INDABA YOKUPHILA | ILANDISWA NGU-UTAPANI VIITALA
Ngenelisa Ukuncedisa Abantu Abangezwayo Endlebeni
Ngathi ngiqala ukuhlangana laboFakazi bakaJehova bangitshengisa isithembiso esiseBhayibhilini esithi ‘indlebe zezacuthe zizavulwa.’ (U-Isaya 35:5) Mina ngazalwa ngingezwa endlebeni yikho angikwazi ukuthi ukuzwa endlebeni kunjani. Yikho isithembiso lesi asizange singithinte. Okwangithinta kakhulu yikubona ukuthi iBhayibhili lithi uMbuso kaNkulunkulu uzaqeda konke ukuphathwa kubi kwabantu, izimpi, ukugula kanye lokufa. Ngokuhamba kwesikhathi ngezwa sengilesifiso esikhulu sokuxoxela abanye abangezwayo endlebeni ngalokho engasengikufundile.
Ngazalwa ngo-1941 futhi sasihlala eVirrat, eFinland. Abazali bami, lezihlobo zami ezinengi labanawami ababili abezwa endlebeni. Sixoxa sisebenzisa ulimi lwezandla.
Ngafunda Izinto Ezimangalisayo EBhayibhilini
Ulimi lwezandla lwalungavunyelwa esikolo engangifunda kuso esasingamakhilomitha angaba ngu-240 usuka ngekhaya. Ngalesosikhathi ezikolo zabantu abangezwayo endlebeni eziseFinland, abantu babebanjwa ngamandla ukuthi bafunde indimi ezikhulunywa ngabantu, bakhangele indebe ukuze bezwe ukuthi kuthiwani. Nxa wawungabanjwa ukhuluma ngolimi lwezandla wawutshaywa kabuhlungu iminwe leyi ize ivuvuke.
Ngathi sengiqedile isikolo ngahamba ekholeji efundisa ngezokulima. Abazali bami babelepulazi yikho kwakumele ngifundele ukulima. Kwelinye ilanga ngathi ngifika ngekhaya ngathola kule-Nqabayokulinda le-Vukani phezu kwetafula. Ubaba wangitshela ukuthi amabhuku la ayechasisa izinto ezimangalisayo eziseBhayibhilini futhi kwakulabantu ababebuya bezobafundisa iBhayibhili. Abantu ababebafundisa iBhayibhili babengalwazi ulimi lwezandla yikho babexoxa labo ngokubhala ephepheni.
Ubaba wangitshela wathi nxa uMbuso kaNkulunkulu usubusa umhlaba uzatshintsha ube lipharadayisi lokuthi abafileyo bazavuswa. Mina ngangifundiswe ukuthi abantu bangafa baya ezulwini. Yikho ngazitshela ukuthi kufanele ukuthi wayengazwisisanga ngoba babengakhulumi laye ngolimi lwezandla.
Abantu ababefundisa abazali bami bathi sebebuyile ngababuza ngalokho engangikuzwe ngobaba. Bangitshela bathi, “Uqinisile uyihlo.” Basebengitshengisa lokho okwatshiwo nguJesu ngokuvuswa kwabafileyo kuJohane 5:28, 29. Bangichasisela ukuthi uNkulunkulu uzabuqeda njani ububi obusemhlabeni lokuthi abantu bazaphila phakade emhlabeni, ukugula sekungasekho futhi sekulokuthula.—IHubo 37:10, 11; UDanyeli 2:44; ISambulo 21:1-4.
Ngangifisa ukufunda iBhayibhili, yikho ngaqalisa ukufunda lomunye uFakazi okuthiwa ngu-Antero. Yena wayesizwa endlebeni kodwa engalwazi ulimi lwezandla. Yikho ngangibhala phansi impendulo yena abesebala abhale eminye imibuzo loba lokho afuna ukukugcizelela. Wayengibekezelela sibili ngoba sasifunda amahora angu-2 iviki ngayinye.
