Kwathi amabhomba esethule, mina lomama saphuma sayadinga umngane wakhe. Kwasidanisa kakhulu ukuzwa ukuthi watshona ngesikhathi kudubuka amabhomba la. Kungakedluli insuku ezingaki aphinda akhala futhi amasayirini, ubaba wahle wangidobha wangikheritsha ebhayisikilini lakhe watshova ngesiqubu esikhulu sabaleka siphuma edolobheni.

 Impi Yomhlaba Yesibili yabangela umonakalo omkhulu e-Italy futhi ngiyakukhumbula konke engakubona kusenzakala. Lanxa kunjalo okwanginceda kakhulu ukuthi ngibe yilokho engiyikho khona lamuhla yikuba seduze labantu abamaziyo uJehova labamthandayo.

Isipho Sokwazi Iqiniso

 Ngobusika buka-1936 kusasele izinyanga ezilutshwane nje ukuthi ngizalwe, ubaba wayesebenza leyinye indoda okuthiwa nguVincenzo Artusi belungisa iziporo. Lanxa uVincenzo wayengakabhabhathizwa wayelithanda kakhulu iqiniso eliseBhayibhilini. Wayehlala exoxela ubaba izinto eyezifunda eBhayibhilini ngesikhathi bekhipha ungqwaqwane esiporweni.

 Ubaba wahle wananzelela ukuthi uselitholile iqiniso. Yena labanye abalutshwane ababehlala edolobheni lakithi okuthiwa yiFaenza babefuna ukufunda okunengi ngeBhayibhili. Umbuso owawubusa ngalesosikhathi wawungabafuni ngitsho oFakazi, yikho babengenelisi ukungena imihlangano bekhululekile. Abanye babebotshwa lokubotshwa nxa bangatholakala belamabhuku aboFakazi. Abanye oFakazi babevele sebebotshiwe. Ubaba labanye ababefunda iBhayibhili babehlangana emizini ekhatshana ledolobho ukuze bafunde iBhayibhili besebenzisa amabhuku aboFakazi ababelawo. Iviki ngayinye ubaba wayesiba leqiniso lokuthi imuli yethu iyahlangana ntambama ukuze sifunde iBhayibhili.

Isipho Sokuba Labangane Abaqinileyo Ekukhonzeni

 Ngo-1943 oFakazi abanengi ababebotshiwe ngenxa yokholo lwabo bakhitshwa ejele. Omunye wabo kwakungudadewethu ongatshadanga okuthiwa nguMaria Pizzato. Wathi ebuyela ngakibo enyakatho ye-Italy, wadlula ngakithi walala khona mhlalokho. UMaria wayesebenze nzima kakhulu encedisa oFakazi abase-Italy ukuthi bathole amabhuku enhlanganiso lokuthi bathintane legatsha leSwitzerland okuyilo elalikhangela umsebenzi waboFakazi lapha e-Italy. Lanxa uMaria wayekhanya engumuntu odelelekayo nje, wayelokholo oluqinileyo futhi elesibindi. Ngemva kwempi, wayeke avakatshe azosibona eFaenza futhi sasikukholisa kakhulu ukuba laye.

 Omunye futhi udadewethu engangikholisa kakhulu ukuba laye ngu-Albina Cuminetti. Udadewethu lo owayengumfelokazi wayehlala lapho esasingenela khona imihlangano ngesikhathi ngisakhula. Waba liphayona e-Italy ekuqaliseni kweminyaka yabo-1920. Kunengi kakhulu u-Albina angixoxela khona ngomsebenzi waboFakazi owawusenziwa ngeminyaka leyo.

 Wayelamabhuku amanengi ayedindwa yinhlanganiso yethu lokunye nje esasikusebenzisa kudala. Ngelinye ilanga ngabona isipenede esasilesiphambano lomqhele esasigqokwa ngabafundi beBhayibhili (oFakazi bakaJehova babesaziwa ngebizo leli kudala). Ngahleka ngisibona isiphambano lesi ngoba ngasengikwazi ukuthi ukusetshenziswa kwaso kuvela emfundisweni yamanga. U-Albina wakhuluma amazwi engingasoze ngiwakhohlwe. Wangikhumbuza amazwi akuZakhariya 4:10. Wathi kimi: ‘Ungeyisi usuku lwezinto ezincane!’

 Amazwi la angifundisa okunengi. Kwakumele ngibahloniphe aBafundi BeBhayibhili laba lanxa babengakalizwisisi lonke iqiniso. Kwabathathela isikhathi abanye oFakazi e-Italy ukuthi bahambisane lokwasekufundiswa yinhlanganiso ngoba amanye amabhuku ayengatholakali ngolimi lwabo. Lanxa kunjalo uJehova wayekuqakathekisa konke ababekwenza, yikho lami kwakumele ngenze njalo.

