Kulezinsuku zokucina sikhangelele ‘ukuzwa izimpi lemibiko yezimpi.’ (UMathewu 24:6) Okuhle yikuthi abafowethu labodadewethu abathwele nzima ngenxa yezimpi bayaluthola uncedo abaludingayo. Kuvidiyo ethi 2022 Umbiko WeQula Elikhokhelayo #3 satshelwa ngenhlelo ezenziwayo zokuncedisa abafowethu labodadewethu abathwele nzima ngenxa yempi e-Ukraine. Inhlelo lezi zenziwa njani yona impi itshisa kangaka? Lokhu kubancede njani abafowethu labodadewethu abase-Ukraine?

 Mhlaka 24 February 2022, ngelanga impi eyaqalisa ngalo e-Ukraine iKhomithi Yabahleli yahle yanika imvumo yokuthi kusetshenziswe imali ukuze kuncediswe abafowethu labodadewethu elizweni leli. Igatsha lase-Ukraine lahle laqalisa ukuthenga izinto laselizithumela ebantwini lisebenzisa amaKhomithi Okusiza Abehlelwe Ngumonakalo angu-27.

 Ukuze bancedise igatsha lase-Ukraine, abafowethu abasemaWofisini Amakhulu AboFakazi BakaJehova bahle baqalisa ukubonisana ukuthi bangenzani ukuze basize igatsha leli. IKhomithi Yabahleli leKhomithi Yabadindayo yacela uhlangothi olubona ngokuthengwa kwezinto olusemawofisini ethu amakhulu ukuthi lukhulumisane labafowethu abasegatsheni le-Ukraine legatsheni lePoland ukuze kubonakale ukuthi yiziphi izinto ezifunakalayo lokuthi zizathengwa njani. Abafowethu abasegatsheni lePoland lele-Ukraine abakuhlangothi lokuthenga lelokuthumeza labakuhlangothi lwezomthetho kanye lelunga leKhomithi Yegatsha ye-Ukraine babehlangana nsuku zonke ukuze baxoxisane labafowethu abakuhlangothi lwezokuthenga olusemawofisini ethu amakhulu.

 Umfowethu okuthiwa nguJay Swinney okuhlangothi lwezokuthenga olusemawofisini ethu amakhulu uthi: “Kwakumele siqale sibone ukuthi kuyini okwakufanele kuthengwe. Sasifuna ukuthenga izinto abafowethu labodadewethu abazijayeleyo. Kodwa ukuthenga izinto lezi kwakungasohlupho kangako, okwakuluhlupho yikuthi zazizafika njani e-Ukraine njengoba impi isidla ubhedu.

 Kusiyafika umhlaka 9 March 2022 abafowethu basebekwazi ukuthi yiziphi izinto okumele zithengwe. Kwakumele kuthengwe ukudla okuhlanganisa inyama esemagabheni, inhlanzi, irayisi, ibeans, amasepa lamathishu kanye lezinye nje izinto ezitshiyeneyo. Kwakucatshangelwa ukuthi izinto umuntu oyedwa angazisebenzisa okwenyanga yonke zazingaba yi$65 (ngamadola aseMelika.) IKhomithi Yabahleli yavuma ukuthi kusetshenziswe imali enengi ukuze kuthengwe izinto lezo zinikwe abafowethu labodadewethu. Kodwa abafowethu babezazihambisa njani izinto lezo bengafakanga impilo zabo engozini?

 Mhlaka 13 March abazalwane ababili basuka ePoland bethwele impahla ezilutshwana bezisa kweyinye indawo eseduze leLviv e-Ukraine. Lokhu bakwenza ukuze kubonakale ukuthi kuyavuma yini ukuzihambisa nxa sezizinengi. Bengakasuki abazalwane laba, abafowethu abasegatsheni lePoland lele-Ukraine babancedisa ukuthi balungiselele uhambo lwabo. Ngemva kokulungisa amaphepha okuthi abazalwane laba bachaphe ibhoda, igatsha laba leqiniso lokuthi izimota zabo zibhalwe ngokucacileyo ukuthi ngezabantu abayancedisa. Laphinda lathintana labafowethu abase-Ukraine ukuze kubonakale ukuthi yiphi indlela eseduze abazalwane laba ababengayisebenzisa sebechaphile ibhoda. UJehova wawabusisa wonke amalungiselelo la ngoba impahla lezo zafika kuhle e-Lviv futhi ngemva kwamahora angu-24 zasezihanjisiwe kumaKhomithi asiza abehlelwe ngumonakalo njalo abazalwane laba baphenduka ePoland bephephile.