Ngo-1960 ngahamba emhlanganweni wesabelo waboFakazi bakaJehova futhi inkulumo zazitolikwa ngolimi lwezandla. NgoLwesihlanu ntambama kwenziwa isaziso sokuthi abantu babezabhabhathizwa ngelanga elilandelayo. NgoMgqibelo ekuseni ngathatha impahla zami zokubhukutsha lethawulo ngayabhabhathizwa. a Akuhlalanga iminyaka eminengi abazali bami labanawami labo babhabhathizwa.
Abangakithi bonke bacina sebebhabhathiziwe
Ukufundisa Abanye Iqiniso
Ngangifuna ukufundisa abantu abangezwayo endlebeni lokho engasengikufundile futhi ukuze bazwisise kwakumele ngikhulume labo ngolimi lwezandla. Ngaqala ngokufundisa abantu ababehlala edolobheni engakhulela kilo.
Ngemva kwesikhathi ngaya edolobheni elikhulu leTampere. Ngangihamba indlu ngendlu ngibuza ukuthi kungaba labantu abangezwayo yini endlebeni ababaziyo yini. Ngathola izifundo zeBhayibhili futhi ngemva kweminyaka emilutshwane nje eTampere kwasekulabamemezeli abangezwayo endlebeni abedlula 10.
Ngo-1965 ngatshayisana lentombi enhle okuthiwa nguMaire futhi ngemva komnyaka satshada. UMaire walufunda masinya ulimi lwezandla. Wayengumngane okhutheleyo futhi othembekileyo. Sakhonza sonke okweminyaka engu-50.
Ilanga lethu lomtshado ngo-1966
Sathi sesileminyaka engu-2 sitshadile saba lomntwana samnika ibizo elokuthi nguMarko, yena uyezwa endlebeni. Uyasazi isiFinnish ulimi lukanina, lolimi lwezandla lwesiFinnish. UMarko wabhabhathizwa eleminyaka engu-13.
Kwaba labantu abanengi abaqalisa ukungena leqembu lethu lolimi lwezandla eTampere. Yikho ngo-1974 sathuthela edolobheni leTurku ngoba kwakungela oFakazi abasebenzisa ulimi lwezandla. Saqalisa ukungena indlu ngendlu sidinga abantu abangezwayo endlebeni. Ngesikhathi siseTurku ngafunda labantu abangu-12 abacina sebebhabhathiziwe.
Satshumayela E-Estonia, ELatvia LeLithuania
Ngo-1987 uMarko wabizwa eBhetheli. Iqembu lethu lolimi lwezandla eTarku laseliqinile yikho sabona kungcono ukuthi sithuthe siye kwenye indawo.
Ngalesosikhathi izimo zasezivuma ukuthi siyetshumayela e-Eastern Europe. Yikho ngoJanuary 1992 sasuka lomunye umzalwane ongezwayo endlebeni saya eTallinn, e-Estonia.
Safikela komunye udadewethu onguFakazi kaJehova owayelomfowabo ongezwayo endlebeni. Lanxa yena wayekhanya engafuni ukufunda iBhayibhili wasincedisa sathola abanye abantu ababesebenzisa ulimi lwezandla. Ngelanga sizavuka sibuyela wahamba lathi komunye umhlangano owawusenziwa yinhlanganiso yabantu abasebenzisa ulimi lwezandla eTallinn. Safika masinyane sahle safaka omagazini lamabhuku ematafuleni wonke. Abantu bathatha omagazini abangaba ngu-200 lamabhuku angaba ngu-100 futhi abantu abangaba ngu-70 basinika amakheli abo. Sasesiyivulile indlela yokutshumayela ngolimi lwezandla e-Estonia.
Siphakathi kolunye uhambo lwethu lokuyatshumayela
Ngokuhamba kwesikhathi mina lomkami saqalisa ukube sihamba sisiyatshumayela e-Estonia. Sasesingasasebenzi amalanga wonke ukuze sibe ngamaphayona esikhathi sonke. Ngo-1995, sathutha sayahlala eduze leHelsinki ukuze senelise ukuhamba ngesikepe sisiya eTallinn. Sasingacabangi ukuthi sizakholisa kangaka ukutshumayela e-Estonia.