 U-Albina wayemdala kulami. Lanxa kunjalo ngangikukholisa kakhulu ukuxoxa laye. Kunengi engakufunda ku-Albina, uMaria lakwabanye odadewethu abakhonza uJehova bethembekile lanxa babehlangana lobunzima. Ngiyababonga kakhulu ngokuba yizibonelo ezinhle kimi.

Isipho Sokusebenza EBhetheli

 Ngo-1955 ngangena umhlangano wesabelo olesihloko esithi “Triumphant Kingdom” owenzelwa eRome. Ngesikhathi somhlangano lo, mina labanye abafowethu labodadewethu ababevela kwamanye amazwe savakatshela eBhetheli. Ngangilokhe ngicabanga ngisithi, ‘Kungaba mnandi ukuthi umuntu azosebenza lapha!’

 Ngabhabhathizwa mhlaka-18 December 1955. Lanxa ngangisasesikolo, ngazimisela ukuthi ngifuna ukuba senkonzweni yesikhathi sonke. Emhlanganweni wesabelo owaba khona ngo-1956 eGenoa kwenziwa isaziso sokuthi kufuneka abantu abazasebenza eBhetheli. Kodwa umzalwane owayemele igatsha wangitshela ukuthi kwakungelasidingo sabodade ngalesosikhathi.

 Ngokuhamba kwesikhathi ngaxoxa lomzalwane okuthiwa nguPiero Gatti, a owayengumbonisi wethu wesiqinti ngalokho engangihlele ukukwenza ekukhonzeni uJehova. Umfowethu lo otshisekayo wangitshela ukuthi wayezabhalela egatsheni ecela ukuthi bangenze ngibe liphayona eliqakathekileyo.

 Kwathi kubuya incwadi evela egatsheni ngazitshela ukuthi ngasengikhethwe ukuba liphayona eliqakathekileyo kodwa kwakunganjalo. Abafowethu babengicela ukuthi ngigcwalise ifomu lokuyasebenza eBhetheli!

 Ngaqalisa ukusebenza eBhetheli ngoJanuary 1958. Ngalezonsuku imuli yeBhetheli yayilabantu abangu-12 nje kuphela. Ngacelwa ukuthi ngisebenze labahumutshi ababili. Kwakulomsebenzi omnengi okwakumele wenziwe khonapho mina ngingakwazi lutho ngokuhumutsha. Kodwa uJehova wangincedisa njalo ngacina sengiwuthanda umsebenzi lo.

 Kungakedluli iminyaka emibili, indlela umsebenzi wokuhumutsha owawusenziwa ngayo yatshintsha ngasengicelwa ukuthi ngibe liphayona. Utshintsho lolu lwalunzima kimi ngoba ngasengikuthanda ukusebenza eBhetheli. Ngokuhamba kwesikhathi ngakwamukela ukuthi lomsebenzi lo omutsha lawo wawuyisipho esivela kuJehova.

Isipho Sabangane Abakhutheleyo Ekutshumayeleni

 Ngaba liphayona eliqakathekileyo mhlaka 1 September 1959 edolobheni leCremona. Ngangiphayona lodadewethu uDoris Meyer owayevela eDenmark. Lanxa wayengamdala kangako kulami, wayeliphayona eliyingcitshi futhi kunengi engakufunda kuye. UDoris wayelesibindi yikho wayengesabi ukutshumayeza loba ngubani. Kwakumele sibe lesibindi sibili ukuze sitshumayele ngoba yithi sodwa esasingoFakazi edolobheni leli.

 UDoris ngamthola esefikile eCremona njalo wayesedinge indawo esasizayibhadalela ukuze singenele kuyo imihlangano. Abaphristi abangamaKatolika bakubona esasikwenza basebezonda kakhulu, baqalisa lokukhuluma kubi ngathi entshumayelweni zabo.

 Ngelinye ilanga sabizwa enkambeni yamapholisa kodwa asizange sivalelwe. Amapholisa asitshela ukuthi njengoba uDoris wayengayisiso sizalwane se-Italy kwakumele asuke eCremona. Wacina ebuyela eDenmark lapho aqhubeka ekhonza uJehova ethembekile.

 Kungakayi ngaphi kwathunyelwa omunye udadewethu ongatshadanga okwakuthiwa nguBrunilde Marchi ukuthi azongincedisa eCremona. UBrunilde wayengumuntu omnene, engumazithulela njalo ekuthanda ukutshumayela. Saqalisa ukufunda labantu abanengi sindawonye njalo abanye bakhona balamukela iqiniso.

