1. Yisiphi isibusiso esilaso?

KUYISIBUSISO sibili ukuba sebandleni likaJehova. Silokuthula okukhulu njalo siyathokoza njengoba sikhonza uJehova ndawonye labafowethu labodadewethu. Kodwa uqakathekile yini ebandleni?

2. Yiwuphi umzekeliso umphostoli uPhawuli awusebenzisa kwezinye izincwadi zakhe eziphefumulelweyo?

² Umzekeliso umphostoli uPhawuli awusebenzisa kwezinye izincwadi zakhe eziphefumulelweyo usifundisa okunengi ngendaba yokuthi siqakathekile ebandleni. Ezincwadini lezo uPhawuli wafanisa ibandla lomzimba. Waphinda wafanisa amalunga ebandla lezitho zomzimba.—Rom. 12:4-8; 1 Khor. 12:12-27; Efe. 4:16.

3. Sizaxoxa ngani esihlokweni lesi?

³ Ngamunye wethu uqakathekile ebandleni likaJehova futhi sonke singenelisa ukuliqinisa. Sonke siligugu ebandleni kungelani lokuthi singumhlobo bani, silemali enganani, sivela emulini enjani, silamasiko anjani kumbe ukuthi sifunde kanganani. Esihlokweni lesi sizaxoxa ngalokho esikufunda emzekelisweni kaPhawuli. Okokuqala, sizafunda ukuthi ngamunye wethu uqakathekile ebandleni. Okwesibili, sizabona ukuthi kuyini esingakwenza nxa sicabanga ukuthi kasilancedo ebandleni. Okwesithathu, sizaxoxa ngokuthi kungani kumele sihlale sikhuthele emsebenzini uJehova awunike ngamunye wethu ebandleni.

4. URoma 12:4, 5 usifundisani?

⁴ Okokuqala esikufunda emzekelisweni kaPhawuli yikuthi ngamunye wethu uqakathekile emulini kaJehova. UPhawuli uqalisa umzekeliso wakhe ngokuthi: “Silezitho ezinengi emzimbeni munye, kodwa zonke izitho lezo zilemisebenzi etshiyeneyo. Ngakho lanxa thina sibanengi, singumzimba owodwa omanyene loKhristu, kodwa ngamunye wethu unjengesitho esibanjaniswe lezinye.” (Rom. 12:4, 5) Yiwuphi umcijo uPhawuli ayewucacisa? Lanxa sisenza imisebenzi etshiyeneyo ebandleni, ngamunye wethu uqakathekile.

5. Yiziphi “izipho” uJehova azinike ibandla?

⁵ Nxa sicabanga ngabantu abaqakathekileyo ebandleni ingqondo zethu zingahle zigijimele kulabo abakhokhelayo. (1 Thes. 5:12; Heb. 13:17) Liqiniso sibili ukuthi uJehova usebenzise uKhristu ukuthi anike ibandla “izipho ezingabantu.” (Efe. 4:8) Izipho lezi zigoqela amalunga eQula Elibusayo labasizi balo, amalunga eKhomithi Yegatsha, ababonisi beziqinti, abazalwane abafundisa ezikolo zenhlanganiso, abadala bebandla kanye lezinceku ezikhonzayo. Abafowethu bonke laba bakhethwe ngomoya ongcwele ukuthi banakekele izimvu zikaJehova eziligugu lokuthi baqinise ibandla.—1 Phet. 5:2, 3.

6. Ngokwalokho okutshiwo ku-1 Thesalonika 2:6-8, abafowethu abakhethwe ngomoya ongcwele basebenza nzima besenzani?

⁶ Abafowethu bakhethwe ngomoya ongcwele ukuthi benze imisebenzi etshiyeneyo. Abafowethu laba basebenza nzima ukuthi bancede ibandla lonke njengoba nje izitho zomzimba ezinjengezandla lenyawo zisebenza ukuthi zincede umzimba wonke. Kanti njalo kabazifuneli udumo kodwa basebenza ngamandla abo wonke ukuze bakhe futhi baqinise abafowabo labodadewabo. (Bala u-1 Thesalonika 2:6-8.) Siyambonga kakhulu uJehova ngabafowethu laba abakhethileyo abaqakathekisa okufunwa ngabanye ukwedlula okufunwa yibo.

