Nxa singahlela ukwenza okunengi ekukhonzeni siyabe siwasebenzisa kuhle amandla ethu. (1Kr 9:26) Ukuhlela esingakwenza ekukhonzeni kuzasinceda sisisebenzise kuhle isikhathi esincane esiseleyo ukuphela kungakafiki. (Efe 5:15, 16) Ekukhonzeni kwenu kwemuli, lingahlela lokho elifuna ukukwenza ngomnyaka wenkonzo ka-2023. Ugwalo lomhlangano lolu lulezihloko ezikhuluma ngezinto elingahlela ukuzenza elingacabanga njalo likhuleke ngazo.—Jak 1:5.

Ngokwesibonelo, lingancedisa yini omunye emulini yenu ukuthi abe liphayona lesikhathi sonke? Nxa ubona angani awusoze wenelise ukufikisa amahora afunekayo, xoxa lamaphayona alezimo ezifanana lezakho. (Zag 15:22) Lingaxoxa lephayona ekukhonzeni kwenu kwemuli. Ngemva kwalokho bhala phansi amalanga lezikhathi ongatshumayela ngazo. Nxa wake waphayona kudala, cabangisisa ngokuthi izimo ziyakuvumela yini ukuthi uphinde uphayone.

Bakhona yini emulini yangakini abangaba ngamaphayona asizayo okwenyanga eyodwa loba inyanga ezithile? Nxa ungaqinanga emzimbeni, ungaba liphayona elisizayo ngokutshumayela okwesikhatshana ilanga ngalinye. Nxa ungenelisi ukutshumayela phakathi kweviki ngenxa yomsebenzi kumbe isikolo, ungakhetha inyanga eleholideyi kumbe elempelaviki ezinhlanu. Bhala kukhalenda ukuthi uhlela ukuba liphayona elisizayo ngaziphi inyanga njalo ubhale uhlelo lwamalanga lezikhathi ozatshumayela ngazo.—Zag 21:5.

BUKELANI IVIDIYO ETHI WOBA LESIBINDI . . . NXA ULIPHAYONA, BESELIPHENDULA IMIBUZO ELANDELAYO:

• UJehova wamnakelela njani udade Aamand? Lokhu kusifundisani?