1. Kuyini okuhle osekwenziwe ngabanengi abasakhulayo?

 MINYAKA yonke kubhabhathizwa izinkulungwane zabasakhulayo. Nxa ungomunye wabo, abafowenu labodadewenu bayathokoza ngalokho okwenzileyo futhi loJehova uyathokoza. (Zaga. 27:11) Akucabange ngezinto osuzenzile. Mhlawumbe usuleminyaka uhlolisisa okutshiwo liBhayibhili. Lokho kukwenze wabona ukuthi iBhayibhili liLizwi likaNkulunkulu. Kodwa okuqakatheke kakhulu yikuthi usumazi njalo usumthanda uMlobi webhuku leli elingcwele. Okwenze wazinikela kuJehova futhi wabhabhathizwa yikuthi uyamthanda. Okwenzileyo kuhle kakhulu.

2. Sizaxoxa ngani esihlokweni lesi?

 ² Kumele ukuthi ungakabhabhathizwa bekungalula ukuthi uqhubeke uthembekile kuJehova. Kodwa usazohlangana lezilingo ezinengi njengoba ulokhu ukhula. USathane uzaqhubeka ezama ukwenza ukuthi ungamthandi uJehova lokuthi uyekele ukumkhonza. (Efe. 4:14) Ungavumi ukuthi lokho kwenzakale kuwe. Kuyini okuzakunceda ukuthi uhlale uthembekile kuJehova lokuthi ugcine isithembiso sakho sokuthi uzahlala umkhonza? Kumele uqhubeke uthuthuka njalo ‘usebenza nzima’ ukuze ube ngumKhristu oqinileyo. (Heb. 6:1) Ungakwenza njani lokho?

3. Kuyini okumele amaKhristu wonke akwenze ngemva kokubhabhathizwa?

³ Sonke esesibhabhathiziwe kumele silandele iseluleko uPhawuli asinika abazalwane base-Efesu. Wabakhuthaza  ukuthi babe ngamaKhristu ‘akhule ngokweneleyo.’ (Efe. 4:13) Lokhu kufanana lokuthi wayesithi kubo, ‘Qhubekani lithuthuka.’ UPhawuli wafanisa ukuthuthuka kwethu lokukhula komntwana. Abazali abalosane bayaluthanda futhi bayazigqaja ngalo. Kodwa umntwana kahlali elusane. Ngokuya kwesikhathi kuyabe kumele atshiye “imikhuba yobuntwana.” (1 Khor. 13:11) LamaKhristu lawo kumele enze njalo. Ngemva kokubhabhathizwa kumele siqhubeke sithuthuka. Asiboneni ukuthi kuyini okungasinceda ukuthi sithuthuke.

4. Ukuthanda uJehova kungakunceda njani ukuthi uthuthuke ekukhonzeni? (UFiliphi 1:9)

⁴ Mthande kakhulu uJehova. Lanxa umthanda uJehova, kukhona ongakwenza ukuze umthande kakhulu. Umphostoli uPhawuli wasitshela okunye esingakwenza. (Bala uFiliphi 1:9.) Wakhulekela ukuthi uthando lwabaseFiliphi “luqhubeke lusanda kakhulu.” Lokhu kutsho ukuthi kumele senze izinto ezizakwenza ukuthi simthande kakhulu uJehova. Kumele sifunde ngaye, sibe “lolwazi oluqondileyo lokuqedisisa konke.” Nxa siqhubeka sisibamazi uJehova sizamthanda kakhulu njalo sizazwisisa ubuntu bakhe lalokho akwenzayo. Lokhu kuzakwenza sizame ngamandla wonke ukumthokozisa ngoba siyabe singafuni ukwenza loba yini ezamdanisa. Sizimisele ukuzwisisa ukuthi kuyini afuna sikwenze lokuthi singakwenza njani.

5-6. Singenzani ukuze simthande kakhulu uJehova? Chasisa.

⁵ Sizamthanda kakhulu uJehova nxa singabayazi kuhle iNdodana yakhe ngoba yona ibuveza ngokupheleleyo ubuntu bukaYise. (Heb. 1:3) Okungasinceda simazi kuhle uJesu yikutaditsha amaVangeli womane. Nxa ubungakaqalisi ukubala iBhayibhili nsuku zonke zama ukuqalisa khathesi. Ngesikhathi ubala ngoJesu, nanzelela ukuthi wayelobuntu obunjani. Ngokwesibonelo, abantu babengesabi ukumlanda baxoxe laye. Ngitsho labantwana bake babuya kuye wabagona. (Mak. 10:13-16) Wayesenza abafundi bakhe bakhululeke nxa belaye futhi babengesabi ukumtshela abakucabangayo. (Mat. 16:22) Wayelingisela uYise ngoba loJehova kulula ukuthi sikhulume laye. Singathandaza kuye sikhululekile, simtshele konke okusezinhliziyweni zethu. Siyakwazi ukuthi uzasilalela engasisoli. UJehova uyasithanda njalo ulendaba lathi.—1 Phet. 5:7.

