1. Yisiphi isilingo uJosefa ahlangana laso futhi wenzani?

 INDODANA kaJakhobe okuthiwa nguJosefa yahlangana lesilingo esinzima sibili. UmkaPhothifa wathi kuye: “Woza engutsheni lami!” Kodwa uJosefa wala. Omunye angazibuza ukuthi kungani uJosefa engavumanga. Phela uPhothifa wayengekho. Kanti njalo njengoba uJosefa wayeyisigqili, owesifazana lo wayengamthwalisa nzima sibili nxa angayala ukulala laye. Lanxa kunjalo uJosefa wayelokhu esala. Kungani wala? Wathi: “Ngingayenza kanjani into embi kanje ngenze isono kuNkulunkulu na?”—Gen. 39:7-12.

2. UJosefa wakwazi njani ukuthi ukufeba kuyisono kuNkulunkulu?

² UMthetho kaMosi olomlayo othi “ungafebi” wabhalwa sekudlule iminyaka edlula 200 indaba le yenzakele. (Eks. 20:14) Manje uJosefa wakwazi njani ukuthi ukufeba ‘yinto embi’? UJosefa wayemazi kuhle uJehova futhi wayekwazi ukuthi ubona ukufeba kuyinto embi kakhulu. Ngokwesibonelo, uJosefa wayekwazi ukuthi uJehova wayefuna ukuthi umtshado ubunjwe yindoda eyodwa lowesifazana oyedwa kuphela. Kungenzeka ukuthi wezwa ukuthi kabili konke uJehova wayevikele ukhokho wakhe uSara ukuthi angathintwa ngeyinye indoda. Angabe wezwa lokuthi uJehova wayemvikele ngendlela efananayo uRabhekha, umka-Isaka. (Gen. 2:24; 12:14-20; 20:2-7; 26:6-11) Ukucabangisisa ngendaba lezi kwanceda uJosefa wananzelela ukuthi kuyini okubi lokuhle phambi kukaJehova. UJosefa wayemthanda sibili uJehova yikho wazimisela ukwenza lokho athi kulungile.

3. Sizaxoxa ngani esihlokweni lesi?

 ³ Akuthandabuzwa ukuthi uyakuthanda ukwenza okulungileyo. Kodwa sonke silesono yikho nxa singananzeleli singacina sesilandela lokho umhlaba lo othi kulungile. (Isaya. 5:20; Rom. 12:2) Esihlokweni lesi sizabona ukuthi kuyini ukulunga lokuthi ukwenza okulungileyo kusinceda njani. Sizaphinda sixoxe ngezinto ezintathu ezingasinceda sihlale siyithanda imithetho kaJehova elungileyo.

4. Abantu abanengi bacabanga ukuthi umuntu olungileyo ngonjani?

⁴ Abantu abanengi bacabanga ukuthi umuntu olungileyo ngozigqajayo, othanda ukusola abanye futhi ozibona engcono kulabanye. Kodwa uNkulunkulu kamthandi umuntu onjalo. Ngesikhathi uJesu esemhlabeni wabasola kakhulu abakhokheli benkolo ababezifakela eyabo imithetho yokuthi kuyini okulungileyo lokungalunganga. (UmTshu. 7:16; Luk. 16:15) Umuntu owenza lokho uJehova athi kulungile kaziboni engcono kulabanye abantu.

5. IBhayibhili lithi umuntu olungileyo ngonjani? Nika izibonelo.

⁵ Umuntu olungileyo ngowenza lokho uJehova uNkulunkulu athi kuqondile. EBhayibhilini ukulunga kutsho ukulandela imithetho kaJehova ephakemeyo. Ngokwesibonelo, uJehova wayekhangelele ukuthi abathengisayo basebenzise ‘izilinganiso eziqondileyo’ kumbe ezithembekileyo. (Dute. 25:15) Ibala lesiHebheru elihunyutshwe ngokuthi ezithembekileyo lingahunyutshwa langokuthi ezilungileyo. Yikho umKhristu ofuna ukwenza okulungileyo phambi kukaJehova kumele athembeke ezindabeni zamabhizinesi. Umuntu olungileyo uyakuzonda ukubona abanye abantu bephathwa kubi. Kanti njalo uyacabanga ngokuthi uJehova uzibona njani izinqumo azenzayo ukuze ‘amthokozise kukho konke.’—Kol. 1:10.

