“IQula Elikhokhelayo selinqume ukuthi amabandla wonke aqalise ukungena imihlangano emaWolu oMbuso kusukela mhlaka 1 April, kusiya ngokuthi imithetho kahulumende iyavuma yini.” Isaziso lesi esafakwa ku-jw.org ekuqaliseni kukaMarch 2022, sabathokozisa kakhulu oFakazi bakaJehova emhlabeni wonke. Kodwa umkhuhlane weCOVID-19 wawusasekhona. a Kwakuzakwenziwani ukuze abangena imihlangano yethu bavikeleke? Njengoba kwasokuleminyaka emibili singangeni imihlangano mathupha, amaWolu oMbuso ayezabe elokhu esesimeni esihle yini?

 Kwasokulesikhathi abafowethu abaseHlangothini Lokudweba Amaplani Lokwakha belungiselela ukuthi kube lezinto ezidingakalayo ukuze siyengena imihlangano sivikelekile emaWolu oMbuso.

 Ngemva kwenyanga nje kumiswe imihlangano ngomnyaka ka-2020 uHlangothi Lokudweba Amaplani Lokwakha (WDC), oluseWarwick eNew York lwahle lwaqalisa ukuhlola ukuthi umkhuhlane weCOVID-19 wawuzatshintsha njani indlela esisebenzisa ngayo amaWolu oMbuso. Lwahlola lokuthi kwakumele kwenziweni ukuze abantu bavikeleke nxa besendaweni esingenela kuzo imihlangano yethu.

 Izinto ezazidingakala zazitshiyana kusiya ngendawo. UMatthew De Sanctis, osebenza kuhlangothi lweWDC uthi: “Kwamanye amazwe uhlupho yikuthi kuyabe kungelandawo yokugezela izandla. Nxa kungelamanzi eWolu yoMbuso kuyabe kumele athengwe kumbe akhiwe emfuleni loba emthonjeni. Kanti njalo kwamanye amazwe ohulumende bakhuthaza ukuthi kube lemitshina eyenza kuqandelele loba kukhudumale kanye lemitshina engenisa futhi ikhiphe umoya ezakhiweni kuphinde kube lamabhakane akhuluma ngokuthi abantu benzeni ukuze babe lempilakahle lenhlanzeko.”

 Manje abazalwane benzani ukuze izinto lezi ezazidingeka zibe khona emaWolu oMbuso? Umfowethu uMatthew De Sanctis uthi bananzelela ukuthi emaWolu oMbuso amanengi izinto ezazidingeka kwakuyizinto ezilula njalo ezingabizi imali enengi. Ngokwesibonelo ePapua New Guinea, izigubhu zafakwa impompi ukuze abantu bageze izandla. Yizo ezasezisetshenziswa emaWolu oMbuso asemaphandleni njalo kwasetshenziswa amadola eMelika angu-40 kuphela. Kwathengwa lemitshina yokugezela izandla elohlonzi e-Asia edlula 6 000 eyafakwa emaWolu oMbuso e-Africa.

 Kwamanye amaWolu oMbuso kwafakwa loba kwalungisiswa amafeni ukuze kubethe umoya. Amabandla amanengi athenga insimbi zokubambisa ama-microphone ukuze abantu bangazibambeli nxa bephendula. Kwahlelwa lokuthi kuhlale kuklinwa indawo ezihlala zibanjwa ngabantu njengezibambo zezivalo lempompi lapho okungasalela khona amagcikwane. Amanye amabandla afaka impompi ezivuleka zodwa nxa ungafaka izandla ngaphansi kwazo ukuze ugeze izandla ezambuzini. EChile ukwenza utshintsho olwaludingakala eWolu yoMbuso ngayinye kwakubiza imali engaba ngamadola eMelika angu-1 400.

 Lanxa abafowethu babeqakathekisa ukuthi abantu bavikeleke emaWolu oMbuso babefuna lokuyisebenzisa kuhle iminikelo. Ngokwesibonelo, kwamanye amazwe uhulumende wayevuma ukuthi imitshina yokugezela izandla lensimbi zokubambisa ama-microphone kungene kungabhadalanga imithelo futhi lokhu kwanceda ukuthi abafowethu bazithenge zizinengi izinto lezi. Amagatsha anciphisa indleko ngokuthenga izinto ezinengi sikhathi sinye. Abafowethu abasemagatsheni labakuHlangothi Lokuthenga olusemawofisini amakhulu babejayele ukuthenga izinto kulabo abazenzayo futhi lokho kwakusenza bathenge ngemali ephansi njalo baphangise ukuthola izinto abayabe bezithengile.

 Ukulungisiswa kwamaWolu oMbuso kwenza abafowethu labodadewethu bazizwa bevikelekile njengoba sasesivunyelwe ukuphinda sihlangane emaWolu. Udadewethu okuthiwa nguDulcine ohlala ePeru uthi ‘wakhathazeka’ esizwa kuthiwa sesizabuyela emaWolu oMbuso. Uthi “Ngahlaselwa ngumkhuhlane weCOVID-19 usanda kuqalisa ukumemetheka. Yikho ngangingakhululekanga ukuya eWolu yoMbuso ngoba ngangisesaba ukuthi wawungaphinda ungibambe umkhuhlane lo. Kodwa ngathi ngifika eWolu yoMbuso ngananzelela ukuthi kulezinto abadala ababezenzile ukuze sivikeleke. Kwakulendawo zokugezela izandla lensimbi zokubambisa ama-microphone futhi iWolu yayiklinwa imihlangano ingakaqalisi lalapho isiphelile. Konke lokhu kwangenza ngazizwa ngivikelekile sibili.” b

 Udadewethu okuthiwa nguSara ohlala eZambia yena wahlangana lobunye ubunzima. Uthi: “Umkami ubulewe yiCOVID-19 enyangeni ezazisanda kwedlula. Yikho bengikhathazekile ngokuthi kuzakuba njani ukungena imihlangano labanye yena engasekho.” Manje kwahamba njani? Uthi: “Ukuhlangana labafowethu labodadewethu kungenze ngabona ukuthi uJehova ulathi kulezinsuku zokucina. Ngikubonile sibili ukuthi abadala bebandla kanye labafowethu labodadewethu bayangikhuthaza, bayangithanda futhi bayangisekela.”

 Abafowethu labodadewethu emhlabeni wonke bayathokoza ngokuthi sebeqalisile ukungena imihlangano emaWolu oMbuso. Siyayibonga iminikelo yenu. Eminengi yakhona liyenza ku-donate.pr418.com. Iminikelo yenu isincede ukuthi indawo zokukhonza kweqiniso zibe ngezivikelekileyo njalo abantu bahlaliseke nxa bekuzo.