 Lanxa uhambo lolu lwaphumelela, impahla ezahanjiswayo zazilutshwana kakhulu, zazingamakhilogramu angu-1 000 nje kuphela, khona kwakumele kuhambe impahla ezingamakhilogramu angu-200 000 ezazifuneka. Manje impahla ezinengi kangako zazizahanjiswa njani masinyane?

 Abantu abanengi emhlabeni wonke bazimisela ukuncedisa ngemva kokubala ku-jw.org ngalokho okwenzakala kubafowethu labodadewethu abase-Ukraine. Abanengi abahlala khatshana le-Ukraine banikela ngemali besazi ukuthi imali leyo yayizasetshenziswa kuhle ukuncedisa abazalwane. Ikanti abahlala emazweni aseduze banikela ngamandla abo lesikhathi sabo langezinto abalazo ukuze bancedise. Nanzi ezinye izibonelo.”

 Abafowethu labodadewethu abahlala ePoland banikela ngempahla ezinengi kakhulu, ikanti abantwana bona babesenza amakhadi. UBartosz Kościelniak okuHlangothi Lokuthenga egatsheni lePoland uthi: “Ngihlala ngiwubala umbhalo weHubo 110:3 othi abantu bakaJehova ‘bazazinikela ngokuthanda kwabo,’ kodwa ukuzibonela ngawami abafowethu labodadewethu besukumela phezulu ukuze bancedise kwangitshengisa ukuthi aliqiniso sibili amazwi lawa.”

 Omunye uFakazi kaJehova olekhampani yamaroli athwala impahla wavuma ukuthi amaroli akhe asetshenziswe njalo wawafaka lamafutha. Umzalwane lo uthi: “Leli lithuba lokutshengisa ukuthi ngiyamthanda uJehova kanye labafowethu. Kuyangithokozisa ukuthi ngenelisile ukuncedisa.” Wanikela amafutha ezimota angaba ngamalitha edlula 7 700 njalo abafowethu labodadewethu basebenzisa amandla abo lesikhathi sabo betshayela izimota okwamakhilomitha angaba ngu-48 000 ukuze bahambise impahla ezitshiyeneyo.

 Kusiyafika umhlaka 28 March, ngemva nje kwensuku ezingu-15 kuhambe impahla zokuqala, kwasekuthunyelwe impahla e-Ukraine ezingaba ngamakhilogramu angu-100 000. Lokhu kwenzakala ngenxa yokuzimisela kwabafowethu labodadewethu ukuncedisa. Ngenxa yeminikelo eyenziwa ngabafowethu labodadewethu kanye lokwehliselwa intengo lapho esasithenga khona, imali okwakukhangelelwe ukuthi izathenga zonke impahla lezi yacina ingasasebenzanga yonke. Sikhuluma nje oFakazi BakaJehova sebethumele impahla zokuncedisa e-Ukraine ezingakhilogramu adlula 190 000. Impahla lezi zibancedile yini abafowethu labodadewethu abase-Ukraine?

 Ngesikhathi impahla zifika eLviv amaKhomithi Okusiza ahle azihambisa ebantwini ababezidinga kulo lonke elase-Ukraine. Impahla lezo zahanjiswa emadolobheni atshiyeneyo, amanye ayekhatshana leLviv ngamakhilomitha edlula 1 300. Lanxa impahla lezi zahamba kuhle, kwathatha isikhathi ukuthi umsebenzi lo wenziwe. a

 Umfowethu uMarkus Reinhardt olilunga leKhomithi Yegatsha e-Ukraine uthi: “Isikhathi lesi senze abafowethu abanengi bazibonela ngawabo ukuthi uJehova uyabathanda lokuthi kuyanceda ukulandela konke okutshiwo yinhlanganiso yakhe. Ngokwesibonelo, lanxa kungakabi lomonakalo inhlanganiso isikhuthaza ukuthi sihlale silokudla lamanzi okuzasitshova okwamaviki athile. Omunye umdala webandla okuthiwa ngu-Anton oseKyiv wasilandela isiqondiso lesi. Uthi, “Siyayibonga inhlanganiso kaJehova ngoba iyasinceda ukuthi sihlale silungiselele loba yisiphi isimo esingavela. Ukuhlala silokudla lamanzi eneleyo kanye lerediyo kusincedile kakhulu. Kuyasithokozisa kakhulu ukuthi abafowethu labodadewethu basilalela isiqondiso lesi. Lokhu kwanceda ukuthi igatsha lithole isikhathi eseneleyo sokuqoqa impahla zokuyasiza.”