6. Kungani uJehova kunguye yedwa olelungelo lokutsho ukuthi yikuphi okulungileyo lokungalunganga? (U-Isaya 55:8, 9)

⁶ IBhayibhili liveza ukuthi uJehova ungumthombo wokulunga. Lithi ‘ulikhaya lokulunga.’ (Jer. 50:7 TBS) UJehova nguye yedwa olelungelo lokutsho ukuthi yikuphi okuqondileyo lokungaqondanga ngoba unguMdali. Thina silesono yikho kunzima ukuthi sikwazi ukuthi yikuphi okuqondileyo lokungaqondanga. Kodwa uJehova yena uphelele, ukwazi mhlophe okulungileyo lokungalunganga. (Zaga. 14:12; bala u-Isaya 55:8, 9.) Lanxa kunjalo siyenelisa ukwenza lokho athi kulungile ngenxa yokuthi senziwe ngomfanekiso wakhe. (Gen. 1:27) Siyakuthanda ukwenza okulungileyo njalo siyamthanda uBaba wethu yikho sizama ngamandla wonke ukuthi simlingisele.—Efe. 5:1.

7. Kungani sidinga imithetho? Nika isibonelo.

⁷ Kuyasinceda kakhulu ukulandela imithetho kaJehova emayelana lokuthi kuyini okulungileyo lokungalunganga. Cabanga ukuthi bekungahamba njani aluba inkampani ngayinye yokwakha ibingazifakela imithetho yokuthi kwakhiwa njani. Cabanga lokuthi bekungafa abantu abangaki aluba odokotela labonesi bebezenzela abakucabangayo nxa beselapha abantu. Lokhu kutshengisa ukuthi kuyanceda ukuba lemithetho ebekiweyo yokwenza okuthile kumbe umsebenzi othile. Yikho imithetho kaJehova emayelana lokuthi  kuyini okulungileyo lokungalunganga iyasinceda.

8. Yiziphi izibusiso ezizatholwa yilabo abathanda ukwenza okulungileyo?

⁸ UJehova uyababusisa labo abazama ukulandela imithetho yakhe. Uthembisa ukuthi “abalungileyo bazazuza ilifa lelizwe bahlale kulo lanini.” (Hubo. 37:29) Akucabange ukuthi abantu bazathokoza njani nxa wonke umuntu eselandela imithetho kaJehova. Kuyabe sekulokuthula lokumanyana. Le yiyo impilo uJehova afuna siyiphile. Yikho kumele sikuthande ukwenza okulungileyo. Asixoxeni ngezinto ezintathu ezingasinceda ukuthi sihlale sikuthanda ukwenza okulungileyo.

9. Kuyini okuzasinceda sithande ukulunga?

⁹ Okokuqala: Thanda lowo olelungelo lokufaka imithetho. Okuzasinceda ukuthi sithande ukulunga yikuthi simthande uJehova onguye ofaka imithetho yokuthi yikuphi okulungileyo lokungalunganga. Nxa simthanda sibili uJehova sizaba lesifiso esikhulu sokulandela imithetho yakhe elungileyo. Ngokwesibonelo, aluba u-Adamu lo-Eva babemthanda uJehova babengasoze bephule umthetho wakhe olungileyo.—Gen. 3:1-6, 16-19.

