IBhayibhili Lithini Ngokuswelakala Kokudla?

KHALISA

“Indlala izaphela du.” Lesi yisifiso abakhokheli bamazwe abalaso ngoba uhlupho lwendlala luhlasele amazwe amanengi. a Kodwa indlala izake iphele yini sibili? IBhayibhili lithini?

IBhayibhili lakhuluma ukuthi ukudla kuzaswelakala

IBhayibhili lathi “ezinsukwini zokucina” okuyizo esiphila kuzo kuzakuba lokuswelakala kokudla. (2 KuThimothi 3:1) UNkulunkulu wasixwayisa ukuthi lokhu kuzakwenzakala kodwa ayisuye okubangelayo. (UJakhobe 1:13) Ake sixoxe ngeziphrofetho ezimbili eziseBhayibhilini.

‘Kuzakuba lokuswelakala kokudla ezindaweni ezehlukeneyo.’ (UMathewu 24:7) Isiphrofetho lesi sitshengisa ukuthi kwakuzaba lendlala endaweni ezinengi. Omunye umbiko owakhitshwa zinhlanganiso ezibona ngokutholakala kokudla wathi: “Balokhu besiba banengi abantu abaswela ukudla okwaneleyo lokwakha umzimba.” b Amamiliyoni abantu emazweni amanengi abakutholi ukudla okwaneleyo futhi kuyadanisa ukuthi abanengi bakhona bacina besifa ngendlala.

“Ngasengibona nanto ibhiza elimnyama! Owayeligadile wayephethe isikali sokulinganisa esandleni sakhe.” (ISambulo 6:5) Esiphrofethweni lesi, ibhiza elimnyama lomgadi walo kumela indlala ekhona kulezinsuku zokucina. c Isikali sokulinganisa esithwelwe ngumgadi webhiza ngesokulinganisa ukudla. Ngesikhathi ibhiza leli ligijima kuzwakala ilizwi lixwayisa abantu ukuthi intengo yokudla izakhwela lokuthi bangadlalisi ukudla. (ISambulo 6:6) Lokhu yikho okwenzakalayo lamuhla ngoba amabhiliyoni abantu asethwala nzima ukuthola ukudla okwakha umzimba.

UNkulunkulu uzakuqeda njani ukuswelakala kokudla?

Izingcitshi ezinengi zithi ukudla okusemhlabeni kuyenela bonke abantu abakhona. Manje kuyini okubangela ukuthi ukudla kuswelakale? IBhayibhili lithi uJehova d uMdali wethu uzalulungisa njani uhlupho lolu?

Uhlupho: Ohulumende abenelisi ukuqeda ubuyanga lokuswelakala kwemali okuyikho okubangela indlala.

Indlela oluzalungiswa ngayo: UNkulunkulu uzasusa ohulumende babantu abesefaka uMbuso wakhe. (UDanyeli 2:44; UMathewu 6:10) Lamuhla abantu abanengi bathwala nzima ukuthola ukudla kodwa kuyabe kunganjalo nxa sekubusa uMbuso kaNkulunkulu. IBhayibhili lithi uJesu Khristu oyiNkosi yoMbuso kaNkulunkulu ‘uzalamulela umyanga okhalela uncedo, alamulele lomuntukuzana kanye laloba ngubani ongelamuntu ongamsiza.’ Liphinda lithi: “Kuzakuba lenala yokudla emhlabeni, amabele azakuba manengi eziqongweni zezintaba.”—IHubo 72:12, 16.

Uhlupho: Izimpi zidala umonakalo omkhulu lokuswelakala kwemali futhi lokhu ngokunye okubangela indlala.

Indlela oluzalungiswa ngayo: “[UJehova] uyaziqeda izimpi emhlabeni wonke, uqamula idandili ephule lomkhonto, atshise izinqola zempi ngomlilo.” (IHubo 46:9) UNkulunkulu uzatshabalalisa zonke izikhali zempi kanye lalabo abayibangelayo. Lokhu kuzakwenza kube lula ukuthi abantu bathole ukudla okwaneleyo. IBhayibhili lithi: ‘Olungileyo uzaphumelela njalo kuzakuba lokuthula kuyo yonke indawo.’—IHubo 72:7.

Uhlupho: Umonakalo obangelwa ngumumo womkhathi otshabalalisa izilimo lezifuyo.

Indlela oluzalungiswa ngayo: UNkulunkulu uzasusa loba yini ephambanisa umumo womkhathi besokusenza ukuthi umhlaba uthele ukudla okwaneleyo kungelalutho oluphambanisayo. IBhayibhili lithi: ‘[UJehova] uyasithulisa isiphepho, amagagasi olwandle athule athi cwaka. Uguqula inkangala ibe ngamachibi alemihlanga, lomhlabathi owomileyo ube yindawo egobhoza amanzi. Abesehlalisa abalambileyo khona ukuze balime amasimu bahlanyele lezihlahla zamagilebisi ezithela izithelo ezinengi.’—IHubo 107:29, 35-37.

Uhlupho: Kulabantu abayizihwaba asebesenza ukudla okuyingozi ikanti abanye bayazithathela ukudla okumele kuphiwe abadubekayo.

Indlela oluzalungiswa ngayo: UMbuso kaNkulunkulu uzasusa bonke abantu abangathembekanga labangamaqili. (IHubo 37:10, 11; U-Isaya 61:8) IBhayibhili lithi uJehova uNkulunkulu uzakwenza ukuthi “abaqiliweyo bahlulelwe kuhle, anike labalambileyo ukudla.”—IHubo 146:7.

Uhlupho: Umnyaka ngamunye ukudla okunengi kakhulu kuyadlaliseka ikanti okunye kubola kungadliwanga.

Indlela oluzalungiswa ngayo: Nxa sokubusa uMbuso kaNkulunkulu wonke umuntu uzathola ukudla okwaneleyo. UJesu wayesiba leqiniso lokuthi ukudla akudlaliswa. Ngokwesibonelo, ngelinye ilanga wenza isimangaliso sokunika abantu abadlula 5 000 ukudla. Kwathi abantu sebedlile, uJesu watshela abafundi bakhe wathi: “Buthani iziqephu eziseleyo ukuze kungadlaliswa lutho.”—UJohane 6:5-13.

UMbuso kaNkulunkulu uzasusa konke okubangela ukuthi kube lendlala emhlabeni. Lokhu kutsho ukuthi bonke abantu abazabe bebuswa nguMbuso lo bazakholisa ukudla okunengi futhi okwakha umzimba. (U-Isaya 25:6) Ukuze uthole ukuthi uMbuso kaNkulunkulu uzakwenza nini lokhu, bala isihloko esithi “UMbuso kaNkulunkulu Uzaqalisa Nini Ukubusa Umhlaba?”

a The 2030 Agenda for Sustainable Development, adopted by all United Nations Member States in 2015.

b Umbiko lo wakhitshwa zinhlanganiso ezilandelayo: Food and Agriculture Organization of the United Nations, the International Fund for Agricultural Development, the United Nations Children’s Fund, the United Nations World Food Programme, and the World Health Organization.

c Ukuze uthole okunengi ngamabhiza amane okukhulunywa ngawo kuSambulo, bala isihloko esithi “Ngobani Abagade Amabhiza Amane?”

d UJehova libizo likaNkulunkulu. (IHubo 83:18) Bala isihloko esithi “Ngubani UJehova?”