Abantu abanengi lamuhla abaselayo imbeko. Izigulane zitshingela odokotela, oweta bayatshingelwa emakhefa, abantu abasebenza ezindizamtshineni bathwaliswa nzima ngamakhastoma, ikanti abantwana besikolo beyisa ababalisi, babethusele kumbe babahlasele. Abanye abezombusazwe benza izinto ezilihlazo lezitshengisa ukuthi abasahloniphi abanye abantu ikanti abanye bazibona bengcono kulabanye.

 IBhayibhili likwenza kucace ukuthi yiphi indlela eqondileyo yokuziphatha futhi liyasitshela ukuthi kungani abantu bengaselambeko.

 Lamuhla imbeko isililihlo lentwala emhlabeni wonke.

•   Ukuhlolisisa okusanda kwenziwa e-America kutshengisa ukuthi abantu abanengi elizweni lelo bayavuma ukuthi abantu abasahloniphani ngendlela ababesenza ngayo eminyakeni engu-22 edlulileyo.

•   Kokunye futhi ukuhlolisisa okwenziwa ebantwini abangu-32 000 abahlala emazweni angu-28, kutshengisa ukuthi amaphesenti angu-65 abantu laba, bathi abantu abasahloniphani ngitsho lamuhla.

 IBhayibhili lalivele likhulumile ukuthi abantu bazaziphatha ngendlela esibona besenza ngayo lamuhla.

•   ‘Ensukwini zokucina kuzafika izikhathi ezinzima. Ngoba abantu bazakuba ngabazithandayo, labathanda imali, labazigqajayo, labaziqakisayo, labathukayo, labangalaleli abazali babo, labangabongiyo, labangelathando, labalolaka.’—2 KuThimothi 3:1-3, The Holy Bible in Ndebele.

 Ukuze uthole okunengi ngendlela isiphrofetho lesi esigcwaliseka ngayo, bala isihloko esithi “IBhayibhili Laphrofetha Yini Ngalokho Okwenziwa Ngabantu Kulezinsuku?”

 Lanxa abanengi bengaselambeko lamuhla, akhona amamiliyoni abantu ancedwe liBhayibhili ukuthi abelayo. Phela lokho esikutshelwa liBhayibhili ngendlela okumele siziphathe ngayo ‘singakuthemba kuze kube nini lanini.’ (IHubo 111:8) Cabanga ngezibonelo ezilandelayo:

•   Okutshiwo liBhayibhili: “Konke elifuna abantu bakwenze kini, lani kumele likwenze kubo.”—UMathewu 7:12.

   Ingcazelo: Kumele siphathe abanye ngomusa langenhlonipho ngoba lathi sifuna ukuphathwa njalo.

•   Okutshiwo liBhayibhili: “Njengoba selitshiye ubuqili, ngamunye wenu kakhulume iqiniso kumakhelwane wakhe ngoba siyizitho zomzimba munye.”—Kwabase-Efesu 4:25.

   Ingcazelo: Esikwenzayo lesikukhulumayo kumele kutshengise ukuthi singabantu abathembekileyo.

 Ukuze uthole okunengi ngendaba le, sicela ubale okulandelayo:

•   INqabayokulinda elesihloko esithi “Kuyini Okungakunceda Ukuthi Wenze Izinqumo Ezinhle.”

•   Isihloko esithi “Ukuzwisisa Ukuthi Abantu Batshiyene—IBhayibhili Lithini Ngakho?”