10. Kuyini okwanceda u-Abrahama ukuthi azwisise indlela uJehova acabanga ngayo?

¹⁰ Asifuni ukwenza lokho okwenziwa ngu-Adamu lo-Eva. Okungasinceda ukuthi singenzi njengabo yikuqhubeka sifunda ngoJehova langobuntu bakhe obuhle njalo sizama ukuzwisisa indlela acabanga ngayo. Ukwenza lokhu kuzasinceda ukuthi simthande kakhulu uJehova. Ake sixoxe ngo-Abrahama. Wayemthanda uJehova. Lanxa ngezinye izikhathi wayengazwisisi lokho uJehova ayekhetha ukukwenza, kazange amhlamukele. Kodwa wayezama ukuthi abemazi kuhle. Ngokwesibonelo, uJehova wathi emtshela ukuthi uzabhubhisa iSodoma leGomora, u-Abrahama wayesesaba ukuthi “uMahluleli womhlaba wonke” uzabhubhisa abalungileyo kanye lababi. Wayengazwisisi ukuthi uJehova wayengenza njani into enjalo. Yikho wazehlisa wabuza uJehova imibuzo eminengi mayelana lalokho okwakumkhathaza. UJehova waba lesineke wayiphendula yonke imibuzo yakhe. Ekucineni u-Abrahama wananzelela ukuthi uJehova uhlola inhliziyo yomuntu ngamunye njalo nxa eseletha isijeziso ujezisa abantu ababi kuphela.—Gen. 18:20-32.

11. U-Abrahama watshengisa njani ukuthi uyamthanda lokuthi uyamthemba uJehova?

¹¹ U-Abrahama kazange ayikhohlwe ingxoxo aba layo loJehova mayelana leSodoma leGomora. Wayesemzwisisa kakhulu uYise futhi esemthanda ukwedlula kuqala. Kodwa ngemva kweminyaka eminengi u-Abrahama waphinda waba phakathi kwesimo esasingenza kube nzima ukuthi amthembe uJehova. UJehova wamcela ukuthi anikele ngendodana yakhe ayithandayo u-Isaka. U-Abrahama wayesemazi kuhle uNkulunkulu wakhe yikho kazange ambuze imibuzo. Ngokuthula nje wenza lokho uJehova ayemcela ukuthi akwenze. Kodwa ake ucabange ukuthi wayengabe esizwa ubuhlungu obunganani ngesikhathi elungiselela ukuyanikela ngo-Isaka! Ukucabangisisa ngalokho ayesekufundile ngoJehova kwamnceda wabona ukuthi uJehova wayengeke enze into engalunganga kumbe engatshengisi uthando. Ngokwalokho  okwatshiwo ngumphostoli uPhawuli, u-Abrahama wazitshela ukuthi uJehova uyenelisa ukuvusa indodana yakhe ayithandayo, u-Isaka. (Heb. 11:17-19) Phela uJehova wayethembise ukuthi u-Isaka uzaba nguyise wesizwe kodwa ngalesosikhathi wayengelabantwana. U-Abrahama wayemthanda uYise uJehova yikho wamthemba ukuthi uzahlala esenza okulungileyo. Lanxa kwakunzima, ukholo lwamenza walalela.—Gen. 22:1-12.

12. Singamlingisela njani u-Abrahama? (IHubo 73:28)

¹² Singamlingisela njani u-Abrahama? Ngokuqhubeka sifunda ngoJehova. Singenza njalo sizakuba seduze laye simthande kakhulu. (Bala iHubo 73:28.) Kanti njalo sizaqeqetsha lomzwangedwa wethu ukuthi ulandele lokho uJehova akufunayo. (Heb. 5:14) Lokhu kuzasinceda ukuthi singavumi nxa silingwa ukuthi senze okubi njalo singafisi ngitsho ukwenza loba yini engazwisa uBaba wethu ubuhlungu kumbe iphambanise ubungane bethu laye. Kodwa kuyini okunye esingakwenza ukuze sitshengise ukuthi siyakuthanda ukulunga?

13. Singenzani ukuze silandele ukulunga? (IZaga 15:9)

¹³ Okwesibili: Nsuku zonke zama ukutshengisa ukuthi uyakuthanda ukulunga. Nxa ufuna ukuqinisa umzimba kumele usebenze nzima uziqeqetsha nsuku zonke. Ngendlela efananayo kumele utshengise nsuku zonke ukuthi uyakuthanda lokho uJehova athi kulungile. Akunzima kangako ukukwenza lokhu. UJehova uyazwisisa futhi kakhangelelanga ukuthi senze okuphezu kwamandla ethu. (Hubo. 103:14) Usitshela ukuthi “uyabathanda labo abalandela ukulunga.” (Bala iZaga 15:9.) Nxa kulomsebenzi wenkonzo esifuna ukuwenza sijayele ukusebenza nzima ukuze siphumelele. Ngakho nxa sifuna ukuhlala sisenza okulungileyo, kumele sisebenze nzima. UJehova uzasibekezelela futhi asincedise ukuthi siqhubeke sithuthuka kancane kancane size siphumelele.—Hubo. 84:5, 7.

