Sokuleminyaka edlula engu-10 sisebenzisa inqola zamabhuku ezikhanga abantu enkonzweni yethu. Abantu abanengi emhlabeni wonke sebezazi inqola zethu. Inqola lezi zinhle sibili kodwa ziphinda zibe lula ukusebenzisa. Engxenye lawe uvumelana lomunye udade okuthiwa ngu-Asenata ohlala ePoland owathi, “Inqola lezi zenziwe ngendlela elula kodwa ziyabukeka. Kulula ukuzisebenzisa.”

 Sowake wazibuza yini ukuthi kanti vele inqola lezi zenziwa njani?

 Ngo-2001, iQula Elikhokhelayo lavumela abafowethu labodadewethu eFrance ukuthi bazame indlela ezitshiyeneyo zokutshumayela ezigoqela ukusebenzisa inqola. Bazama inqola ezenziwe ngendlela ezitshiyeneyo. Ngokwesibonelo bazama ukutshintsha izikhwama zempahla lenqola ezisetshenziswa nxa uthenga izinto ezitolo ukuze batshumayele ngazo. Ekucineni igatsha leFrance lakhetha umhlobo wenqola owodwa owawufanele umsebenzi lo futhi wasetshenziswa ngabamemezeli okweminyaka eminengi.

 Abafowethu beFrance bathokoza ngempumela yomsebenzi lo. Yikho ngo-2011 iQula Elikhokhelayo lanika imvumo yokuthi kuzanywe ukutshumayela ngezinqola lamatafula eNew York City e-U.S.A. Amaphayona ayekhethwe ukwenza umsebenzi lo ananzelela ukuthi kunengi okwakukuhle ngenqola lezi okugoqela lokuthi kulula ukuhamba lazo. Aphinda atsho okunye okwakungenziwa ukuze inqola lezi zithuthukiswe. Inqola zokuqala zazenziwe ngamaplanka futhi zazinzima ukuthwala nxa uqansa kumbe usehla amastephisi. Yikho zenziwa zaba lula kodwa zingeke ziwiswe ngumoya. Inqola ezintsha zenziwa zaba lamaviri amakhundlwana ayenza kube lula ukuthi zihambe emigwaqweni emibi. Kanti njalo ngokuya kwesikhathi kwafakwa ibhokisi elincane lokugcinela amanye amabhuku.

 Kwazikhanyela ukuthi ukutshumayela ngenqola kwakulicebo elihle. Yikho ngo-2012 iQula Elikhokhelayo lavumela ukuthi inqola zamabhuku zisetshenziswe emhlabeni wonke. Kwavunyelwana lenye ikhampani ukuthi yenze inqola ezinengi kusetshenziswa izinto ezilula kodwa ezingagugi masinya.

 Kusukela lapho inqola lezi bezilokhu zithuthukiswa kancane kancane. Ngokwesibonelo ngo-2015 kwenziwa umgodla okhanyiselayo phambili wokuvalela izulu. UDina ohlala elizweni leGeorgia uyawuthanda umgodla lo. Uthi, “Amabhuku awasanethwa lizulu ngoba inqola ile-raincoat yayo.” Ngo-2017, kwenziwa amabhakani anamathela wodwa enqoleni. Umzalwane wePoland okuthiwa nguTomasz uthi, “Kuqala kwakuthatha isikhathi ukutshintsha amabhakani ngoba ayenamathiselwa nge-glue. Lawa anamathela wodwa enze kwaba lula kakhulu.” Ngo-2019, kwatshintshwa izinto ezisetshenziswa ukwenza inqola lezi kanye lendlela ezenziwa ngayo ukuze zingaphangisi ukufa.

 Inqola lezi zenziwa yikhampani eyodwa besezithunyelwa emabandleni emhlabeni wonke. Inqola eyodwa ibiza $43 yeMelika kungakafakwa indleko zokuthumela lezinye. Kuze kube namuhla sokusetshenziswe imali edlula amadola angu-16 miliyoni eMelika kuthengwa inqola futhi sokuthunyelwe ezedlula 420 000 emabandleni asemhlabeni wonke.

 Ukuze imali yeminikelo yongiwe inqola lezi zithengwa kanye zizinengi. Kanti njalo nxa inqola ingafa amabandla asengacela izinto eziyabe zifile azilungisele inqola kulokuthenga entsha.

 Abamemezeli emhlabeni wonke bayakukholisa ukutshumayela ngenqola. UMartina ohlala eGhana uthi, “Izikhathi ezinengi nxa sitshumayela yithi esijayele ukulanda abantu. Inqola ngiyithandela ukuthi abantu yibo abakulandayo. Labazidlulelayo bayabona okuthile esilakho.”

 Kwelinye ilizwe e-Africa enye indoda yafika enqoleni yathola amabhuku olimi lwayo. Ngemva kweviki yaphenduka yathi, “Ngiwabalile wonke amabhuku elinginike wona. Okukuwo kuqakathekile kakhulu. Ngizafika ngikuxoxela imuli yami ekhaya.” Umuzi wendoda le wawukhatshana ngamakhilomitha angu-500. Sekudlule inyanga ezimbili yaphenduka yathi, “Abantu esigabeni sakithi bawabalile wonke amabhuku futhi bakukholisile abakubalileyo. Sebefuna ukuba ngoFakazi bakaJehova. Kodwa balemibuzo. Ngokwesibonelo, bayakuzwisisa ukuthi ukubhabhathizwa kutsho ukucwiliswa emanzini. Manje uhlupho yikuthi akulamfula lapho esihlala khona. Kumele sizobhabhathizelwa ngapha yini?” Abamemezeli bahlela ukuthi indoda le ibonane lephayona elikhuluma ulimi lwayo. Kusukela lapho indoda le iyakukholisa ukufunda lephayona leli.

 Kuyathokozisa ukubona inqola zamabhuku zisetshenziswa ukutshumayela “emhlabeni wonke ukuze kube lobufakazi ezizweni zonke.” (UMathewu 24:14) Ivela ngaphi imali yokwenza inqola lezi? Yiminikelo yenu yomsebenzi womhlaba wonke futhi eminengi yakhona liyenza ku-donate.pr418.com. Siyawubonga kakhulu umusa wenu.