UJehova uyakuthanda ukufundisa abantu bakhe. Lokhu yikho okwenza inhlanganiso yakhe ibe lezikolo ezitshiyeneyo eziqeqetsha abantu bakhe ukuze bawenze kuhle umsebenzi abawuphathisiweyo. Esinye sezikolo lezo yiSikolo Sabavangeli BoMbuso (i-SKE). Eminyakeni esanda kwedlula, inhlanganiso ithuthukise lokho okufundwa ezikolo lezi kodwa ayiphelelenga lapho ngoba iphinde yathuthukisa lezakhiwo okufundelwa kuzo. Lokhu kwenzelwe ukuthi kuncede abafundisayo bafundise kuhle besekusithi labafundayo bathole okunengi kumbe bakuzwisise lokhu abakufundayo. Iminikelo yenu isetshenziswa njani ukuze kuthuthukiswe izakhiwo lezi?

 Sekuleminyaka eminengi izikolo zenhlanganiso zisenzelwa emaWolu oMbuso lasemaWolu Emihlangano Emikhulu. Manje kuyini okwenze sakha kumbe salungisisa ezinye izakhiwo ukuze zisetshenziselwe izikolo lezi kuphela? Ake sixoxe ngezizatho ezintathu.

 Kudingeka izisebenzi ezinengi. UChristopher Mavor ongumsizi weKhomithi Yenkonzo yeQula Elikhokhelayo uthi: “Amagatsha amanengi asitshela ukuthi kufunakala abafowethu labodadewethu abanengi ukuze bancedise emsebenzini kaJehova. Ngokwesibonelo, ngo-2019 iwofisi yegatsha yeBrazil yathi kufuneka abafowethu labodadewethu abangaba ngu-7 600 abangene isikolo se-SKE ukuze bayencedisa endaweni ezitshiyeneyo ezikhangelwa ligatsha labo.” Umbiko okhitshwe ligatsha le-United States utshengisa ukuthi kudingeka amaphayona azingcitshi ukuze aqeqetshe abanye ukutshumayela ngezinqola endaweni eziphithizelayo, ukutshumayela lapho okuma khona izikepe lasemajele. Kufunakala labafowethu abanengi ukuze bancedise kuHlangothi Lokudweba Amaplani Lolokwakha (i-LDC) lakumaKhomithi Asebenzelana Lezibhedlela (i-HLC). Labo asebengene isikolo se-SKE bangancedisa emisebenzini le.

 Banengi abafuna ukungena isikolo lesi. Amagatsha amanengi athola izicelo ezinengi kakhulu zalabo abafuna ukungena isikolo se-SKE kodwa ayengenelisi ukubamukela bonke. Ngokwesibonelo, ngomnyaka owodwa nje kuphela igatsha leBrazil lathola amafomu alabo abafuna ukungena isikolo se-SKE adlula 2 500. Kodwa ngenxa yokuthi izakhiwo okungangenelwa kuzo isikolo lesi zilutshwana kakhulu, kwangena abafundi abangu-950 nje kuphela.

 Indawo ezinhle lezeneleyo zokuhlala. Nxa kuyikuthi abafundi bazangena isikolo se-SKE eWolu yoMbuso kumbe eWolu Yemihlangano Emikhulu bajayele ukuhlala ezindlini zabafowethu labodadewethu. Lokhu kujayele ukusebenza kuhle kakhulu emazweni aba lamakilasi amalutshwana umnyaka ngamunye. Kodwa kuba nzima ukuthi abafowethu labodadewethu abahlala emazweni lapho okuba lamakilasi amanengi ngomnyaka bamukele abafundi. Yikho kuba kuhle kakhulu ukuthi emazweni anjalo kube lezakhiwo okungenelwa khona isikolo se-SKE lapho abafundi abenelisa ukuthi bahlale khona.

