Impi ese-Ukraine kanye lokutshintsha komkhathi kulokhu kubangela ukuthi ukudla kuswelakale emhlabeni wonke. Lokhu kwenzakala kakhulu emazweni asathuthuka ngoba abantu abanengi bathwala nzima ukuthola ukudla okwaneleyo.

•   “Ukutholakala kokudla kuphanjaniswa yizimpi, ukutshintsha komkhathi, ukukhwela kwamafutha lokunye okunenginengi.”—U-António Guterres, unobhala jikelele we-United Nations, July 17, 2023.

•   “IRussia yaquma isivumelwano eyayisenze le-Ukraine sokuthi iyabe ithatha ukudla okuvela e-Ukraine. Izingcitshi zicabangela ukuthi lokhu kuzabangela indlala enkulu emhlabeni wonke lokuthi ukudla kuzadura kakhulu emazweni asathuthuka, ikakhulu eNorth Africa laseMiddle East.”—Atalayar.com, July 23, 2023.

 Bala uzwe ukuthi iBhayibhili lithini ngokuswelakala kokudla kanye lalokhu okuzakwenzakala esikhathini esizayo.

•   UJesu wathi: “Isizwe sizavukela isizwe, lombuso uvukele umbuso. Kuzakuba lokuswelakala kokudla.”—UMathewu 24:7.

•   Ibhuku leSambulo lisitshela ngabagadi bamabhiza abane. Omunye umgadi webhiza leli umela impi. Ulandelwa ngomunye umgadi omela indlala ngoba ngesikhathi leso ukudla kuzahlupha ukutholakala njalo kuyabe kudula okuzwayo. IBhayibhili lithi: ‘Ngasengibona nanto ibhiza elimnyama! Owayeligadile wayephethe isikali sokulinganisa esandleni sakhe. Ngezwa okwakuzwakala angathi lilizwi, lisithi: ‘Ilitha eyodwa yengqoloyi ngodenariyu, lamalitha amathathu ebhali ngodenariyu.’—ISambulo 6:5, 6.

 Iziphrofetho lezi eziseBhayibhilini ezimayelana lendlala zigcwaliseka khathesi futhi iBhayibhili lithi lezi ‘zinsuku zokucina.’ (2 KuThimothi 3:1) Nxa ufuna ukuzwa okunengi ngensuku zokucina kanye labagadi bamabhiza abane okukhulunywa ngabo kuSambulo, bukela ividiyo ethi, Izinto Zitshintshe Kakhulu Emhlabeni Kusukela Ngo-1914 njalo ubale lesihloko esithi, “Ngobani Abagade Amabhiza Amane?”

•   IBhayibhili lisinika amacebo angasinceda simelane lezimo ezinzima, ezihlanganisa ukuswelakala kanye lokudula kokudla. Ungathola amanye amacebo esihlokweni esithi “Ungenzani Ukuze Wenelise Ukuphila Ngemali Encane?”

•   IBhayibhili liphinda lisinike ithemba lokuthi izinto zizakuba ngcono. Lisithembisa ukuthi ‘amabele azakwanda elizweni lonke’ lokuthi umuntu ngamunye uzathola ukudla okweneleyo. (IHubo 72:16) Nxa ufuna ukuzwa okunengi ngezithembiso eziseBhayibhilini lokuthi kungani ungakukholwa elikutshoyo, bala isihloko esithi “Ithemba Elimayelana Lekusasa Elingcono.”