 Ngiyambonga uJehova ngokunginika ithuba lokuthi lami ngibe lengxenye encane ekuncediseni abantu abaseCremona ukuthi bathole iqiniso. Sikhuluma nje sekulamabandla amahlanu edolobheni leli.

Kwenzakala Into Engangingayilindelanga

 Kwathi kungakedluli iminyaka emibili ngiseCremona ngafonelwa ngabafowethu ababesegatsheni. Bangicela ukuthi ngibuye eBhetheli ngoba kwakulomsebenzi omnengi wokuhumutsha okwakumele wenziwe. Kwakuzakuba lomhlangano wesabelo owawuzathatha amalanga angu-6 ngoJuly 1961 owawulesihloko esithi “United Worshipers.” Ngathokoza kakhulu ngaswela lokuthi ngibambe ngaphi, ngasengibuyela eBhetheli mhlaka 1 February 1961.

 Sasiphuza ukutshayisa ngenxa yobunengi bomsebenzi kodwa ngangithokoza kakhulu ngoba ngangincedisa ezintweni ezazizasetshenziswa emhlanganweni. Isikhathi sakhona sasigijima, ngabona umhlangano usufikile.

 Emhlanganweni lo kwenziwa isaziso sokuthi INguqulo Yomhlaba Omutsha YamaKhristu YesiGrikhi yayisizahunyutshwa ngesi-Italian. Ngahle ngakubona ukuthi umsebenzi mnengi sibili futhi ngangingalahlekanga. Ngacelwa ukuthi ngiqhubeke ngiseBhetheli. Ngilokhe ngilapha kuze kube lamuhla. Sekudlule iminyaka engu-60 ngilapha!

Ezinye Izipho Eziligugu Engiziphiwe NguJehova

 Esinye isipho engisikholisayo yikuhlala ngingatshadanga. Kodwa ngezinye izikhathi ngangike ngizibuze ukuthi ukuhlala ngingatshadanga yisinqumo esihle yini. Indaba le yayingenza ngikhathazeke yikho ngathandaza kuJehova. Phela yena ungazi ngcono ukwedlula loba ngubani. Ngamcela ukuthi angincedise ngibone okumele ngikwenze.

 UJehova wangincedisa ukuthi ngizwisise amavesi anjengoMathewu 19:11, 12 lo-1 Khorinte 7:8, 38. Ngiyambonga kakhulu ngoba ukuzwisisa amavesi la kungincedile ukuthi ngihlaliseke. Angikaze ngizisole ngesinqumo engasenzayo sokuhlala ngingatshadanga ngoba singinike ithuba lokuthi ngenze okunengi ekukhonzeni uJehova.

 Zinengi intshintsho ezenziwe yinhlanganiso kaJehova engizibone zisenziwa emsebenzini wokuhumutsha. Inhlanganiso iyayisebenzisa sibili ‘impahla yezizwe’ ukuze ithuthukise umsebenzi woMbuso. (U-Isaya 60:5) Intshintsho lezi zenze abantu bakaJehova bamanyana kungelani lokuthi bangaphi. Ngokwesibonelo, ngo-1985 iNqabayokulinda yesi-Italian yayisiphuma ngesikhathi esifananayo leyesiNgisi. Sikhuluma nje kulezihloko lamavidiyo amanengi atholakala ngendimi ezitshiyeneyo kujw.org futhi amanengi akhona aphuma ngesikhathi esifananayo lawesiNgisi. UJehova wenze ukuthi abantu bakhe baqhubeke bemanyene futhi baqhubeke bethola ukudla okubaqinisa ukholo ngesikhathi esifaneleyo.

 UJehova ungibusisile kakhulu. Wanginika ithuba lokuthi ngimkhonze ngiliphayona eliqakathekileyo. Waphinda wagcwalisa lesifiso sami sokusebenza eBhetheli lapho engithole khona abangane abatshiyeneyo. Esinye isibusiso uJehova anginike sona ngesokubona umama ebhabhathizwa eseleminyaka engu-68. Ngisilindele ngabomvu isikhathi sokumbona umama lezinye izihlobo zami zivuswa emathuneni.—UJohane 5:28, 29.

 Okunye engikulindele ngabomvu yikubona indlela uJehova azabusisa ngayo izinceku zakhe emhlabeni omutsha, lapho esenza “zonke izinto zibe zintsha.” (ISambulo 21:5) Nanku engingakuthandabuziyo lakancane: UJehova uzahlala esinika “zonke izipho ezinhle lazo zonke izipho ezipheleleyo.”—UJakhobe 1:17.