⁶ UJesu wayebazwela abantu. UMathewu uthi: “Wathi ebona amaxuku abantu, wawazwela usizi ngoba ayehlukuluzekile futhi elahlelwe iganga njengezimvu ezingelamelusi.” (Mat. 9:36) UJehova yena ke? UJesu wathi: ‘UBaba osezulwini kafisi ukuthi kutshabalale ngitsho loyedwa kulaba abancinyane.’ (Mat. 18:14) Lokhu kuyasithokozisa ngoba siyazibonela ukuthi uJehova uyasithanda. Nxa singabamazi ngcono uJesu, sizamthanda kakhulu uJehova.

7. Kungakunceda njani ukuzinika isikhathi sokuxoxa lamaKhristu athanda uJehova?

⁷ Okunye okuzakunceda ukuthi ube ngumuntu olothando njalo uthuthuke yikuzinika isikhathi sokuxoxa lamaKhristu asebandleni lakho amthandayo uJehova. Nanzelela ukuthi ukumkhonza kwenza bathokoze njani. Abazisoli ngokukhetha ukukhonza uJehova. Bacele bakutshele abahlangane lakho ngesikhathi besebenzela uJehova. Bacele ukuthi bakuncedise nxa ufuna ukwenza isinqumo esiqakathekileyo. Phela siyaphumelela nxa “bebanengi  abeluleki” kumbe kulabantu abanengi abasicebisayo.—Zaga. 11:14.

8. Kuyini okungakunceda nxa usuthandabuza ukuthi okufundiswa liBhayibhili kuliqiniso?

⁸ Lwisana lokuthandabuza. Njengoba kutshiwo  kundima 2, uSathane uzazama ukukuvimba ukuthi ungaqhubeki uthuthuka futhi uqinisa ukholo lwakho. Enye indlela angakwenza ngayo lokhu yikuzama ukwenza ukuthi uthandabuze ezinye izinto ezifundiswa liBhayibhili. Ngokuya kwesikhathi kungenzakala uzwe imfundiso engamanga ethi izinto azidalwanga nguNkulunkulu kodwa zazenzakalela. Engxenye usesengumntwana awuzange ucabangisise ngakho kakhulu kodwa khathesi usufunda ngakho esikolo. Okutshiwo ngababalisi bakho kungakhanya kulengqondo futhi kuzwisiseka. Kodwa kungenzakala ukuthi abazake bacabangisise ngobufakazi bokuthi kuloMdali. Ungakhohlwa amazwi akuZaga 18:17 athi: “Ecaleni okhuluma kuqala ubonakala enguye olungileyo, kuze kuqhamuke omunye ambuzisise.” Kulokuthi uphonguvuma loba yini oyifundiswa esikolo, qala uhlolisise iqiniso eliseLizwini likaNkulunkulu iBhayibhili. Chwayisisa ngendaba le emabhukwini ethu. Xoxa labafowenu labodadewenu ababekholwa ukuthi izinto zazenzakalela. Babuze ukuthi kuyini okwenza bangathandabuzi ukuthi kuloMdali osithandayo. Izingxoxo ezinjalo zizakunceda uthole ubufakazi obunengi bokuthi izinto zadalwa.

9. Ufundani kuMelissa?

⁹ Omunye udade okuthiwa nguMelissa * wancedwa yikuchwayisisa ngendaba yokuthi izinto azidalwanga nguNkulunkulu kodwa zazenzakalela. Wathi: “Esikolo benza indaba yokuzenzakalela kwezinto ikhanye iliqiniso. Ekuqaliseni ngangisesaba ukuqathanisa lokho engikukholwayo lalokho engangikufunda. Ngangisesaba ukuthi ngizathola ukuthi indaba yokuzenzakalela kwezinto iliqiniso. Kodwa ngananzelela ukuthi uJehova kafuni simkhonze singelabufakazi balokho esikukholwayo. Yikho ngaqalisa ukuchwayisisa ngendaba le. Ngabala amabhuku akhuluma ngendalo ngokwesibonelo elithi Is There a Creator Who  Cares About You? lebhukwana elithi Was Life Created? kanye lelithi The Origin of Life—Five Questions Worth Asking. Lokhu kwanginceda kakhulu ngaze ngafisa ukuthi aluba ngakwenza kudala.”

