1. Kungani uJesu wacela ukuthi uJehova avikele abalandeli bakhe?

 NGOBUSUKU bokucina uJesu engakabulawa wacela into eqakathekileyo kuYise osezulwini. Wacela ukuthi uJehova avikele abalandeli bakhe. (Joh. 17:15, 20) UJehova uhlala ebanakekela futhi ebavikela abantu bakhe. Kodwa uJesu wayekwazi ukuthi uSathane uzabathwalisa nzima. Wayekwazi lokuthi abalandeli bakhe babengasoze benelise ukumnqoba bebodwa uSathane. Kwakuzamele bancediswe nguJehova.

2. Ngokwalokho okutshiwo kuHubo 33:18-20, kungani kungamelanga sesabe nxa sisehlelwa zinhlupho?

² Umhlaba lo obuswa nguSathane wenza ukuthi amaKhristu eqiniso ehlelwe zinhlupho ezinengi. Inhlupho zingasiqeda amandla, zenze kube nzima ukuthi siqhubeke sithembekile kuJehova. Isihloko lesi sizasinceda sibone ukuthi akumelanga sesabe nxa sisehlelwa zinhlupho ngoba uJehova uyabubona ubunzima esihlangana labo futhi uzimisele ukusincedisa ukuthi silwisane labo. Asihloleni izibonelo ezitshengisa ukuthi “amehlo kaJehova akulabo abamesabayo.”—Bala iHubo 33:18-20.

3. Kuyini okungenza sicabange ukuthi sisodwa?

³ Lanxa singabe sisebandleni elilabantu abanengi, kungaba lezikhathi lapho esiyabe sibona angani sisodwa. Ngokwesibonelo abasakhulayo bangacabanga ukuthi akulamuntu ongabancedisa nxa sekumele bachasisele abafunda labo esikolo izinto abazikholwayo. Nxa bangathuthela kwelinye ibandla bangezwa belesizungu. Abanye bethu singadana kumbe sihlulukelwe besesibona angani kumele silwisane lobuhlungu esibuzwayo sisodwa. Singadonda ukutshela abanye esikuzwayo sicabanga ukuthi ngeke basizwisise. Kwesinye isikhathi singabona angathi akulamuntu olendaba lathi. Ukucabanga ukuthi  sisodwa kungasenza sikhathazeke futhi sizibone singelancedo. Kodwa uJehova kafuni sicabange njalo. Kungani sisitsho njalo?

4. Kuyini okwenza umphrofethi u-Elija wathi: “Yimi ngedwa esengisele”?

⁴ Asixoxeni ngalokho okwenzakala ku-Elija, indoda eyayithembekile. Wabaleka okwamalanga adlula angu-40 ngenxa yokuthi uJezebheli wayefuna ukumbulala. (1 AmaKho. 19:1-9) Wathi ephakathi kobhalu wathi kuJehova: “Yimi ngedwa [umphrofethi] esengisele.” (1 AmaKho. 19:10) Kodwa babekhona abanye abaphrofethi elizweni. Phela u-Obhadiya wayefihle abangu-100 ukuze bangabulawa nguJezebheli. (1 AmaKho. 18:7, 13) Pho kungani u-Elija wayecabanga ukuthi usele yedwa? Mhlawumbe wayecabanga ukuthi abaphrofethi ababefihlwe ngu-Obhadiya basebebulewe bonke. Engxenye okunye okwamenza wacabanga ukuthi uyedwa yikuthi abantu babelokhu bengafuni ukukhonza uJehova lanxa wayebatshengisile ukuthi unguNkulunkulu weqiniso. Kungenzakala lokuthi u-Elija wayecabanga ukuthi akulamuntu okwaziyo ukuthi impilo yakhe isengozini kumbe wayezitshela ukuthi akulamuntu olendaba laye. IBhayibhili alisitsheli ukuthi kuyini okwamenza wacabanga ukuthi uyedwa. Kodwa esingakuthandabuziyo yikuthi uJehova wayezwisisa sibili ukuthi kungani u-Elija wayecabanga ukuthi uyedwa futhi wayekwazi ukuthi angamncedisa njani.

5. UJehova wamqinisekisa njani u-Elija ukuthi wayengayedwa?

⁵ UJehova wancedisa u-Elija ngendlela ezitshiyeneyo. Wamkhuthaza ukuthi amtshele okusenhliziyweni yakhe. Wambuza kabili wathi: “Wenzani khonapha?” (1 AmaKho. 19:9, 13) UJehova wamlalela ngesikhathi ekhuluma lokho okusenhliziyweni yakhe. Watshengisa u-Elija ukuthi wayelaye lokuthi ulamandla amakhulu. Wamtshela lokuthi kwakulabantu abanengi ababelokhu bekhonza uJehova. (1 AmaKho. 19:11, 12, 18) Akuthandabuzwa ukuthi u-Elija wezwa esehlalisekile ngemva kokutshela uJehova lokho okwakusenhliziyweni yakhe lokuzwa impendulo yakhe. UJehova waphinda wamnika eminye imisebenzi eqakathekileyo. Wamtshela ukuthi  agcobe uHazayeli ukuthi abe yinkosi yaseSiriya lokuthi agcobe uJehu ukuthi abe yinkosi yako-Israyeli, abesegcoba u-Elisha ukuthi abe ngumphrofethi. (1 AmaKho. 19:15, 16) UJehova wanika u-Elija imisebenzi le ukuze amncede angacabangi kakhulu ngobunzima ayephakathi kwabo. Waphinda wamnika lomngane owayezamncedisa, u-Elisha. UJehova angakuncedisa njani nxa ucabanga ukuthi uwedwa?

