ngo-1943 sabhalisa njengenhlanganiso enceda umphakathi ingakhangelelanga ukuthola inzuzo. Sasinceda abantu ngokubafundisa ukuze babe lenhlalakahle. Lokhu kwasinceda ukuthi sibe lamalungelo aphiwa inhlanganiso ezinceda umphakathi hatshi ukuthi saziwe njengenkolo. Khathesi sasesilemvumo yokwenza imisebenzi yethu kuloba yisiphi isakhiwo, kungaba ngesikahumende loba esinye nje.

 Inhlelo zethu zazifundisa abantu emphakathini futhi zibanceda kakhulu. Lokhu yikho okwenza sayiphiwa imvumo le ngoba lathi sasisenza khona kanye okwenziwa zinhlanganiso ezinceda umphakathi. (KwabaseRoma 13:1) Kodwa lokhu akutsho ukuthi isifiso sethu sokuncedisa abantu ukuthi bafunde iBhayibhili sasesitshintshile. (U-Isaya 48:17, 18) Kungakayi ngaphi sananzelela ukuthi uJehova wayelubusisa uhlelo lolu ngoba lwanceda ukuthi abantu abanengi bafunde iqiniso.

 Umsebenzi ebesiwuqakathekisa kakhulu eMexico ngowokutshumayela izindaba ezinhle zoMbuso kaNkulunkulu. Kodwa lathi njengomphostoli uPhawuli kwasekumele sitshintshe indlela esasitshumayela ngayo ukuze ivumelane lezimo. (1 KwabaseKhorinte 9:20-23) Ngokwesibonelo, ngesikhathi uPhawuli ese-Ariyophagu ekhuluma lamadoda ase-Athene, kazange aqambe umbhalo othile. (ImiSebenzi 17:22-31) Lathi sasesitshumayela singelamaBhayibhili njalo singaqambi amavesi engxoxweni zethu.

 U-Isabel uthi: “Nxa sasizethula ebantwini sasibatshela ukuthi singamalunga enhlanganiso enceda umphakathi. Izikhathi ezinengi ngangisebenzisa izihloko eziku-Vukani! ngoba zazingakhulumi ngeBhayibhili ngokuqondileyo.” Kodwa kuthiwani nxa umninimuzi wayefuna ukufunda okunengi ngoNkulunkulu? Sasihle simfundise iqiniso eliseBhayibhilini. U-Aurora uthi: “Njengoba sasingathwali amaBhayibhili, kwakumele sibambe imibhalo eminengi ngekhanda.” Abantu esasibatshumayeza babesilalela nxa sasibafundisa sisebenzisa awabo amaBhayibhili.

 Sasikulungele ukuphendula loba ngubani owayezasibuza ukuthi umsebenzi wethu wokutshumayela usemthethweni yini. (KwabaseFiliphi 1:7) Kanti njalo kulamakhadi ayeluncedo kakhulu esawaphiwa nguhulumende ayesivumela ukuthi senze umsebenzi wethu. a UMaria uthi: “Sasithwala amakhadi ayesayinwe ngumabhalani kamphathintambo obona ngenhlalakahle yabantu elizweni.” USamuel uthi: “Kwakusithi nxa abomthetho bengasimisa bebuza ukuthi senzani, sihle sibatshengise amakhadi ethu.”

 Amakhadi la ayesinceda kakhulu nxa abantu sebesiphikisa. Ngokwesibonelo, uJesús owake wahlala esabelweni seJalisco uthi: “Ngelinye ilanga ngo-1974 iqembu elalikhokhelwa ngomunye umphristi lalifuna ukumisa umsebenzi wethu yikho lathatha mina lomunye umfowethu kanye lomkakhe lasisa kuziphathamandla ezazikhangele idolobho lelo. Satshengisa iziphathamandla lezo amakhadi ethu, zasezisiyekela sazihambela. Ngemva kwalokho sasesisenelisa ukutshumayela sikhululekile ukuze sincedise labo abafuna ukufunda iBhayibhili. Sikhuluma nje sekulamabandla amanengi endaweni leyo.”

 Njengoba sasiyinhlanganiso enceda abantu emphakathini, sasibafundisa ukubala lokubhala mahala. b U-Ariel uthi: “Uhlelo lolu lwafika ngesikhathi sibili. Phela ngaleyominyaka abantu abanengi babengafundanga kodwa babelesifiso esikhulu sokubala iBhayibhili. Yikho sasisithi singabafundisa ukubala lokubhala, abanengi babo bahle baqalise ukufunda lathi iBhayibhili.”

 URuth wathi: “Babesithi nxa bengafunda ukubala, bathuthuke okumangalisayo ekufundeni kwabo iBhayibhili. Ukwazi ukubala lokubhala kwakubenza bathokoze njalo bazizwe bengabantu emphakathini. Sazibonela ngawethu bethuthuka besiba ngabangane bakaJehova.”