7. Yiziphi izibusiso ezitholwa ngabanengi abasenkonzweni yesikhathi sonke?

⁷ Abanye ebandleni bangaba ngabanali, amaphayona aqakathekileyo kumbe awesikhathi sonke. Iqiniso yikuthi abafowethu labodadewethu abanengi emhlabeni wonke bakhethe ukwenza umsebenzi wokutshumayela lowokwenza abafundi okwesikhathi sonke. Lokhu kubenze benelisa ukuncedisa abantu abanengi ukuthi babe ngabafundi bakaKhristu uJesu. Lanxa abazalwane laba abasenkonzweni yesikhathi sonke bengelazinto ezinengi empilweni, uJehova ubabusisile sibili. (Mak. 10:29, 30) Siyabathanda abafowethu labodadewethu laba futhi siyabonga ngokuthi bangamalunga ebandla.

8. Kungani ummemezeli ngamunye wezindaba ezinhle eligugu kuJehova?

⁸ Abafowethu abakhethwe ngomoya ongcwele lalabo abasenkonzweni yesikhathi sonke yibo bodwa yini abaqakathekileyo ebandleni? Hatshi. Ummemezeli ngamunye wezindaba ezinhle uqakathekile kuNkulunkulu lasebandleni. (Rom. 10:15; 1 Khor. 3:6-9) Phela enye inhloso yebandla yikwenza abantu babe ngabafundi beNkosi yethu uJesu Khristu. (Mat. 28:19, 20; 1 Tim. 2:4) Wonke ummemezeli kungelani lokuthi ubhabhathiziwe kumbe kabhabhathizwanga, uyazama ukuwuqakathekisa umsebenzi lo.—Mat. 24:14.

9. Kungani sibaqakathekisa odadewethu abasemabandleni?

 ⁹ UJehova uyabaqakathekisa odadewethu abaqotho abasebandleni. Baligugu kuye kungelani lokuthi batshadile, balabantwana, bangabafelokazi kumbe kabatshadanga. IBhayibhili lisitshela ngabesifazana abanengi abenza izinto ezithokozisa uNkulunkulu. Ngokwesibonelo, babehlakaniphile, belokholo, betshiseka, belesibindi, bephana futhi besenza imisebenzi emihle. (Luk. 8:2, 3; ImiSeb. 16:14, 15; Rom. 16:3, 6; Flp. 4:3; Heb. 11:11, 31, 35) Siyambonga kakhulu uJehova ngokuthi emabandleni silabodade abalingisela abesifazana laba abaseBhayibhilini.

10. Kungani sibaqakathekisa asebekhulile?

¹⁰ Siyathokoza ngokuba lasebekhulile abanengi ebandleni. Kwamanye amabandla kulabafowethu labodadewethu abakhulileyo asebekhonze uJehova beqotho okweminyaka eminengi ikanti abanye kabalasikhathi eside bengoFakazi. Abanengi babazalwane laba bathwaliswe nzima yikugula okubangelwa yikuguga yikho bangehluleka ukwenza okunengi ebandleni lasemsebenzini wokutshumayela. Lanxa kunjalo bayatshumayela futhi benza konke okusemandleni abo ukuthi bakhuthaze njalo baqeqetshe abanye. Kunengi esikufunda kubo futhi baqakathekile kuJehova lakithi.—Zaga. 16:31.

11-12. Abasakhulayo abasebandleni lakho bakukhuthaze njani?

¹¹ Ake sixoxe ngabasakhulayo. Bahlangana lobunzima njengoba bekhula emhlabeni lo obuswa nguSathane uDeveli futhi ogcwele imfundiso zakhe eziyingozi. (1 Joh. 5:19) Kodwa kuyasikhuthaza ukubabona bephendula emihlanganweni yebandla, betshumayela futhi belwela ukholo lwabo ngesibindi. Lina elisakhulayo liqakathekile sibili ebandleni likaJehova.—Hubo. 8:2.

¹² Abanye abafowethu labodadewethu bazibona bengelancedo ebandleni. Kodwa kuyini okunganceda ngamunye wethu  abone ukuthi uqakathekile ebandleni? Ake sibone.

13-14. Kuyini okungenza abanye bacabange ukuthi kabalancedo ebandleni?