 Ukwakha isakhiwo esilekilasi eyodwa kuphinde kube lezindlu zabafundisayo lezabafundi abangafika 30 lezinye nje izakhiwo ezidingakalayo kungafuna amamiliyoni amadola aseMelika kusiya ngokuthi isakhiwo leso singaphi.

 Izakhiwo ezisetshenziselwa isikolo se-SKE zijayele ukuba sendaweni ethuleyo kodwa eseduze lalapho okutholakala khona izimota zokuhambisa. Kuphinda kukhangelwe ukuthi isakhiwo lesi sizakuba sendaweni lapho okulabamemezeli abanengi yini abangancedisa kweminye imisebenzi okumele yenziwe esikolo lesi enjengosinakekela lokunakekela imitshina esetshenziswa lapho.

 Izakhiwo lezi zijayele ukuba lama-library, izindawo zokubalela, amakhompiyutha, amaphrinta lokunye nje okudingakalayo. Kanti njalo kuba lendawo yokudlela lapho abafundisayo labafundi abadla khona ndawonye. Kuphinda kube lendawo lapho abangaziphumulela khona lalapho abangaziqeqetshela khona umzimba.

 Indawo okufundelwa kuyo iyalungiswa okuzwayo. Umfowethu uTroy okuHlangothi Lokudweba Amaplani Lokwakha olusemawofisini ethu amakhulu eWarwick, eNew York uthi: “Saxoxisana labafowethu abakuHlangothi Lwezikolo Zenhlanganiso ngokuthi indawo okuzafundelwa kuyo ingafakwani ukuze abafundi bangathwali nzima. Basitshela ukuthi bakhangelele ukuthi ibe nganani, ukuthi izinto ezitshiyeneyo zizafakwa ngaphi, kufuneka amalayithi amangaki, izipika ezingaki, amamayikhi anjani kanye lokunye nje okungafuneka.” Umfowethu uZoltán ongumbalisi we-SKE eHungary uthi: “Kuqala sasingela mamayikhi yikho sasijayele ukucela abafundi ukuthi bakhulumele phezulu nxa bephendula. Kodwa khathesi itafula ngayinye isilemayikhi yikho asisazihluphi ngokucela abafundi ukuthi bakhulumele phezulu.”

 Izakhiwo lezi esezithuthukisiwe zibancede njani abafundisayo kanye labafundi? U-Angela owangena isikolo se-SKE ePalm Coast, eFlorida, e-U.S.A. uthi: “Indawo yakhona itshaya umoya, yonke into nje ihlelwe kuhle. Izindlu esihlala kuzo lendawo esifundela kuyo kwenza sizifundele nje kuhle kungelanto esiphambanisayo.” UCsaba ongumbalisi we-SKE eHungary uthi yena akuthanda kakhulu yikudla bendawonye labafundi. Uphinda athi: “Ngesikhathi sisidla abafundi bayabe bekhululekile ukuzixoxela. Bayasitshela okunengi ngabo lezinto ezenzakale empilweni zabo. Lokhu kuyasinceda ukuthi sibazi ngcono besesisenelisa ukubafundisa ngendlela ezathinta inhliziyo zabo.”

 Ababalisi labafundi bathi izakhiwo lezi esezithuthukisiwe ziyisipho esivela kuMfundisi wethu Omkhulu uJehova. (U-Isaya 30:20, 21) Udadewethu owangena isikolo se-SKE esakhiweni esesithuthukisiwe ePhilippines wathi: “Ukungena isikolo lesi endaweni enhle kangaka kwasikhumbuza ukuthi sasingalandanga ukuzofunda nje kuphela kodwa sasiyizivakatshi zikaJehova eziqakathekileyo. Kuyakhanya sibili ukuthi uJehova ufuna sikukholise ukugebha sijule eLizwini lakhe.”

 Siyenelisa ukwakha, ukulungisisa lokugcina izakhiwo lezi zisesimeni esihle ngenxa yeminikelo yenu eliyenza ku-donate.pr418.com. Siyayibonga kakhulu iminikelo yenu.