1. UDavida wathini ngokuthobeka kukaJehova?

KAMBE singatsho sibili ukuthi uJehova uthobekile? Ye. UDavida wake wathi: “Unginikile lesihlangu sosindiso lwakho, lokuzithoba kwakho kungikhulisile.” (2 Sam. 22:36, TBS; Hubo. 18:35) Kungenzakala uDavida wabhala amazwi lawo ecabanga ngesikhathi umphrofethi uSamuyeli efika ngakibo ezogcoba inkosi yako-Israyeli eyayizalandela. Lanxa uDavida wayelicinathunjana ebafaneni abayisitshiyagalombili, uJehova wakhetha yena ukuthi abe yinkosi esikhundleni seNkosi uSawuli.—1 Sam. 16:1, 10-13.

2. Sizaxoxa ngani esihlokweni lesi?

² UDavida wayevumelana lamazwi omhubi owathi ngoJehova: ‘Ukhothama akhangele phansi emazulwini lasemhlabeni. Uyabavusa abampofu othulini, aphakamise abaswelayo abahlalise lamakhosana.’ (Hubo. 113:6-8) Esihlokweni lesi sizaxoxa ngezikhathi uJehova atshengisa ngazo ukuthi uthobekile besesibona izifundo eziqakathekileyo esizitholayo. Sizaphinda sibone ukuthi isibonelo seNkosi uSawuli lesomphrofethi uDanyeli lesikaJesu sisifundisani ngokuthobeka.

3. UJehova usiphatha njani futhi lokhu kutshengisani?

³ UJehova utshengisa ukuthi uthobekile ngendlela aphatha ngayo izinceku zakhe ezilesono. Ngokwesibonelo, kasiboni siyizikhonzi zakhe kuphela kodwa uphinda asibone singabangane bakhe. (Hubo. 25:14, NWT) Okwenza senelise ukuba ngabangane bakhe yikuthi wathumela iNdodana  yakhe ukuthi izosihlawulela. Kuyakhanya sibili ukuthi uJehova ulesihawu lozwelo.

4. UJehova usinikeni futhi kungani?

⁴ Ake sixoxe ngenye indlela uJehova atshengisa ngayo ukuthi uthobekile. Aluba wayefuna wayengasidala singelankululeko yokuzikhethela ukuthi sifuna ukuphila njani. Kodwa kayisikho akwenzayo, wasidala ngomfanekiso wakhe futhi wasinika inkululeko yokuzikhethela. Ufuna thina abantu abaphansi simkhonze ngenhliziyo yethu yonke ngoba simthanda njalo sinanzelela ukuthi ukumlalela kuyasinceda. (Dute. 10:12; Isaya. 48:17, 18) Siyambonga kakhulu uJehova ngokuthi uthobekile!

5. UJehova usifundisa njani ukuthi sithobeke? (Khangela umfanekiso ongaphandle.)

⁵ UJehova usifundisa ukuthi sithobeke ngendlela asiphatha ngayo. Akulamuntu olenhlakanipho edlula ekaJehova ezulwini lasemhlabeni. Lanxa kunjalo uzimisele ukusebenza labanye lokwamukela imibono yabo. Ngokwesibonelo, wavumela iNdodana yakhe ukuthi imncedise ukudala zonke izinto. (Zaga. 8:27-30; Kol. 1:15, 16) UJehova unguSomandla kodwa uyanika abanye imisebenzi yokwenza. Ngokwesibonelo, wakhetha uJesu ukuthi abe yiNkosi yoMbuso wakhe futhi uzanika abangu-144 000 abazabusa loJesu eminye imisebenzi. (Luk. 12:32) Asithandabuzi ukuthi uJehova waqeqetsha uJesu ukuthi abe yiNkosi loMphristi Omkhulu. (Heb. 5:8, 9) Uphinda aqeqetshe lalabo abazabusa loJesu ukuthi bawenze kuhle umsebenzi wabo kodwa kasoze abalandelele ngoba uyathemba ukuthi bazakwenza intando yakhe.—Isam. 5:10.

6-7. Inhloko zemuli, abadala bebandla kanye labazali bangamlingisela njani uJehova?

⁶ Nxa kuyikuthi uBaba wethu osezulwini  ongadingi ukuncediswa ngumuntu enika abanye imisebenzi kutsho ukuthi thina kumele sikwenze kakhulu lokhu. Ngokwesibonelo, nxa uyinhloko yemuli kumbe ungumdala webandla lingisela uJehova ngokunika abanye imisebenzi futhi ungabalandeleli. Nxa ungenza njalo, umsebenzi uzakwenziwa futhi uyabe uqeqetsha abanye njalo ubancedisa ukuthi bangesabi ukwenza imisebenzi. (Isaya. 41:10) Kuyini okunye abazali labadala bebandla abangakufunda kuJehova?

⁷ IBhayibhili lisitshela ukuthi uJehova uyafuna ukuzwa lokho amadodana akhe asezulwini akucabangayo. (1 AmaKho. 22:19-22) Bazali lingamlingisela njani uJehova? Lingabuza abantwabenu ukuthi bacabanga ukuthi umsebenzi othile ungenziwa njani. Nxa kusenza landelani abakutshoyo.