14. Siyini “isivikelo sesifuba esiyikulunga” futhi sisinceda njani?

 ¹⁴ UJehova usitshela ukuthi akunzima ukwenza lokho athi kulungile. (1 Joh. 5:3) Kodwa kuyasivikela njalo siyasidinga isivikelo lesi nsuku zonke. Lokhu kusikhumbuza izigqoko zokuzivikela empini umphostoli uPhawuli akhuluma ngazo. (Efe. 6:14-18) Usakhumbula yini ukuthi uPhawuli wathi kuyini okuvikela inhliziyo? ‘Yisivikelo sesifuba esiyikulunga.’ Isivikelo lesi simela imithetho kaJehova elungileyo. Isivikelo sesifuba esasigqokwa lisotsha sasivikela inhliziyo yaso. Yikho lemithetho kaJehova elungileyo ivikela umuntu esinguye ngaphakathi. Woba leqiniso lokuthi ugqoka zonke izigqoko zokuzivikela empini okugoqela lesivikelo sesifuba esiyikulunga!—Zaga. 4:23.

15. Ungasigqoka njani isivikelo sesifuba esiyikulunga?

¹⁵ Ungasigqoka njani isivikelo sesifuba esiyikulunga? Ngokucabangisisa ngemithetho kaNkulunkulu nsuku zonke nxa usenza izinqumo. Ngokwesibonelo, zibuze ukuthi ujayele ukuxoxa ngani, yiziphi ingoma ozilalelayo, amafilimu owabukelayo kumbe amabhuku othanda ukuwabala? Izinto lezo zifakani enhliziyweni yakho futhi uJehova uthini ngazo? Yizinto uJehova athi azilunganga yini ezinjengokuziphatha okubi, udlakela, ubuhwaba kumbe ezisikhuthaza ukugijimisa okufunwa yithi? (Flp. 4:8) Nxa ungakhetha ukwenza izinto uJehova azamukelayo uyabe uvikela inhliziyo yakho ukuthi ingaphanjaniswa yizinto ezimbi.

16-17. U-Isaya 48:18 usitshengisa njani ukuthi singenelisa ukulandela imithetho kaJehova?

¹⁶ Uyake uzibuze yini ukuthi uzenelisa ukulandela imithetho kaJehova elungileyo nsuku zonke okwempilo yakho yonke? Ake sixoxe ngomzekeliso uJehova awusebenzisayo ku-Isaya 48:18. (Bala.) UJehova usithembisa ukuthi ukulunga kwethu ‘kuzakuba njengamagagasi olwandle.’ Ake uzicabange umile ekhunjini lolwandle ubukele amagagasi. Kambe ungazihlupha ngokuthi ngelinye ilanga azavuka engekho? Ngitsho sibili! Uyabe ukwazi ukuthi amagagasi la aselezinkulungwane zeminyaka ekhona futhi azaqhubeka elokhu ekhona.

¹⁷ Ukulunga kwakho kungaba njengamagagasi la ahlala ekhona! Kungenzakala njani lokhu? Okungakunceda yikuthi ungakenzi isinqumo uqale udinge ukuthi uJehova ufuna wenzeni ubusukwenza. Lanxa isinqumo ofuna ukusenza sinzima, uYihlo okuthandayo uJehova uzakunika amandla futhi akuncedise ukuthi uqhubeke usenza okulungileyo nsuku zonke.—Isaya. 40:29-31.

