NgeSonto ntambama mhlaka 24 February 1924, isititshi saBafundi BeBhayibhili a esasibizwa ngokuthi yi-WBBR saqalisa ukusakaza. Lwakunjani uhlelo lokuqala olwaphuma emsakazweni lo? Ngobani abalalelayo? OFakazi bakaJehova bazisebenzise njani ezempucuko ukuze baqhubeke besakaza ‘izindaba ezinhle zoMbuso emhlabeni wonke’?—UMathewu 24:14.

 Uhlelo lolu lwaqala ngo-8:30 ntambama futhi lwathatha amahora amabili. Lwalusakazwa estudiyo esasisanda kwakhiwa eStaten Island, eNew York. Umzalwane okuthiwa nguRalph Leffler owayenikwe umsebenzi wokukhangela ukuthi uhlelo lolu luphuma kuhle yini wathi: ‘Wonke umuntu estudiyo wayethabile futhi etshaywa luvalo. Ngangizibuza ukuthi ukhona yini ozalulalela uhlelo lolu. Ngawulayitha umtshina yasuka yahlala, sithemba ukuthi yonke into izahamba kuhle.’

 Umfowethu uVictor Schmidt owayekhethwe ukuthi akhangele ukuthi yonke into ihamba kuhle esititshini lesi waqalisa uhlelo ngokwethula abantu ababezakwenza izinto ezitshiyeneyo njalo bonke babengaBafundi BeBhayibhili. Owaqalayo ngumfowethu owayetshaya iphiyano. Ngemva kwalokho uCora Wellman wahlabela ingoma ethi, “The Ninety and Nine” esekelwe emzekelisweni kaJesu wemvu eyayilahlekile. (ULukha 15:4-7) Kwalandela abantu abatshiyeneyo okuhlanganisa umfowethu uFrederick W. Franz owahlabela ingoma ethi, “The Penitent” elandisa indaba yendodana yolahleko.—ULukha 15:11-25.

 UJoseph F. Rutherford onguye owayekhokhela aBafundi BeBhayibhili ngalesosikhathi, wenza inkulumo yokunikela isititshi lesi esasenzelwe “ukuthuthukisa umsebenzi wombuso kaMesiya.” Wathi: “Njengoba abantu sebephumelele ukwenza ukuthi kube lerediyo, iNkosi ikubone kufanele ukuthi lathi siyisebenzise ukufundisa abantu mayelana lokugcwaliseka kweziphrofetho zayo.”

 Abantu abanengi abahlala enyakatho-mpumalanga ye-United States baluzwa uhlelo lolu lwakuqala. Enye indoda eyaluzwayo uhlelo lolu yayihlala endaweni ekhatshana lesititshi ngamakhilomitha edlula 320 okuthiwa yiMorrisville, eVermont. Yabhala yathi: ‘Ngiyathaba ukulazisa ukuthi uRutherford besimuzwa kuhle kakhulu. Akulalutho esalukhuthayo.’ Leyinye indoda ehlala eMonticello, eFlorida layo yalulalela uhlelo lolu! Kwakuzikhanyela sibili ukuthi isititshi lesi siyabanceda abantu ngoba banengi ababhala izincwadi bebonga.

 Isititshi lesi saqhubeka sisakaza izindaba ezinhle zoMbuso okweminyaka engu-33. b Sasisakaza ikakhulu endaweni ezisenyakatho-mpumalanga ye-United States. Kwezinye izikhathi uhlelo lwe-WBBR lwalusakazwa lakwezinye izititshi besekubangela ukuthi amamiliyioni abantu ase-United States, eCanada lakwezinye izindawo ezikhatshana azwe izindaba ezinhle. Umbiko owaphuma ku-Yearbook of Jehovah’s Witnesses ka-1975 wathi: “Ngo-1933 basebebanengi abantu abalalela izindaba ezinhle kurediyo. Kwasekulezititshi ezingu-408 ezazisakaza emazweni atshiyeneyo futhi kwasekusakazwe izintshumayelo zeBhayibhili ezingu-23 783. Ngalezonsuku inhlelo zeWatch Tower zasezisakazwa ezititshini ezinengi ngesikhathi esifananayo. Abantu endaweni ezitshiyeneyo basebezizwa izindaba ezinhle ezikhazimulisa uNkulunkulu.”