8. Indlela uJehova aphatha ngayo u-Abrahama loSara itshengisa njani ukuthi uyabekezela?

⁸ Enye indlela uJehova atshengisa ngayo ukuthi uthobekile yikubekezela. Ngokwesibonelo, uyababekezelela labo abamkhonzayo nxa beveza ngenhlonipho ukuthi abavumelani lalokho afuna ukukwenza. Wamlalela u-Abrahama ngesikhathi eveza ukuthi ukhathazekile ngokubhujiswa kweSodoma leGomora. (Gen. 18:22-33) Cabanga langendlela aphatha ngayo uSara umka-Abrahama. Kazange amcaphukele kumbe amzondele aze ahleke isithembiso sokuthi uzazithwala esegugile. (Gen. 18:10-14) Kodwa watshengisa ukuthi uyamhlonipha.

9. Abazali labadala bebandla bangafundani kuJehova?

⁹ Abazali labadala bebandla bangafundani kuJehova? Wenzani nxa abantwabakho kumbe abanye ebandleni bengavumelani lalokho okutshoyo? Uyaphangisa yini ukubatshela ukuthi lokho abakutshoyo akuqondanga kumbe uyazama ukuzwisisa abakucabangayo? Nxa abazali labadala belingisela uJehova kuba lentokozo ezimulini lasemabandleni. Sesixoxe ngokuthi isibonelo sikaJehova sisinceda njani ukuthi sithobeke. Khathesi asixoxeni ngokuthi izibonelo eziseLizwini likaNkulunkulu zisinceda njani ukuthi sithobeke.

10. UJehova usebenzisa njani izibonelo eziseBhayibhilini ukuthi asifundise?

¹⁰ UJehova unguMfundisi Omkhulu yikho esinike iLizwi lakhe ukuthi asifundise. (Isaya. 30:20, 21, NWT) Kulo sifunda ngabantu ababelobuntu obumthokozisayo obugoqela ukuthobeka. Siphinda sifunde ngokuthi kwenzakalani ebantwini abehluleka ukutshengisa ubuntu lobo.—Hubo. 37:37; 1 Khor. 10:11.

11. Sifundani esibonelweni esibi sikaSawuli?

¹¹ Cabanga ngeNkosi uSawuli. Ingakaqalisi ukubusa yayithobekile futhi isazi ukuthi kulezinye izinto engenelisi ukuzenza njalo isesaba ukwenza eminye imisebenzi. (1 Sam. 9:21; 10:20-22) Kodwa ngokuhamba kwesikhathi uSawuli waqalisa ukuzigqaja futhi wenza izinto ayengelamvumo yokuzenza. Lokhu kwakhanya esanda kuba yinkosi. Ngelinye ilanga wehluleka ukulindela umphrofethi uSamuyeli. Kulokuthi athobeke athembe uJehova ukuthi uzanceda abantu, yena wanikela umhlatshelo wokutshiswa lanxa wayengelamvumo yokwenza njalo. Lokhu kwenza uJehova wangamamukeli futhi wacina emthathela ubukhosi. (1 Sam. 13:8-14) Okwenzakala kuSawuli kuyisixwayiso sokuthi singenzi izinto esingelamvumo yokuzenza.

12. UDanyeli watshengisa njani ukuthi uthobekile?

 ¹² Umphrofethi uDanyeli yena kazange enze njengoSawuli. Wayethobekile okwempilo yakhe yonke futhi wayehlala ecela uJehova ukuthi amncedise. Ngokwesibonelo, kazange azifunele udumo ngesikhathi uJehova emsebenzisa ukuthi achasise iphupho likaNebhukhadinezari. Wathobeka wanika uJehova lonke udumo. (Dan. 2:26-28) Sifundani? Sifunda ukuthi kumele sikhumbule ukunika uJehova lonke udumo nxa abafowethu labodadewethu bezikholisa inkulumo zethu kumbe nxa siphumelela ekutshumayeleni. Kumele sizehlise sivume ukuthi ngeke sizenze izinto lezi singancediswa nguJehova. (Flp. 4:13) Nxa singakwenza lokhu siyabe silingisela lesibonelo esihle sikaJesu.

13. UJohane 5:19, 30 utshengisa njani ukuthi uJesu uthobekile?

¹³ UJesu wathembela kuJehova lanxa wayeyiNdodana yakhe engelasono. (Bala uJohane 5:19, 30.) Kazange azame ukuthathela uYise osezulwini amandla. UFiliphi 2:6 uthi uJesu ‘kazange acabange ukumhluthunela isikhundla sakhe, okutsho ukufuna ukulingana loNkulunkulu.’ WayeyiNdodana ezehlisayo eyayizwisisa ukuthi kulezinto eyayingelamvumo yokuzenza njalo ehlonipha amandla kaYise.

