Sicela usitshele ukuthi wakhula njani.

Ngazalelwa e-Italy ngo-1943. Mina labanewethu labodadewethu sakhulela esigabeni esincane futhi ubaba wayengumlimi njalo engumbazi. Abazali bethu babeyithanda isonto yamaKatolika futhi babefuna lathi siyithande.

Kuyini okwenza wakhetha ukuba ngumphristi?

Ngisasemncane ngangikuthanda ukulalela abaphristi befundisa esontweni. Ngangiyithanda indlela ababekhuluma ngayo kanye lemikhuba yamaKatolika ababeyenza. Yikho lami ngazimisela ukuba ngumphristi. Ngathi sengileminyaka engu-13 umama wangihambisa e-boarding school lapho abafana ababefundiswa khona izinto ezazizabanceda nxa sebefundela ukuba ngabaphristi.

Ukuqeqetshwa kwenu kwakugoqela lokufunda iBhayibhili yini?

Angeke ngitsho njalo. Sengileminyaka engu-15 omunye wababalisi bami wanginika iBhayibhili elalilamaVangeli kuphela. Ngalibala kanengi iBhayibhili lelo. Sengileminyaka engu-18 ngahamba ngayaqhubeka ngemfundo yami yobuphristi kwamanye amayunivesithi ayeqondiswa nguPapa. Ngafunda isiLatin, isiGreek, ezembali, ezenkolo, ifilosofi, kanye lendlela ingqondo yomuntu esebenza ngayo. Lanxa sasiwabamba ngekhanda amanye amavesi eBhayibhili futhi sisizwa libalwa entshumayelweni yangesonto, sasingakaze silifunde sibili.

Waphiwa isikhundla sokuba ngumphathi. Lokho kutsho ukuthi wawubafundisa yini abanye?

Ngingathi umsebenzi wami wawungowokuqondisa izinto. Kodwa ngangike ngifundise abanye ngemithetho eyakhitshwa emhlanganweni we-Second Vatican Council.

Kuyini okwakwenza waqalisa ukuthandabuza okwakufundiswa yisonto yamaKatolika?

Ngangihlutshwa yizinto ezintathu. Okokuqala, isonto le yayingenela kwezombusazwe. Okwesibili, abakhokheli besonto le babeziphatha kubi lamanye amalunga ebandla futhi akulamuntu owayelendaba lakho. Okwesithathu, kulezinye izimfundiso zamaKatolika ezazikhanya zingaqondanga. Ngokwesibonelo kungenzakala njani ukuthi uNkulunkulu olothando ahlukuluze abantu ababi kuze kube phakade nxa bangafa? Kanti futhi uNkulunkulu uyafuna yini ukuthi siphindaphinde imithandazo sisebenzisa i-rosary. *

Manje wenzani?

Ngathandaza ngikhala ngicela ukuthi uNkulunkulu angiqondise. Ngathenga i-Jerusalem Bible yeKatolika elalisanda kuphuma ngolimi lwesi-Italian futhi ngaqalisa ukulibala. Ngelinye ilanga ngeSonto ekuseni kwafika amadoda amabili. Kwakungemva kokudla isidlo futhi ngangisanda kukhipha iyunifomu yami yesonto. Bangitshela bathi bangoFakazi bakaJehova. Saxoxa okwesikhathi eside ngeBhayibhili kanye lokuthi lithi inkolo yeqiniso ikhanya njani.

Wacabangani ngabo?

Ngathanda indlela ababeqiniseka ngayo lokuthi babesithi ngibale amavesi ngisebenzisa elami iBhayibhili lamaKatolika. Ngokuhamba kwesikhathi omunye uFakazi okuthiwa nguMario waqalisa ukungivakatshela. Wayebekezela futhi zikhathi zonke ngoMgqibelo ekuseni wayengayekeli ukubuya lanxa sekutheni. Wayefika atshaye ibhera ngo-9.00.

Abanye abaphristi bacabangani ngalokho?

Ngangibabiza nxa sesifunda kodwa babengakuqakathekisi ukufunda iBhayibhili. Kodwa mina ngangikukholisa. Ngangizithanda izinto engangizifunda. Ngokwesibonelo ngafunda ukuthi kungani uNkulunkulu evumela ububi lokuhlupheka into engasengilesikhathi eside ngizibuza yona.

Abakhokheli benu bake bazama yini ukukwekelisa ukufunda iBhayibhili?

Ngo-1975 ngahamba eRome kanengi ngisiyabachasisela imibono yami. Abakhokheli bami bazama ukungenza ngitshintshe engangikucabanga kodwa akula owasebenzisa iBhayibhili ukuze angenze ngitshintshe. NgoJanuary 9 1976 ngabhala incwadi yokuvalelisa esontweni yamaKatolika. Ngemva kwamalanga amabili, ngasuka esikolo leso, ngagada isitimela ukuze ngiyengena umhlangano waboFakazi bakaJehova okokuqala futhi kwakungumhlangano wesiqinti owawugoqela amabandla amanengana. Yonke into eyayisenziwa lapho yayitshiyene lalokho engangikujayele. Wonke uFakazi owayelapho wayeleBhayibhili futhi evula amavesi ehambisana lesikhulumi.

Abangakini bacabangani ngakho konke lokhu?

Abanengi bangiphikisa okuzwayo. Kodwa ngezwa ukuthi omunye umnewethu wayefunda iBhayibhili laboFakazi bakaJehova eLombardy esabelelweni esisenyakatho ye-Italy. Yikho ngamvakatshela futhi oFakazi bakhonale bangincedisa ukuthi ngithole umsebenzi lendawo yokuhlala. Ngalowomnyaka ngabhabhathizwa ngaba nguFakazi kaJehova.

Uyazisola yini?

Ngitsho lakancane! Khathesi sengiseduze kakhulu loNkulunkulu ngoba kunengi esengikwazi ngaye okusekelwe eBhayibhilini hayi emasikweni esonto kumbe kulokho okucatshangwa ngabantu. Khathesi sengisenelisa ukufundisa abanye ngileqiniso ngalokho engikutshoyo.