Kwasekulabantu abanengi esasibafundisa futhi abangu-16 bacina bebhabhathiziwe okugoqela lezihlobo zethu ezimbili ezazalwa zingaboni futhi zingezwa endlebeni. Ukuze ngibafundise iBhayibhili ngangibasayinela ngibambe izandla zabo (tactile signing).
Ubunzima esasihlangana labo yikuthi kwakungelamabhuku olimi lwezandla ngalesosikhathi. Yikho ngangiquma amapikitsha emabhukwini ethu besengiwagcina ukuze ngiwasebenzise nxa sengifundisa abantu.
Iwofisi yegatsha leFinland yangicela ukuthi ngiye eLatvia leLithuania ukuze ngiyehlola ukuthi bakhona yini abasebenzisa ulimi lwezandla abangafundiswa iBhayibhili. Savakatshela emazweni lawa izikhathi ezinengi futhi sabancedisa abazalwane laba ukudinga abantu abangezwayo endlebeni. Ulimi lwezandla luyatshiyana kusiya ngelizwe. Yikho ngafunda ulimi lwezandla lwe-Estonia, leLatvia, leLithuania kanye lolusetshenziswa ngabantu beRussia abasemazweni la.
Ngemva kweminyaka engu-8 sitshumayela e-Estonia lakwamanye amazwe, umkami wabanjwa umkhuhlane okuthiwa yi-Parkinson’s disease, yikho kwasekumele sime ukubhoda amazwe sitshumayela.
Uhlelo Lokuncedisa Abangezwayo Endlebeni
Ngo-1997 kwabunjwa iqembu lolimi lwezandla egatsheni leFinland. Mina lomkami sasihlala eduze yikho sasihamba siyencedisa ukuhumutsha amabhuku olimi lwezandla. Sasisebenza lendodana yethu uMarko. Ngokuya kwesikhathi uMarko lomkakhe uKirsi basebehamba beqeqetsha abanye abahumutshi bolimi lwezandla emazweni atshiyeneyo.
Sincedisa ukwenza amavidiyo olimi lwezandla lwesiFinnish
Iwofisi yegatsha yahlela ukuthi abanye abamemezeli emabandleni atshiyeneyo bafundiswe ulimi lwezandla. Lokhu kwanceda kakhulu ngoba sebebanengi abancedisayo ekutshumayeleni lasemihlanganweni futhi abanye benza imisebenzi etshiyeneyo emabandleni.
Ngilokhe Ngilesifiso Sokuncedisa
Ngo-2004 mina lomkami sancedisa ukuthi kubunjwe ibandla lokuqala elisebenzisa ulimi lwezandla lwesiFinnish eHelsinki. Ngemva kweminyaka emithathu ibandla leli laqina futhi laba lamaphayona amanengi akhutheleyo.
Saqala ukuhlela ukuthi siye ebandleni elilabamemezeli abalutshwana. Ngo-2008 sathutha sayahlala eduze leTampere futhi safika sangena leqembu lolimi lwezandla esasingena lalo eminyakeni engu-34 eyayedlule. Ngemva komnyaka, iqembu lelo lakhula laba libandla lesibili lolimi lwezandla eFinland.
Ngalesosikhathi umkhuhlane wawusumqinela umkami. Ngamnakekela waze watshona ngo-2016. Ngiyamkhumbula kakhulu umkami kodwa ngisilindele ngabomvu isikhathi lapho engizambona khona emhlabeni omutsha lapho okuyabe kungasela kugula.—U-Isaya 33:24; ISambulo 21:4.
Lakhathesi isifiso sami sokufundisa abantu abangezwayo endlebeni izindaba ezinhle silokhe sikhona futhi sivutha. Phela umsebenzi lo sengiwenze okweminyaka edlula 60.
a Lapha lwalungakabi khona uhlelo lokuthi abadala baqale babuze labo abafuna ukubhabhathizwa imibuzo.