14. UJesu wenzani ngesikhathi ecelwa ukuthi enze into ayengelamvumo yokuyenza?

¹⁴ Cabanga ngalokho okwenziwa nguJesu ngesikhathi uJakhobe loJohane kanye lonina uSalome bemlanda bezocela ukuthi abenzele into ayengelamvumo yokuyenza. UJesu wahle wabatshela ukuthi uYise osezulwini nguye kuphela owayengatsho ukuthi ngubani ozahlala esandleni sakhe sokudla lakwesenxele eMbusweni. (Mat. 20:20-23) Watshengisa ukuthi uyakwazi ukuthi kulezinto ayengelamvumo yokuzenza. Wayethobekile ngoba kazange enze izinto uJehova ayengamthumanga ukuthi azenze. (Joh. 12:49) Singamlingisela njani?

15-16. Singatshengisa njani ukuthi siyasilalela iseluleko esiku-1 Khorinte 4:6?

¹⁵ Silingisela isibonelo sikaJesu sokuthobeka ngokulalela iseluleko esiku-1 Khorinte 4:6 esithi: “Lingeqeli ngale kwalokho okubhaliweyo.” Yikho nxa abanye  becela ukuthi sibacebise akumelanga sibatshele esikucabangayo kumbe sikhulume singazange sicabangisise ngendaba yakhona. Kodwa kumele sisebenzise iBhayibhili lamabhuku ethu. Nxa singenza njalo siyabe sivuma ukuthi kulezinye izinto esingazaziyo. Kanti njalo siyabe sithobekile ngoba siyabe sitshengisa ukuthi ‘izahlulelo zikaSomandla zilungile.’—Isam. 15:3, 4.

¹⁶ Ngaphandle kokunika uJehova udumo, zikhona ezinye izizatho ezenza sithobeke. Khathesi sizaxoxa ngokuthi ukuthobeka kusinceda njani ukuthi sithokoze lokuthi sibe lobudlelwano obuhle labanye.

17. Kungani abantu abathobekileyo bethokoza?

¹⁷ Nxa sithobekile sizathokoza. Kungani sisitsho njalo? Nxa singananzelela ukuthi kulezinye izinto esingenelisi ukuzenza sizabonga lokho abanye abasenzela khona. Ngokwesibonelo, cabanga ngalokho okwenzakalayo uJesu aze elaphe amadoda alitshumi ayelobulephero. Ngeyodwa kuphela eyaphenduka kuye izembonga ngokuthi wayeyelaphe umkhuhlane wayo omubi kakhulu, okuyinto eyayingeke izenzele yona. Indoda le ethobekileyo yabonga uJesu ngalokho ayeyenzele khona njalo yadumisa uNkulunkulu.—Luk. 17:11-19.

18. Ukuthobeka kusinceda njani ukuthi sibe lobudlelwano obuhle labanye? (URoma 12:10)

¹⁸ Abantu abathobekileyo bajayele ukuba labangane abaseduze kanye lobudlelwano obuhle labanye. Lokhu kwenziwa yikuthi bayananzelela ukuthi abanye balobuntu obuhle futhi bayabathemba. Abantu abathobekileyo bayathokoza nxa abanye bephumelela emisebenzini abayiphiwayo  futhi bayaphangisa ukubancoma lokubanika udumo.—Bala uRoma 12:10.

19. Kungani kungamelanga sizigqaje?

¹⁹ Abantu abazigqajayo bona bakubona kunzima ukuncoma abanye. Bafuna kube yibo abanconywayo. Bajayele ukuziqathanisa labanye njalo bayancintisana labo. Kulokuthi babaqeqetshe futhi babanike imisebenzi, izikhathi ezinengi bona bacabanga ukuthi kumele bazenzele imisebenzi leyo ngoba bazitshela ukuthi abanye kabasoze bayenze kuhle. Umuntu ozigqajayo ujayele ukufuna ukuthi kube nguye oqakathekiswa kakhulu kulabanye njalo uba lomhawu nxa abanye besenza ngcono kulaye. (Gal. 5:26) Kukalutshwana ukuthi umuntu onje abe labangane okwesikhathi eside. Nxa singananzelela ukuthi siyazigqaja kumele sithandaze ngenhliziyo yonke kuJehova simcela ukuthi asincedise ‘sintshintshe indlela esicabanga ngayo’ ukuze umkhuba lo omubi ungamili impande.—Rom. 12:2.

20. Kungani kumele sithobeke?

²⁰ Siyambonga kakhulu uJehova ngokuthi uthobekile. Lokhu kukhanya endleleni aphatha ngayo izinceku zakhe futhi sifuna ukumlingisela. Kanti njalo sifuna ukulingisela izibonelo zabantu abathobekileyo okukhulunywa ngabo eBhayibhilini ababa lesibusiso sokuhamba loNkulunkulu. Kasihlaleni sinika uJehova udumo lenkazimulo emfaneleyo. (Isam. 4:11) Nxa singakwenza konke lokhu lathi sizahamba loBaba wethu osezulwini othanda abantu abathobekileyo.