HLALA ULINDILE!
Izikhukhula Ezibangela Umonakalo—IBhayibhili Lithini?
Endaweni ezitshiyeneyo emhlabeni, izikhukhula ezidala umonakalo sezithwalise abantu nzima. Nansi imibiko eyakhitshwa ngabezindaba:
‘Esigodlweni seChina kube lezulu elinengi kakhulu elingakaze libe khona eminyakeni engaba ngu-140 eyadlulayo. Amanzi alethwe lizulu leli abe ngamamilimitha angu-744,8 kusukela ngoMgqibelo kusiya ngoLwesithathu.’—AP News, August 2, 2023.
“NgoLwesine bekulilanga lesibili lokuhlasela kwesiphepho okuthiwa nguKhanun eningizimu yeJapan. Isiphepho lesi sibangele izulu elikhulu lelilomoya olamandla futhi sibulele abantu ababili. . . . Kukhangelelwe ukuthi isiphepho lesi silethe izulu elingamamitha afika ku-0,6 ezintabeni zeTaiwan.”—Deutsche Welle, August 3, 2023.
“Izikhukhula ezibe khona ngempelaviki [eNova Scotia] zibangele izulu elikhulu elingakaze libe khona eminyakeni engu-50 eyadlulayo esabelweni se-Atlantic Canada.”—BBC News, July 24, 2023.
IBhayibhili lithini ngakho konke lokhu?
Isibonakaliso ‘sensuku zokucina’
IBhayibhili lithi siphila esikhathini esibizwa ngokuthi ‘zinsuku zokucina.’ (2 KuThimothi 3:1) UJesu wathi ngesikhathi lesi sizabona ‘izinto ezesabisayo’ kumbe izenzakalo ezethusayo. (ULukha 21:11) Ukutshintsha komkhathi okungajayelekanga yikho okubangela ukuthi kube lezikhukhula leziphepho ezinkulu kangaka lokuthi zibe zinengi kangaka.
Okwenza sibe lethemba
IBhayibhili lisitshela ukuthi zonke izinto lezi ezesabisayo ezenzakala khathesi zenza sibe lethemba. Kungani kunjalo? Ngoba uJesu wathi: “Nxa selibona izinto lezi zisenzakala, yazini ukuthi uMbuso kaNkulunkulu ususeduze.”—ULukha 21:31; UMathewu 24:3.
Sekuseduze kakhulu ukuthi uMbuso kaNkulunkulu uqede wonke umonakalo obangelwa yikutshintshatshintsha komkhathi okungajayelekanga.—UJobe 36:27, 28; IHubo 107:29.
Ukuze ufunde okunengi ngokuthi uMbuso kaNkulunkulu uzakwenza njani lokhu, bala isihloko esithi “Who Will Save the Earth?”