 Kusukela ngo-1943 kusiya ku-1993, oFakazi bakaJehova babebhaliswe njengenhlanganiso enceda umphakathi. Ngaleyominyaka sancedisa abantu abedlula 127 000 ababengafundanga ukuthi benelise ukubala lokubhala futhi sancedisa abedlula 37 000 ukuthi bathuthukise indlela ababebala ngayo lababebhala ngayo. Izikhulu zikahulumende zasincoma kakhulu ngomsebenzi lo esasiwenza. (KwabaseRoma 13:3) Ngokwesibonelo ngo-2010 saphiwa isicoco ngoba ‘sasisebenze nzima sifundisa abantu abanengi ukubala lokubhala okweminyaka eminengi ukuze bathuthukise impilo zabo.’

 Indlela esasibhalise ngayo emthethweni yabangela ukuthi silungise izindawo zethu zokukhonzela zibe njengamaklasi njalo zasizibiza ngokuthi ngamawolu okufundisa abantu izinto ezinceda umphakathi. Yikho esasisenzela khona imihlangano yethu yebandla futhi sifundisa labantu ukubala lokubhala.

 U-Ángela uthi: “Amawolu la ayesezindlini zabazalwane ababenganothanga. Indlela abazalwane laba ababesenza ngayo yayihlala ingithinta kakhulu ngoba babezimisela ukuminyana lezimuli zabo ukuze bavule indawo yokungena imihlangano.”

 Ukuzinikela okunjalo yikho okwakufuneka. U-Ángela uqhubeka esithi: “Ngezinye izikhathi kwakusiba labantu abanengi emihlanganweni yebandla okokuthi inengi lethu lalihlala phandle. Nxa sasifuna ukuphendula, sasilunguza emawindini sikhulume. Lanxa kunjalo sasikukholisa ukuba semihlanganweni yebandla.”

 Ukuze abantu bengananzeleli, sasikhuleka futhi sihlabelela phansi. U-Edmundo uthi: “Ngesikhathi senkulumo eyayinceda umphakathi, khathesi esisaziwa ngokuthi yinkulumo kazulu wonke, isikhulumi sasikhuthaza abantu abakhona ukuthi basebenzise lokho okutshiwo liBhayibhili ukuze bathuthukise impilo zabo.” Ngokuhamba kwesikhathi sasingasaqambi amabizo amabhuku eBhayibhili. Manje sasisithini? UManuel uthi: “Kulokuthi sithi iSambulo isahluko 21, amavesi 3 lo-4, sasisithi, ‘Ibhuku lesi-66, 21, 3 lo-4.’” Omunye uFakazi okuthiwa nguMoises laye uthi: “Lokhu kwakusitsho ukuthi kwakumele sifunde ukuthi ibhuku elithile leBhayibhili ngelesingaki ukuze sivule ivesi eyiyo.”

 Indlela inhlanganiso yethu eyayihlelwe ngayo eMexico yayifanana lakwezinye indawo emhlabeni wonke. Lanxa ukukhonza kwethu kwakuvinjelwe, kwakuzikhanyela ukuthi uJehova uyasibusisa. Ngesikhathi sibhalisa njengenhlanganiso enceda umphakathi ngo-1943, kwakulabamemezeli abangu-1 565 eMexico. Ngo-1993 savunyelwa ukubhalisa ngokusemthethweni njengenkolo. Ngalowomnyaka abamemezeli basebengu-366 177 futhi babesebenza nzima okwabangela ukuthi kube lokwanda okukhulu. Kusiyafika u-2021 abamemezeli beMexico basebengu-864 633. Yiziphi izifundo esizithola embalini le?

 Vumelana lokutshintsha kwezimo. Ukuvumelana lezimo kwanceda ukuthi sithole imvumo yokwenza umsebenzi wethu okweminyaka engu-50. UMario uthi: “Ngezinye izikhathi ngangizibuza ukuthi kungani sasingakhonzi uJehova ngendlela efanana labanye abazalwane kwamanye amazwe. Kodwa angizange ngizwe ngitsho loyedwa esola inhlanganiso. Sasingathandabuzi ukuthi nguJehova oyikhokhelayo inhlanganiso le yikho saqhubeka silalela.”

 Gxila emsebenzini kaJehova. UGuadalupe uthi: “Sasikhuthele emsebenzini wokwenza abafundi okokuthi sasingelandaba kangako lezinye izinto. Okwakusijabulisa yikukhonza uJehova. Lokhu yikho okwakuqakatheke kakhulu kithi.”

 Hlala umanyene lamanye amaKhristu. U-Anita uthi: “Lokho esasingavunyelwa ukukwenza nxa sasihlangana njengokuhlabela izingoma zoMbuso, sasikwenza sesisemizini yethu. Okunye esasikwenza ukuze sihlale simanyene yikuzikwejisela ndawonye labafowethu labodadewethu. Ngezikhathi lezo sasixoxa kakhulu ngezinto eziqinisa ukholo.”

 UFlorentino uthi: “Nxa ngikhumbula izikhathi lezo, ngiyazibonela sibili ukuthi yonke into yayisenzakala ngesikhathi esifaneleyo njalo lokho kwakunceda thina. Kungelani lokuthi sasiphikiswa angithandabuzi ukuthi uJehova nguye owayeqondisa izinto.”