Kusukela ngo-1948 kusiya ku-1994, abantu abanengi eSouth Africa babebandlululana kusiya ngombala wesikhumba. a Lokho kwakubangela ukuthi abantu abanengi bangaphathani kuhle. UKallie olikhaladi uthi: “Labanye abantu abangayisibo abamhlophe labo babebandlululana.”

 OFakazi bakaJehova eSouth Africa bayimihlobo eminengi etshiyeneyo. Manje benzani ngesikhathi kulobandlululo elizweni labo? Sifundani kulokho okwenzakala kubazalwane laba?

 Abanye abantu eSouth Africa babetshaya itoyitoyi bephikisana lomthetho kahulumende wokwehlukanisa abantu ngemihlobo. Abanengi balabo ababephikisana lohulumende babebotshwa ikanti abanye babebulawa. Lokhu kwakusenza ukuthi abaphikisi babe lodlakela ngamandla. Kodwa oFakazi bakaJehova babelalela umthetho kahulumende yikho kabazange batshaye itoyitoyi kumbe bazame ukutshintsha uhulumende. Ngokwenza njalo babelingisela amaKhristu akuqala ‘ayezehlisa kuziphathamandla.’—KwabaseRoma 13:1, 2.

 Izikhathi ezinengi oFakazi bakaJehova babebanjwa ngamandla ukuthi bangene kwezombusazwe. Kodwa nxa babengathatha uhlangothi babeyabe sebesekela ezombusazwe ezilodlakela njalo babengacina sebesilwa labafowabo labodadewabo. Ngokwesibonelo uThembsie uthi, “Ngezikhathi zomvukela owabakhona ngo-1976, abafundi abanengi ababesesekhondari babebanjwa ngamandla ukuthi bajoyine ezombusazwe. Abanye bakhona babehamba endlini ngendlu bedinga abafundi ababengabajoyina. Nxa wawusala babengatshisa umuzi wangakini kumbe bakutshaye uze ufe.” Omunye umkhokheli weqembu elaliphikisana lohulumende watshela uFakazi okuthiwa nguTheophilus wathi: “Ungabona sinqoba abamhlophe, sizakubulala ngoba uyalile ukulwela ilizwe lakini.”

 OFakazi eSouth Africa baqhubeka bekhonza kungelani lobunzima obabubangelwa lubandlululo. (KumaHebheru 10:24, 25) Amanye amabandla ayesehluleka ukwakha amaWolu oMbuso ngoba ayengelamali ngenxa yesimo esasikhona. b U-Enver uthi, “Okweminyaka eminengi sasirenta izindawo ezazingekho esimeni esihle. Yikho ubaba wavuma ukuthi imihlangano yebandla ingenelwe ngakithi futhi yayisenziwa kabili ngeviki. Ngezinye izikhathi kwakusiba labantu abedlula 100. Ngemva kwemihlangano, sasikholisa ukuzixoxela lokudla ezimnandi.”

 Abazalwane babesiba lezindlela ezitshiyeneyo zokuqhubeka bekhonza kungelani lobunzima obabubangelwa lubandlululo. Ngokwesibonelo, esabelweni seLimpopo omunye umzalwane omhlophe kwakumele ayekwenza inkulumo emhlanganweni wesiqinti owawulabantu abamnyama kodwa bamncitsha incwadi eyayimvumela ukuthi angene. Yikho wakhulumisana leyinye indoda emhlophe eyayingumnikazi weplazi elalingcelelane lalapho abantu abamnyama ababengenela khona umhlangano. Umhlangano lo wenziwa isikhulumi singale kocingo lweplazi, izilaleli lazo zikwelinye icele.

 Umthetho wawusithi abantu kumele bahlale ezindaweni ezitshiyeneyo kusiya ngokuthi bangumhlobo bani. Lokhu kwakusenza ukuthi insimu yebandla ngalinye ibe lomhlobo owodwa wabantu. OFakazi kwasekumele bavumelane lezimo endleleni ababetshumayela ngayo. Ngokwesibonelo, kwakumele bacabange ngokuthi bazatshumayela njani ezindaweni ezazingajayelanga ukutshunyayelwa. UKrish ongum-India uthi: “Izikhathi ezinengi kwakulezindawo ezazingavunyelwa ukuthi abantu abangasibo abamhlophe balale khona. Yikho sasilala ezimoteni kumbe ngaphansi kwezihlahla. Ekuseni sasivuka siyegezela ezambuzini ezazisemagarajini kodwa kwakulezinye izambuzi ezazibhalwe ukuthi ‘Abamhlophe Kuphela.’ Lanxa kunjalo abamemezeli babekhuthele emsebenzini wokutshumayela emaphandleni futhi bekukholisa ukufundisa abantu abafuna ukufunda.”

 Inani laboFakazi bakaJehova laqhubeka liqansa kungelani lobunzima lobu. Umthetho wokuthi abantu bemihlobo etshiyeneyo bangahlangani wafakwa ngo-1948 futhi ngalesosikhathi kwakulabamemezeli abangu-4 831 eSouth Africa. Ngesikhathi umthetho lo ukhitshwa ngo-1994, inani labamemezeli laseliqanse lafika ku-58 729. Inani leli belilokhe lisanda okokuthi ngo-2021 abamemezeli besebengu-100 112.

 Okweminyaka eminengi oFakazi bakaJehova eSouth Africa babephila elizweni elalidume ngokwehlukanisa abantu ngemihlobo. Lanxa kunjalo basebenza nzima ukuze bakhuthaze abantu bemihlobo etshiyeneyo ukuthi bathandane futhi bamanyane. Bakwenza lokhu ngokubafundisa izimiso eziseBhayibhilini njalo labo babezama ukuzilandela izimiso lezi. (ImiSebenzi 10:34, 35) Kuyakhanya sibili ukuthi babethandana futhi bemanyene lanxa babehanqwe ngabantu abazondanayo.—UJohane 13:34, 35.

 Ngo-1993 oFakazi bakaJehova bangena umhlangano owawulabantu bemihlobo yonke yeSouth Africa. Eyinye indoda edumileyo kwezombusazwe yabona oFakazi beSouth Africa begonana futhi besamukela abanye babo ababevela kwamanye amazwe egcekeni lezindizamtshina. Yathi: “Aluba lathi simanyene njengani, ngabe saziqeda kudala inhlupho esilazo.”