10-11. Kuyini okungakunceda ukuthi ubalekele ukuziphatha okubi? (U-1 Thesalonika 4:3, 4)

¹⁰ Balekela ukuziphatha okubi. Ngesikhathi usakhula isifiso sokuya emacansini siyabe silamandla futhi abanye bengazama ukukwenza ukuthi ufebe. Lokhu yikho kanye uSathane afuna ukwenze. Pho kuyini okungakunceda ukuthi ubalekele ukuziphatha okubi? (Bala u-1 Thesalonika 4:3, 4.) Thandaza utshele uJehova indlela ozizwa ngayo futhi umcele akunike amandla. (Mat. 6:13) Hlala ukhumbula ukuthi uJehova ufisa ukukuncedisa hatshi ukukwahlulela. (Hubo. 103:13, 14) ILizwi lakhe lalo lingakunceda. UMelissa esike sakhuluma ngaye wake walwisana lemicabango yezemacansini. Wathi: “Ukubala iBhayibhili nsuku zonke kwanginceda ukuthi ngiqhubeke ngilwisana lemicabango le. Kwangikhumbuza ukuthi ngiyinceku kaJehova lokuthi ngifuna ukumkhonza.”—Hubo. 119:9.

¹¹ Ungazami ukulungisa inhlupho zakho uwedwa. Tshela abazali bakho okukuhluphayo. Akulula ukukhuluma ngendaba ezinje kodwa kuqakathekile ukukhuluma ngazo. UMelissa wathi: “Ngathandaza ngicela uJehova ukuthi anginike isibindi, ngasengitshela ubaba uhlupho engangilalo. Ngathi sengikhulume laye ngezwa ngcono. Ngangikwazi ukuthi uJehova uyathokoza ngalokho engangikwenzile.”

12. Kuyini okuzakunceda ukuthi wenze izinqumo ezinhle?

¹² Qondiswa yizimiso eziseBhayibhilini. Nxa ulokhu ukhula, abazali bakho bazakuvumela ukuthi uzikhethele ofuna ukukwenza. Kodwa kunengi oyabe ulokhu ungakwazi. Manje kuyini okungakunceda ukuthi ungenzi izinto ezizaphambanisa ubungane bakho loJehova? (Zaga. 22:3) Omunye udade okuthiwa nguKari uyasitshela ukuthi kuyini okwamnceda ukuthi enze izinqumo ezinhle. Wananzelela ukuthi amaKhristu amthandayo uJehova awadingi ukufakelwa imithetho kukho konke akwenzayo empilweni. Wathi: “Kwakumele ngizwisise izimiso eziseBhayibhilini kulokuphongulandela imithetho.” Ngakho nxa ubala iBhayibhili zibuze imibuzo elandelayo: ‘Ngifundani ngoJehova endabeni le? Ilezimiso engingazisebenzisa yini? Nxa zikhona, ukuzilandela kuzanginceda njani?’ (Hubo. 19:7; Isaya. 48:17, 18) Ukubala iBhayibhili lokucabangisisa kuzakunceda ukuthi wenze izinqumo ezithokozisa uJehova. Nxa uqhubeka uthuthuka awusoze ukhangelele ukuphiwa imithetho kuzo zonke izinto ozenzayo ngoba uyabe usuzwisisa indlela uJehova abona ngayo izinto.

13. Abangane abathanda uJehova bangakunceda njani? (IZaga 13:20)

¹³ Khetha abangane abathanda uJehova. Njengoba sesitshilo, abangane obakhethayo bangakunceda ukuthi uqhubeke uqinisa ukholo lwakho kumbe bakubuyisele emuva. (Bala iZaga 13:20.) Omunye udade okuthiwa nguSara wayengasakukholisi ukukhonza uJehova. Kodwa kukhona okwenzakalayo okwamnceda ukuthi aphinde athokoze. USara wathi: “Ngesikhathi leso ngathola abangane abathanda uJehova. Kwakulomunye udade osakhulayo engangitaditsha laye iNqabayokulinda maviki wonke. Omunye umngane wami wangincedisa  ukuthi ngiqalise ukuphendula emihlanganweni. Abangane bami laba banginceda ukuthi ngiqakathekise ukutaditsha ngingedwa lokuthi ngihlale ngithandaza. Ubungane bami loJehova baqina, ngaqalisa ukukholisa ukumkhonza.”

14. UJulien wabathola njani abangane abathanda uJehova?

¹⁴ Kuyini okungakunceda ukuthi uthole abangane abathanda uJehova? Omunye umdala webandla okuthiwa nguJulien wathi: “Ngisakhula ngaba lobungane lalabo engangitshumayela labo. Babetshiseka futhi banginceda ngabona ukuthi ukutshumayela kumnandi sibili. Kusukela lapho ngaqalisa ukuba lesifiso sokuphayona. Ngananzelela ukuthi ngangikhutheka ngokuba labangane abalingana lami kuphela. Ngokuhamba kwesikhathi ngathola abanye abangane eBhetheli. Banginceda ukuthi ngikhethe kuhle ezokuzilibazisa futhi lokhu kwaqinisa ubungane bami loJehova.”