 Ngesikhathi aBafundi BeBhayibhili beqalisa ukusebenzisa i-WBBR, kwakulabamemezeli boMbuso abangaba ngu-1 064 e-United States. Umsakazo werediyo wawunceda iqembu leli elincane ukuthi litshumayeze abantu abanengi. Kusiyafika u-1957 kwasekulabamemezeli boMbuso abangaba ngu-187 762 e-United States labangaba ngu-653 273 emhlabeni wonke. Amanani lawa ayeqansa okuzwayo ngoba abafowethu labodadewethu babekhuthele emsebenzini wokutshumayela endlini ngendlu langezinye izindlela bencedwa yikuqeqetshwa abakuthola emihlanganweni yebandla.

 Intuthuko le eyabakhona yenza abafowethu ababekhokhela ngalesosikhathi bacabangisisa ngokuthi yikuphi okungcono phakathi kokusakaza ngerediyo lokuthi abantu batshunyayezwe ezindlini zabo. Baphetha ngani? Babona kungcono ukuthi bathengise isititshi sethu se-WBBR. Isititshi leso sathengiswa mhlaka 15 April 1957. Kuhlelo lokuvalelisa olwenziwa mhlaka 14, umfowethu uNathan H. Knorr wabuzwa ukuthi kungani basebesithengisa isititshi. Wachasisa ukuthi okwenza inani laboFakazi bakaJehova likhwele kangaka yikuthi batshumayela izindaba ezinhle endlini ngendlu. Waphinda wathi: “I-WBBR ibancedile sibili abantu kodwa sinanzelele ukuthi oFakazi bakaJehova bebesiba banengi kakhulu ezindaweni lapho okungela-WBBR.” Yikho abafowethu bakubona kungcono ukuthi sigxile kakhulu emsebenzini wokutshumayela endlini ngendlu ngoba yiwo owenza abantu abanengi bazwe izindaba ezinhle kulokuthi zisakazwe ngerediyo. Kodwa abantu bakaNkulunkulu abazange bacine khonapho ukusebenzisa ezempucuko ukuthi basakaze izindaba ezinhle. Ngemva kweminyaka eminengi siphinde saqalisa futhi ukusakaza izindaba ezinhle ngezindlela ezintsha.

 Mhlaka 6 October 2014 kwaba lentuthuko emangalisayo enhlanganisweni kaJehova. Kwaqaliswa isititshi se-TV esibizwa ngokuthi yi-JW Broadcasting. Isititshi lesi saboFakazi bakaJehova silenhlelo eziphuma nyanga zonke futhi ungenelisa ukubukela inhlelo lezi ngokungena ku-inthanethi, langokusebenzisa i-JW Library app, kumbe i-satellite dish. c Kodwa kwamanye amazwe abantu bakaJehova balokhu besebenzisa irediyo le-TV. Bakwenza njani lokhu?

 Eminyakeni esanda kudlula inhlanganiso kaJehova isebenzise izititshi ze-TV lerediyo ukusakaza imihlangano eyenziwa iviki ngayinye kanye lemihlangano emikhulu ezindaweni ezilohlupho lwe-inthanethi. Kodwa lokhu ibikwenza isebenzisa izititshi zamanye amakhampani hatshi ezabo. Indlela lezo zokusakaza zincede abantu abanengi ukuthi bafunde iBhayibhili. Ngo-2021 lo-2022, omaneja abanengi bezititshi zerediyo babhalela abafowethu abasegatsheni le-East Africa bebatshela ukuthi abantu abanengi bayabonga kakhulu ngemihlangano abayisakazayo. Abanengi ababelalela imihlangano le eKenya, eSouth Sudan laseTanzania bacela ukufundiswa iBhayibhili.

 Kodwa indlela enkulu oFakazi bakaJehova abayisebenzisa ukusakaza izindaba ezinhle zoMbuso emhlabeni wonke yikutshumayela endlini ngendlu, ukusebenzisa inqola zamabhuku kanye lewebhusayithi yethu i-jw.org. Iwebhusayithi yethu itholakala ngezindimi ezedlula 1 080 futhi inceda labo abafuna ukufunda iqiniso ukuthi benelise ukubala iBhayibhili kanye lamabhuku asekelwe eBhayibhilini mahala. Kanti njalo iwebhusayithi le ilezimpendulo zemibuzo eyake ibuzwe ngabantu mayelana leBhayibhili futhi iyalayela abantu ukuthi imihlangano yebandla yenzelwa ngaphi ezindaweni ezitshiyeneyo. Izindlela zonke lezi zincede ukuthi oFakazi bakaJehova batshumayele izindaba ezinhle ngendlela abangakaze batshumayele ngayo loba nini. Kusegcekeni ukuthi izindaba ezinhle ziyatshunyayelwa “emhlabeni wonke” njengoba nje iBhayibhili latsho.—UMathewu 24:14.