 Abafowethu bezwa njani besamukela impahla lezo? UMykola loZinaida abahlala eKharkiv bathi: “Kuyasiduduza kakhulu ukwazi ukuthi lisithanda kangaka. Siyabonga kakhulu ngokudla lemithi elasithumela yona. Kuyazikhanyela ukuthi uJehova uyasinakekela sibili.” UValentyna ohlala edolobheni elifananayo laye uthi: “Impi yathi iqalisa kwasekulamalayini amade ezitolo. Kwakungalula ukuthenga izinto esasizidinga. UJehova walubona uhlupho lolu, yikho wasebenzisa abafowethu ukuthi bazosinika izinto esizidingayo sisezindlini zethu futhi abasinika khona yikho kanye esasivele sikudinga. Phela nxa izimo sezinzima, sekumnyama phambili yikho lapho obona khona isandla sikaJehova esebenzisa inhlanganiso yakhe. . . . Kuyaluqinisa sibili ukholo lwethu ukumbona esincedisa ngesikhathi esifaneleyo.”

 UYevhen lo-Iryna loMykyta ababalekela impi eMariupol bathi: “Siyabonga kakhulu ngendlela elincedise ngayo imuli yangakithi. Lufike ngesikhathi sibili uncedo lwenu. Sathi sivula amabhokisi sasicabanga ukuthi zimpahla nje elisithumele zona, kodwa sananzelela ukuthi lalisithumele uthando lwenu!”

 Akuthandabuzwa ukuthi uJehova wasebenzisa umoya wakhe ongcwele ukuze abe leqiniso lokuthi labo abathwele nzima ngenxa ‘yezimpi lemibiko yezimpi’ bayathola uncedo abaludingayo. Iminikelo yenu yiyo encede ukuthi lokhu kwenzakale futhi eminengi yakhona liyenza lisebenzisa ingxenye ethi donate.pr418.com. Siyalibonga kakhulu ngeminikelo le.

Ukuhanjiswa Kwempahla Masinyane Langendlela Ephephileyo

1. Mhlaka 24 February 2022: IKhomithi Yabahleli yavuma ukuthi igatsha le-Ukraine lisebenzise imali ethile ukuze lithenge izinto zokuncedisa abehlelwe ngumonakalo

2. Mhlaka 24 February kusiya ku-8 March 2022: Igatsha lase-Ukraine lathenga izinto ezifunekayo laselizinika abeKhomithi Yokusiza ukuze bazidlulisele ebantwini. Igatsha leli laphinda lalungiselela ukwamukela impahla ezazivela ePoland

3. Mhlaka 9 March 2022: IKhomithi Yabahleli yavuma ukuthi impahla ezivela ePoland zihanjiswe e-Ukraine

4. Mhlaka 10 kusiya ku-12 March 2022: Kwenziwa inhlelo zokuthi kuhanjiswe impahla ezilutshwane zisuka ePoland zisiya eLviv, e-Ukraine

5. Mhlaka 13 March 2022: Ukudla kokuqala kwahanjiswa eLviv, e-Ukraine kusuka ePoland

6. Mhlaka 14 kusiya ku-16 March 2022: Izisebenzi ezikuHlangothi Lokwakha zipakitsha impahla okumele zihanjiswe e-Ukraine. Zikwenza lokhu zisewolu yemihlangano emikhulu eseduzane ledolobho lePoznan, ePoland

7. Mhlaka 17 March 2022: Ngemva kwensuku ezine kuthunyelwe impahla zokuqala kwathunyelwa ezinye ezingamakhilogramu angu-12 700 bayazitshiya ebhoda ye-Ukraine

8. Mhlaka 21 kusiya ku-27 March 2022: Kwaqoqwa ezinye impahla ePoland zathunyelwa e-Ukraine zasezihanjiswa ezindaweni ezitshiyeneyo ngemva kwamahora angu-24 zifikile

9. Mhlaka 28 March 2022: Ngemva kwensuku ezingu-20 abafowethu benikwe imvumo yokuthi bahambise ukudla e-Ukraine, kwasekuhanjiswe impahla ezingamakhilogramu angu-100 000

 Sikhuluma nje oFakazi bakaJehova sebethumele impahla zokuncedisa e-Ukraine ezingamakhilogramu adlula 190 000.