¹³ Isifundo sesibili esisithola emzekelisweni kaPhawuli sisikhumbuza uhlupho abanengi abalalo. Bazibona bengelancedo ebandleni. UPhawuli wabhala wathi: “Nxa unyawo lungathi, “Mina kangisilolunga lomzimba ngoba kangisisosandla,” lokho ngeke kwenze ukuthi lungabi lilunga lomzimba. Nxa indlebe ingathi, “Mina kangisilolunga lomzimba ngoba kangisilolihlo,” lokho ngeke kwenze ukuthi ingabi lilunga lomzimba.” (1 Khor. 12:15, 16) Kuyini uPhawuli ayesifundisa khona?

¹⁴ Nxa ungaziqathanisa labanye ebandleni, ungazibona angani kawulancedo. Abanye ebandleni bangabe bezingcitshi ekufundiseni, ekuhleleni izinto, ekududuzeni lasekukhuthazeni abanye. Engxenye ucabanga ukuthi kawenelisi ukwenza njengabo. Lokhu kutshengisa ukuthi uthobekile lokuthi uyavuma ukuthi kulezinto ongenelisi ukuzenza. (Flp. 2:3) Kodwa kumele unanzelele ngoba ukuhlala uziqathanisa labantu abazingcitshi kuzakwenza utshone udanile. Kanti njalo uPhawuli waveza ukuthi ungacina ubona angani kawulancedo ebandleni. Kuyini okungakunceda ukuthi ulwisane lemicabango enjalo?

15. Ngokwalokho okutshiwo ku-1 Khorinte 12:4-11, kuyini okumele sikwazi ngezipho esingabe silazo?

¹⁵ UJehova wanika amanye amaKhristu akuqala izipho ezimangalisayo esebenzisa umoya ongcwele kodwa kazange awaphe izipho ezifananayo. (Bala u-1 Khorinte 12:4-11.) Lanxa baphiwa izipho ezitshiyeneyo, umKhristu ngamunye wayeqakathekile. Lamuhla thina kasiphiwanga izipho ezimangalisayo zomoya ongcwele. Sileziphiwo ezitshiyeneyo kodwa sonke siqakathekile kuJehova.

16. Yisiphi iseluleko somphostoli uPhawuli okumele sisilalele?

 ¹⁶ Kulokuthi siziqathanise lamanye amaKhristu kumele silalele iseluleko somphostoli uPhawuli esithi: “Umuntu ngamunye kahlole ezakhe izenzo, lapho-ke uzakuba lesizatho sokuthokoza ngalokho yena akwenzayo, hatshi ngokuziqathanisa lomunye.”—Gal. 6:4.

17. Ukulalela iseluleko sikaPhawuli kuzasinceda njani?

¹⁷ Nxa singalalela iseluleko sikaPhawuli esiphefumulelweyo sihlole ezethu izenzo, sizananzelela ukuthi kukhona esenelisa ukukwenza abanye abangakwenelisiyo. Ngokwesibonelo, umdala webandla angabe engenelisi ukufundisa kuhle nxa esenza inkulumo kodwa eyingcitshi emsebenzini wokwenza abafundi. Angabe engenelisi ukuhlela kuhle izinto njengabanye abadala ebandleni lakhe kodwa esaziwa njengomelusi olothando, abamemezeli abakhululeka ukuya kuye ukuze abancede esebenzisa iMibhalo. Kumbe angabe esaziwa ngokwamukela kuhle abanye. (Heb. 13:2, 16) Nxa singabona ukuthi kukhona esenelisa ukukwenza, sizathokoza ngokwazi ukuthi siluncedo ebandleni. Kanti njalo kasisoze sibe lomhawu ngabafowethu abaleziphiwo ezitshiyene lezethu.

18. Singayithuthukisa njani indlela esifundisa ngayo?

¹⁸ Lanxa sonke siqakathekile ebandleni, kumele sibe lesifiso sokuthuthukisa inkonzo yethu lendlela esifundisa ngayo. UJehova usiqeqetsha esebenzisa inhlanganiso yakhe ukuze asincedise sithuthuke. Ngokwesibonelo, emhlanganweni waphakathi kweviki sifundiswa ukuthi singayithuthukisa njani inkonzo yethu. Uyakusebenzisa yini okufunda emhlanganweni lo?

