Okunye okukholiswe ngoFakazi bakaJehova emhlanganweni wabo wesabelo walonyaka yikubukela ingxenye yokuqala yomdlalo othi UJesu Uletha Izindaba Ezinhle Ebantwini. Amamiliyoni abantu asewubukelile umdlalo lo. Le bekuyingxenye yokuqala phakathi kwengxenye ezingu-18 zomdlalo lo! Kodwa yiwuphi umsebenzi owenziwa ngabafowethu labodadewethu ukuze kusekelwe ukurekhodwa komdlalo lo njalo lawe uwusekela njani?

 Okunengi okutholakala emdlalweni othi UJesu Uletha Izindaba Ezinhle Ebantwini kurekhodelwa egatsheni le-Australasia. a Loba nini nxa kurekhodwa kujayele ukuba labantu abangaba ngu-50 kusiya kwabangu-80. Abafowethu labodadewethu laba bayalungiselwa ukudla kwemini lokwantambama lokunye nje abayabe bekudla phakathi lesikhathi. Kuyahlelwa kuseselesikhathi ukuthi kuzadliwani. Udadewethu okuthiwa ngu-Esther oncedisa kuHlangothi Olukhangela Ngokudla uthi: “Sithenga ukudla endaweni ezitshiyeneyo ngentengo ephansi futhi siba leqiniso lokuthi ukudla lokhu sikuthenga kusesimeni esihle. Siyatshintshatshintsha lokudla esikudlayo ukwenzela ukuthi kungabi khona okudlaliswayo.” Ngokwesilinganiso umuntu ngamunye udla ukudla kwe-$4 b ilanga ngalinye.

 Abantu bonke laba abadingi kudla kuphela kodwa kumele bavikelwe lasekutshiseni kwelanga ngoba e-Australia likhipha inhlanzi emanzini. Lemisebe yakhona iyingozi kakhulu. Yikho kuyafakwa amatende lemitshina yokuqandisa njalo abantu bayaphiwa ama-umbrella, amanzi okunatha kanye lamafutha okugcoba ukuze bazivikele elangeni. UKevin osebenza kuHlangothi Lwe-Audio/Video uthi: “Abafowethu labodadewethu abanengi abasebenza ukurekhoda umdlalo lo basebenza eBhetheli besuka ezindlini futhi basebenza okwamalanga athile ngeviki. Loba yiphi imisebenzi abayiphiwayo bayenza bethokoza njalo bethobekile. Siyaludinga uncedo lwabo ukuze umsebenzi lo uphumelele.”

 Kwezinye izikhathi kuba nzima ukuthi ezinye izingxenye zomdlalo lo zirekhodelwe ewofisini yegatsha kungelani lokuthi kusestudiyo kumbe egumeni leBhetheli. Ezimeni ezinjalo kuyabe sekumele siyerekhodela kwezinye indawo. Ngokwesibonelo nxa sifuna ukurekhoda indawo ezingelantambo zamagetsi, imigwaqo elethara kumbe izindlu zakulezinsuku siyahamba endaweni ezikhatshana ezisemakhaya. Yikho kuyabe kumele kupakitshwe izigqoko zabalingiswa lokunye okunenginengi okuzasetshenziswa ukurekhoda besekuhanjiswa lapho okuzarekhodelwa khona. Kungakaqaliswa ukurekhoda abafowethu abayibo abakhangele amadiphathimenti atshiyeneyo baba leqiniso lokuthi kulamajenaretha, amanzi okunatha ahlanzekileyo kanye lezambuzi ezeneleyo. Abanye abafowethu labodadewethu bahlala ezindlini zabazalwane, abanye emawoteleni kumbe ezimoteni.

 Ukurekhodela kwezinye indawo kuyabiza, kuthatha isikhathi esinengi njalo kutshiya abafowethu labodadewethu bedinwe befile. Yikho ngo-2023 iQula Elikhokhelayo lanika imvumo yokuthi kusetshenziswe imali engange-2,5 miliyoni ukuze kuthengwe i-screen esizasetshenziswa ukurekhodeni. I-screen lesi sakulezinsuku sitshengisa amavidiyo lamapikitsha ohlonzi futhi angenza umuntu akhanye angani usendaweni ezitshiyeneyo kusiya ngokuthi kufunakalani. Lokhu kwenza senelisa ukwehlisa izindleko zokuyarekhodela kweyinye indawo. UDarren olilunga leKhomithi Yegatsha e-Australasia uthi: “Ukusebenzisa i-screen lesi kuyanceda sibili ngoba kwenza labo abarekhodayo bangadinwa yikuhamba besiya kwezinye indawo njalo benelise lokurekhoda kanenginengi. Ngokwesibonelo nxa kumele sirekhode ilanga litshona kuyabe kumele sikwenze masinyane lingakatshoni. Kodwa nxa sisebenzisa i-screen lesi siyenelisa ukufaka umfanekiso welanga litshona besesirekhoda kanenginengi kuze kuphume khona kanye esikufunayo.”

 Nxa kurekhodwa ingxenye ngayinye yomdlalo othi UJesu Uletha Izindaba Ezinhle Ebantwini kuyabe kufunakala abantu abanengi kakhulu. Labo abayabe bebiziwe ukuthi bazoncedisa bathini ngendlela abafowethu labodadewethu ababaphatha ngayo?

 Udadewethu okuthiwa ngu-Amber owahamba amakhilomitha edlula angu-700 esuka ngakibo eMelbourne ukuze ayencedisa kuphrojethi le. Wabhala wathi: “Ngathi ngisanda kwehla nje endizamtshineni, abafowethu labodadewethu abavela eBhetheli bangamukela kuhle kakhulu. Abanengi banginxusa ukuthi ngizokudla labo lokuthi sizikholisele nje. Labantu engasebenza labo ngesikhathi sirekhoda bangenza ngazizwa ngikhululekile futhi ngithandwa. Indlela uJehova angibusisa ngayo yangenza ngabona ukuthi ngangingalahlekelwanga yilutho!”

 Umfowethu uDerek oncedisa ekurekhodeni umdlalo lo yena uthi: “Manengi kakhulu amadiphathimenti abesincedisa selokhu saqalisa ukurekhoda umdlalo lo. Ngiyababonga kakhulu abafowethu labodadewethu abasebenzisa isikhathi sabo, lezinto abalazo kanye lamandla abo ukuze basincedise emsebenzini lo. Konke abakwenzayo bakwenza ngenhliziyo yonke futhi balomusa. Kuyazicacela ukuthi uJehova uyasibusisa sonke. Lokhu kungenza ngibone ukuthi uJehova kaqakathekisi nje kuphela ukuthi umsebenzi uphuma njani kodwa ulendaba lokuthi umsebenzi wakhe siwenza njani.”

 Siyalibonga kakhulu lonke ngendlela elisekela ngayo ukurekhodwa komdlalo lo lisebenzisa iminikelo yenu. Eminengi yakhona liyenza lisebenzisa i-donate.pr418.com.