18. Kungani kungamelanga sahlulele abanye?

¹⁸ Okwesithathu: Khumbula ukuthi uJehova nguye olelungelo lokwahlulela. Lanxa kumele sizame sibili ukulandela imithetho kaJehova akumelanga sahlulele abanye kumbe sizibone singcono kulabo. Asilalo ilungelo lokwahlulela abanye ngoba kumele sihlale sikhumbula ukuthi uJehova ‘nguye uMahluleli womhlaba wonke.’ (Gen. 18:25) UJehova kasinikanga umsebenzi wokwahlulela abanye. Yikho uJesu wathi: “Yekelani ukwahlulela ukuze lani lingahlulelwa.”—Mat. 7:1. *

19. Kuyini okutshengisa ukuthi uJosefa wayekwazi ukuthi uNkulunkulu nguye olelungelo lokwahlulela?

¹⁹ Ake siphinde sixoxe ngesibonelo sikaJosefa indoda eyayilungile. Kazange ahlulele  abanye kuhlanganise lalabo ababemphathe kubi. Abafowabo bamphosela emgodini basebecabanga ukuthi kungcono bamthengise njalo batshela uyise ukuthi uJosefa wayesefile. Ngemva kweminyaka eminengi uJosefa waphinda wahlangana labafowabo. Ngalesosikhathi wayesengumbusi olamandla futhi wayengabahlulela kabuhlungu abafowabo ephindisela indlela ababemphathe ngayo. Lanxa abafowabo babezisola kakhulu ngalokho ababekwenzile, babecabanga ukuthi wayezaphindisela. Kodwa uJosefa wabaqinisekisa wathi: “Lingesabi mina ngisesikhundleni sikaNkulunkulu na?” (Gen. 37:18-20, 27, 28, 31-35; 50:15-21) UJosefa wayethobekile yikho wananzelela ukuthi nguJehova kuphela olelungelo lokwahlulela abafowabo.

20-21. Singenzani ukuze singaziboni silungile kulabanye?

²⁰ Lathi kumele silingisele uJosefa ngokuvumela uJehova ukuthi kube nguye owahlulelayo. Ngokwesibonelo, akumelanga sizitshele ukuthi siyakwazi ukuthi kuyini okwenza abafowethu benze izinto ngendlela ethile. Thina asenelisi ukubona okusezinhliziyweni zabo, nguJehova kuphela ‘ohlolisisa zonke izinjongo zomuntu’ (Zaga. 16:2) Uthanda yonke imihlobo yabantu kungelani lamasiko abo lokuthi bavela ngaphi. Kanti njalo usikhuthaza ukuthi ‘sizivule ngokupheleleyo izinhliziyo zethu.’ (2 Khor. 6:13) Ngakho kumele sibathande abafowethu labodadewethu kulokuthi sibahlulele.

²¹ Akumelanga sahlulele lalabo abangayisibo boFakazi. (1 Tim. 2:3, 4) Kambe kuqondile yini ukuthi umKhristu athi ngesihlobo sakhe: “Lo vele kasoze aba nguFakazi loba sekutheni”? Hatshi. Lokhu kungabe kuyikuphosisa sibili futhi kuyabe kutshengisa ukuthi wena uzibona ulungile. UJehova unika “bonke abantu ezindaweni zonke” ithuba lokuthi baphenduke. (ImiSeb. 17:30) Hlala ukhumbula ukuthi ukuzibona ulungile akulunganga.

22. Kungani uzimisele ukuthanda ukulunga?

²² Ukuthanda imithetho kaJehova elungileyo kuzakwenza uthokoze njalo ube yisibonelo esihle kwabanye. Kuzakwenza lokuthi abanye bakuthande njalo bathande loNkulunkulu wethu uJehova. Ngakho qhubeka ‘ulambele futhi womele ukulunga.’ (Mat. 5:6) Qiniseka ukuthi uJehova uyakubona konke okwenzayo lokuthi uyathokoza nxa uzama ukwenza okulungileyo. Ungalahli ithemba lanxa abantu emhlabeni lo beqhubeka besenza izinto ezingalunganga! Hlala ukhumbula ukuthi “uJehova uthanda abalungileyo.”—Hubo. 146:8.