19. Ungenzani ukuze wenelise ukungena iSikolo Sabavangeli BoMbuso?

¹⁹ Enye indlela enhle uJehova ayisebenzisa ukuthi asiqeqetshe yiSikolo Sabavangeli BoMbuso. Abangangena isikolo lesi ngabafowethu labodadewethu abasenkonzweni yesikhathi sonke abaleminyaka engu-23 kusiya ku-65. Mhlawumbe ungazitshela ukuthi kawusoze wenelise ukusingena. Kodwa kulokuthi ube ucabanga ngokuthi kungani ungasoze usingene, bhala phansi izizatho ezenza ufune ukusingena ubusuhlela ukuthi ungenzani ukuze ufanele ukubizwa esikolo lesi. Ungenelisa ukwenza owawucabanga ukuthi ngeke ukwenze uncediswa nguJehova futhi usebenza nzima.

20. Sifundani kuRoma 12:6-8?

²⁰ Isifundo sesithathu esisithola emzekelisweni kaPhawuli sikuRoma 12:6-8. (Bala.) Lalapha uPhawuli utshengisa ukuthi bonke abasebandleni balezipho ezitshiyeneyo. Kodwa khathesi usegcizelela ukuthi kumele sisebenzise izipho esilazo ukuze sakhe futhi siqinise ibandla.

21-22. Sifundani kuRobert loFelice?

²¹ Kasixoxeni ngokwenzakala kumfowethu okuthiwa nguRobert. * Wacelwa ukuthi ayesebenza eBhetheli elizweni lakibo ngemva kokwenza umsebenzi wenkonzo othile kwelinye ilizwe. Lanxa abazalwane bamqinisekisa ukuthi ukutshintshwa kwakhe umsebenzi kwakungatsho ukuthi kulento ayeyiphambanisile, wathi: “Kwaphela izinyanga ezinengi ngidanile ngoba ngangicabanga ukuthi kukhona engangikuphambanisile. Ngezinye izikhathi ngangize  ngifise ukusuka eBhetheli.” Manje wenzani ukuze aphinde athokoze? Omunye umdala webandla wamkhumbuza ukuthi uJehova usiqeqetshe emisebenzini yenkonzo ebesiyenza ukuze siyenze kuhle esilayo khathesi. URobert wananzelela ukuthi kwakumele ayekele ukube elokhu ecabanga ngezinto zakudala kodwa agxile emsebenzini ayesewenza.

²² Umfowethu uFelice Episcopo laye wehlelwa yisimo esihambelana lesikaRobert. Yena lomkakhe baphiwa izicoco zeSikolo SeGiliyadi ngo-1956 njalo bahambela eBolivia. Ngo-1964 baba lomntwana. UFelice wathi: “Kwakunzima kakhulu ukutshiya umsebenzi wenkonzo esasiwuthanda. Ngiyavuma ukuthi ngaqeda umnyaka wonke ngikhathazekile. Kodwa uJehova wangincedisa ukuthi ngitshintshe indlela engangicabanga ngayo futhi ngiwamukele umsebenzi wami omutsha wokuba ngumzali.” Lawe uzizwa ngendlela uRobert loFelice abazizwa ngayo yini? Kuyakudanisa yini ukuthi khathesi kawusayenzi imisebenzi yenkonzo owake wayenza? Nxa kunjalo, okungakunceda ukuthi uthokoze kakhulu yikugxila kulokho owenelisa ukukwenza khathesi ukuze ukhonze uJehova labazalwane. Hlala ukhuthele usebenzisa iziphiwo olazo unceda abanye. Nxa ungakwenza lokho uzathokoza futhi ulakhe ibandla.

23. Kuyini okumele sicabangisise ngakho njalo sizaxoxa ngani esihlokweni esilandelayo?

²³ Ngamunye wethu uligugu kuJehova. Ufuna sibe ngamalunga emuli yakhe. Nxa singacabangisisa ngalokho esingakwenza ukuze sakhe abafowethu labodadewethu besesisebenza nzima ukuthi sikwenze, kasisoze sizibone angani kasilancedo ebandleni. Kodwa sibabona njani abanye ebandleni? Singatshengisa njani ukuthi siyabathanda lokuthi siyabahlonipha? Sizaxoxa ngendaba le eqakathekileyo esihlokweni esilandelayo.