15. UPhawuli wathini kuThimothi ngabangane? (U-2 Thimothi 2:20-22)

¹⁵ Kumele wenzeni nxa ungananzelela ukuthi abanye abangane olabo ebandleni bangakuphambanisa ekukhonzeni uJehova? UPhawuli wayekwazi ukuthi abanye ebandleni babengaqinanga ekukhonzeni yikho waxwayisa uThimothi ukuthi angadlelani labo. (Bala u-2 Thimothi 2:20-22.) Ubungane esilabo loJehova buligugu. Akumelanga sivumele loba ngubani ukuthi aphambanise ubungane lobu esibusebenzele nzima kangaka.—Hubo. 26:4.

16. Kuyini ongahlela ukukwenza?

¹⁶ Hlela lokho ofuna ukukwenza. Khetha ukwenza izinto ezizaqinisa ukholo lwakho zikuncede uthuthuke. (Efe. 3:16) Zama ngamandla ukuhlala utaditsha lokubala iBhayibhili nsuku zonke. (Hubo. 1:2, 3) Okunye ongakwenza yikukhuleka zikhathi zonke utshela uJehova konke okusenhliziyweni yakho. Kanti njalo khetha kuhle izinto ozibukelayo futhi usisebenzise kuhle isikhathi sakho. (Efe. 5:15, 16) UJehova uzathokoza nxa ekubona usebenza nzima ukuze uthuthuke.

17. Kuzakunceda njani ukuncedisa abanye?

 ¹⁷ Ukuncedisa abanye kuzakunceda ukuthi uthuthuke. UJesu wathi: “Ukupha kuyathokozisa kakhulu ukwedlula ukwamukela.” (ImiSeb. 20:35) Uzathokoza kakhulu nxa ungasebenzisa amandla akho lesikhathi sakho ukuze uncedise abanye. Ungahlela ukuncedisa abagugileyo labangaphilanga kuhle emzimbeni abasebandleni okulo. Ungahamba uyebathengela abakufunayo kumbe ubancedise bakwazi ukusebenzisa amafoni loba ama-tablet abo. Nxa ungumzalwane ungasebenzela ukuba yinceku ekhonzayo ukuze uncedise abafowethu labodadewethu. (Flp. 2:4) Ungatshengisa lokuthi uyabathanda labo abangakhonziyo ngokubatshela izindaba ezinhle zoMbuso. (Mat. 9:36, 37) Nxa kusenza hlela ukuba liphayona, ukusebenza eBhetheli kumbe emsebenzini wokwakha izakhiwo zenhlanganiso.

18. Ukwenza okunengi emsebenzini kaJehova kungakunceda njani ukuthi uthuthuke ekukhonzeni?

¹⁸ Ukwenza okunengi emsebenzini kaJehova kuzakunceda ukuthi uthole amathuba amanengi azakunceda ukuthi uthuthuke. Nxa uphayona ungaya eSikolo Sabavangeli BoMbuso kumbe uyesebenza eBhetheli loba uncedise emsebenzini wokwakha izakhiwo zenhlanganiso. Omunye udade osakhulayo okuthiwa nguKaitlyn wathi: “Ukutshumayela labafowethu labodadewethu asebelesikhathi eside bekhonza uJehova kwanginceda ukuthi ngithuthuke ngemva kokubhabhathizwa. Isibonelo sabo sangenza ngafisa ukuthi ngilazi kuhle iBhayibhili lokuthi ngithuthukise indlela engangifundisa ngayo.”

19. Yiziphi izibusiso ozazithola nxa uqhubeka uthuthuka?

¹⁹ Nxa ulokhu uqhubeka uthuthuka futhi uqinisa ukholo lwakho uzathola izibusiso ezinengi. Awusoze udlalise amandla akho ugijimisana lezinto ezingancediyo. (1 Joh. 2:17) Awusoze wenze izinqumo ezimbi ezizakuthela emanyaleni kodwa uzathokoza, uphumelele empilweni. (Zaga. 16:3) Okwenzayo kuzakhuthaza abafowethu labodadewethu abadala labancane. (1 Tim. 4:12) Kanti njalo okuqakatheke kulakho konke yikuthi uzaba lokuthula futhi usuthiseke ngenxa yokuthi uyabukhonza uJehova njalo ungumngane wakhe.—Zaga. 23:15, 16.