Ngo-2020 kwaba lengozi zemvelo ezinengi futhi kulapho umkhuhlane weCOVID-19 owaqalisa khona ukuhlasela umhlaba wonke. Kuyini esikwenzileyo ukuze sincedise abafowethu labodadewethu?

 Ngomnyaka wenkonzo ka-2020 a kwaba lengozi zemvelo ezedlula 200, yikho iKhomithi Yabahleli YeQula Elibusayo yasebenzisa imali engange-28 miliyoni dolazi b ukuze kuncediswe abasebunzimeni. Imali le yasetshenziswa ukuncedisa abantu ababehlaselwe yizikhukhula e-Africa, iziphepho, ukuswelakala kokudla eVenezuela laseZimbabwe kanye lomkhuhlane weCOVID-19. Badingelwa indawo zokuhlala, bathengelwa ukudla, amanzi okunatha, izigqoko, imithi lokunye okunenginengi. Kwaphinda kwathengwa lezinto ezazizasetshenziswa ukulungisa kumbe ukwakha kutsha imizi yabo. Ake sixoxe ngezibonelo ezilutshwane.

 Umkhuhlane WeCOVID-19. Umkhuhlane lo ubangele ukuthi abanye abafowethu labodadewethu bagule, bakhathazeke njalo baphelelwe yimisebenzi. Yikho ukuze bancediswe kwabunjwa amaKhomithi Okusiza angu-800 emhlabeni wonke. Amakhomithi la ayehlolisisa okudingwa ngabazalwane abesethumela imibiko kuKhomithi Yabahleli ukuze ibone ukuthi ingabancedisa njani.

 Amakhomithi la asebenze nzima ukuze abafowethu bathole amanzi, ukudla, imithi lezinye izinto abazidingayo. Kwezinye indawo babencedisana labadala bamabandla ukuze babone ukuthi yibaphi abafowethu labodadewethu abangancediswa zinhlelo zikahulumende.

 Abantu abanengi emphakathini bayawunanzelela umsebenzi wethu. Ngokwesibonelo, uField Simwinga ongu-commissioner eNakonde eZambia watshela abafowethu wathi: “Siyalibonga kakhulu ngokuncedisa abantu abehlelwe ngumonakalo endaweni yethu.”

 Indlala E-Angola. Umkhuhlane weCOVID-19 usubangele ukuthi ukudla kutholakale nzima e-Angola futhi sokudula kakhulu. Abafowethu labodadewethu abanengi sebethwala nzima ukuthenga ukudla.

 Igatsha leBrazil lacelwa ukuthi lincedise ngokuthumela ukudla e-Angola. Ukuze kongiwe imali kwahlolisiswa ukuthi ukudla okunengi kwakungathengwa ngaphi ngentengo ephansi lokuthi kwakuzahanjiswa njani kubafowethu. Ukudla komuntu ngamunye kwakungaba ngamakhilogramu angu-20 futhi ukukuthenga lokukuthumela kwakuyi-22 dolazi. Ukudla lokho kwakugoqela irayisi, indumba lamafutha okupheka. Sikhuluma nje sekuthunyelwe amathani okudla angu-654. Ukudla lokhu lokunye okutholakale e-Angola sokuncede abantu abedlula 50 000!

 Abafowethu bathini ngoncedo abalutholileyo? U-Alexandre uthi: “Lokhu kungenza ngingathandabuzi ukuthi uJehova uyangithanda lokuthi angingedwa. Inhlanganiso kaJehova iyangithanda sibili!” Umama okuthiwa nguMariza okhulisa abantwana eyedwa uthi: “UJehova wawuzwa umthandazo wami. Ngiyambonga kakhulu lenhlanganiso yakhe.”

 Ukunceda Abafowethu Abahlaselwe Yindlala EZimbabwe. Ngomnyaka wenkonzo ka-2020 kube lendlala embi kakhulu eZimbabwe ehlasele amamiliyoni abantu. Lokhu kubangele ukuthi izinkulungwane zaboFakazi bakaJehova ziswele ukudla okweneleyo.

 Yikho kwabunjwa amakhomithi okusiza amahlanu ukuze kuncediswe abafowethu bathole ukudla. Abafowethu labodadewethu abanengi bancedisa ngokupakitsha ukudla, ukukufaka ezimoteni ikanti abanye babenikela ngezimota zabo ukuze ukudla lokho kuhanjiswe ezindaweni ezitshiyeneyo. c Ngomnyaka wenkonzo ka-2020 kwasetshenziswa 691 561 dolazi ukuze kuthengwe ukudla okwanceda abantu abadlula 22 700.

 Ngezinye izikhathi ukudla lokho kwakufika abazalwane bevele bengaselakho okokufaka emlonyeni. Yikho babesithi bangakuthola badumise uJehova, abanye baze bahlabele ingoma zoMbuso.

 Kweyinye indawo kulabafelokazi ababili abangoFakazi abaya emhlanganweni owawuhlelwe ngeyinye inhlanganiso ezimele yodwa (NGO) eyayifuna ukuncedisa abantu abehlelwe ngumonakalo. Emhlanganweni lo kwacina sokungena lezombusazwe phakathi, yikho odadewethu babona kungcono ukungabhalisi ukuthola uncedo lolo. Bathi besuka emhlanganweni lo, abantu babahleka baze bathi: “Lingabuyi selizocela ukudla kithi!” Okuthokozisayo yikuthi ngemva kwamaviki amabili nje kuphela, abafowethu babuya lokudla bezonika odadewethu laba. Kodwa lokhuyana okwakuthenjiswe yinhlanganiso enceda abantu kwakulokhu kungakafiki.

 Uhlelo lokuncedisa abafowethu abathwele nzima eZimbabwe lwenze ukuthi uJehova adunyiswe. Isibonelo sikaPrisca ohlala emaphandleni siyakutshengisa lokhu. Lanxa indlala ibhahile, uPrisca unamathela ohlelweni lwakhe lokutshumayela ngoLwesithathu langoLwesihlanu ngitsho langesikhathi sokulima. Abantu babemhleka besithi: “Ungaqhubeka utshumayela uzabulalisa imuli yakho ngendlala.” UPrisca wayebaphendula esithi: “UJehova kakaze abatshiye abantu bakhe.” Kungakayi ngaphi uPrisca wathola ukudla okuvela enhlanganisweni yethu. Omakhelwane bakaPrisca bakunanzelela lokhu basebesithi kuye: “Siyazibonela sibili ukuthi uNkulunkulu wakho kakutshiyanga, sicela usifundise okunengi ngaye.” Khathesi omakhelwane bakaPrisca abayisikhombisa sebelalela imihlangano yebandla esakazwa kurediyo.

 Njengoba sesiphila ekucineni kwensuku zokucina, sizaqhubeka sihlaselwa zingozi zemvelo. (UMathewu 24:3, 7) Siyalibonga kakhulu ngeminikelo yenu eliyenza ku-donate.pr418.com. Izaqhubeka incedisa abafowethu labodadewethu abehlelwe ngumonakalo loba nini nxa bedinga ukuncediswa.