HLALA ULINDILE!
Ukuhlaselwa Kwabezombusazwe—IBhayibhili Lithini?
Ukuhlaselwa kwabantu bezombusazwe sekubhahile emhlabeni wonke kulezinsuku.
Abantu basele bethithibele eMexico ngemva kokubulawa kwabantu bezombusazwe abangu-39 langenxa yokwanda kodlakela olubangelwa yisimo sezombusazwe. Lokhu kuphambanise isikhathi sokhetho ebesikhona elizweni leli ngo-2023 kusiya ku-2024.
Kulabantu bezombusazwe abahlaseliweyo esikhathini esisanda kwedlula e-Europe okugoqela lokudutshulwa kuka-prime minister weSlovakia bezama ukumbulala mhlaka 15 May 2024.
Abantu be-United States labo basele beyethukile ngemva kokudutshulwa kukaDonald Trump owayengumongameli welizwe leli bezama ukumbulala mhlaka 13 July 2024.
Kungani kulodlakela olungaka olubangelwa ngezombusazwe? Kambe ukuthi luzake luphele yini? IBhayibhili lithini?
IBhayibhili lithini ngodlakela olukhona kulezinsuku?
IBhayibhili lakhuluma ukuthi “ezinsukwini zokucina” esiphila kuzo abantu abanengi bazathanda udlakela futhi bayabe bengafuni isivumelwano.
‘Ezinsukwini zokucina kuzakuba lezikhathi ezinzima, okunzima ukuphila kuzo ngoba abantu bazakuba ngabangabongiyo, labangathembekanga, labangafuni isivumelwano, labalolaka, labangabathengisi, labalenkani, labazikhukhumezayo.’—2 KuThimothi 3:1-4.
IBhayibhili laphinda latsho ukuthi ensukwini lezi esiphila kuzo kuzakuba lemivukela kanye lokuxokozela kwezombusazwe. (ULukha 21:9, amabala angaphansi) Kodwa okuthokozisayo yikuthi udlakela lokudabukana phakathi ngenxa yezombusazwe kuzaphela.
Ukuphela kodlakela
IBhayibhili likwenza kucace ukuthi uNkulunkulu uzakhipha ohulumende babantu abesefaka owakhe uhulumende osezulwini.
‘UNkulunkulu osezulwini uzabeka umbuso ozabhidliza yonke imibuso le uyiqede du njalo yiwo wodwa ozakuma kuze kube nini lanini.’—UDanyeli 2:44.
UMbuso kaNkulunkulu uzakwenza ukuthi abantu emhlabeni wonke bamanyane njalo baphile ngokuthula.
INkosi yoMbuso lo nguJesu Khristu obizwa langokuthi “nguMbusi Wokuthula” njalo uzakuba leqiniso lokuthi ‘ukuthula akusoze kuphele.’—U-Isaya 9:6, 7.
Sikhuluma nje labo abazabuswa nguMbuso lo sebekufundile ukuphila ngokuthula. Lokhu kubenze bagcwalisa amazwi la athi: “Bazakhanda inkemba zabo zibe yizikali zamakhuba okulima, lemikhonto yabo ibe zingqamu zokuthena izihlahla. Akulasizwe esizaphakamisela esinye inkemba, njalo azisoze ziphinde zifundele ukulwa impi.”—U-Isaya 2:3, 4.
Ukuze uthole okunengi bala isihloko esithi “Kuyini Okuzakwenziwa NguMbuso KaNkulunkulu?” njalo ubukele levidiyo ethi Uyini UMbuso KaNkulunkulu?