6. Kuyini ongakutsho emithandazweni yakho nxa ucabanga ukuthi uwedwa? (IHubo 62:8)

⁶ UJehova ufuna ukuthi ukhuleke kuye. Uyazibona inhlupho olazo futhi uyakuqinisekisa ukuthi uzayilalela imithandazo yakho loba ngasiphi isikhathi. (1 Thes. 5:17) Kuyamthokozisa ukulalela imithandazo yezinceku zakhe. (Zaga. 15:8) Kuyini ongakutsho emithandazweni yakho nxa ubona angani akulamuntu olendaba lawe? Tshela uJehova konke okusenhliziyweni yakho njengokwenziwa ngu-Elija. (Bala iHubo 62:8.) Mtshele lokho okukukhathazayo. Mcele ukuthi akuncedise nxa udanile. Ngokwesibonelo nxa ucabanga ukuthi uwedwa futhi usesaba ukuchasisela ofunda labo lokho okukholwayo, mcele uJehova akunike isibindi sokukhuluma labo. Ungamcela lokuthi akuncedise ukuthi uchasise lokho okukholwayo ngendlela engasoze icaphule abanye. (Luk. 21:14, 15) Nxa udanile cela uJehova akuncedise ukuthi ukhulume lomKhristu oqinileyo ekukhonzeni umtshele indlela ozizwa ngayo. Ungacela lokuthi uJehova ancedise umuntu ozaxoxa laye ukuthi azwisise okukukhathazayo. Ngakho okungakunceda nxa ucabanga ukuthi uwedwa yikutshela uJehova konke okusenhliziyweni yakho, lokunanzelela indlela aphendula ngayo imithandazo yakho kanye lokuvuma ukuncediswa ngabanye.

7. Sifundani kulokho okwenzakala kuMauricio?

⁷ UJehova usinike imisebenzi eqakathekileyo okumele siyenze. Qiniseka ukuthi uyakubona futhi uyakuqakathekisa konke omenzela khona ebandleni lasekutshumayeleni. (Hubo. 110:3) Ukukhuthala emisebenzini le kungakunceda njani nxa ucabanga ukuthi uwedwa? Asixoxeni ngalokho okwenzakala kumfowethu osakhulayo okuthiwa nguMauricio. * Esanda kubhabhathizwa nje, umngane wakhe waqalisa ukungaqakathekisi izinto zokukhonza wacina esetshiye ibandla. UMauricio wathi. “Ngathi ngimbona etshiya ukukhonza uJehova, lami ngangingasazithembi. Ngazibuza ukuthi ngizakwenelisa yini ukugcwalisa isifungo engasenzayo sokukhonza uJehova, ngiqhubeke ngimanyene labantu bakhe. Ngasengibona angani ngingedwa, ngicabanga lokuthi akulamuntu ongazwisisa indlela engizizwa ngayo.” Manje kuyini okwanceda uMauricio? Wathi: “Ngakhuthala ekutshumayeleni. Lokhu kwanginceda ukuthi ngingakhathazeki kakhulu ngalokho okwakungihlupha. Ukutshumayela labanye kwanginceda ukuthi ngithokoze lokuthi ngingaziboni  ngingedwa.” Lanxa singenelisi ukuhlangana labafowethu labodadewethu ukuze siye ekutshumayeleni, kuyasikhuthaza ukutshumayela labo ngefoni kumbe ngokubhala izincwadi. Kuyini okunye okwanceda uMauricio? Wathi: “Ngakhuthala lasemisebenzini yebandla. Ngangiyilungiselela ngenhliziyo yonke imihlangano kanye lezinkulumo engangiziphiwa. Ukwenza konke lokhu kwangenza ngabona ukuthi uJehova labanye ebandleni bayangithanda sibili.”

8. Inhlupho ezisehlelayo zingenza sizwe njani?

⁸ Siyakwazi ukuthi singehlelwa zinhlupho njengoba siphila ezinsukwini zokucina. (2 Tim. 3:1) Lanxa kunjalo, singaphela amandla nxa singehlelwa luhlupho ebesingalukhangelelanga. Ezomnotho zingavuka zitshintshile loba sibanjwe ngumkhuhlane oyingozi kumbe sifelwe ngumuntu esimthandayo. Nxa silokhu siqhubeka sisehlelwa zinhlupho zilandelana, singakhathazeka siphele amandla. Kumele sihlale sikhumbula ukuthi uJehova uyabubona ubunzima bonke esiphakathi kwabo futhi uzasincedisa ukuthi silwisane lenhlupho esikuzo.

9. Yibuphi ubunzima obehlela uJobe?

⁹ Akucabange ukuthi uJehova wayincedisa njani indoda eyayithembekile okwakuthiwa nguJobe. UJobe wehlelwa zinhlupho ezinengi ngesikhathi esifitshane. Ngelanga elilodwa nje watshontshelwa izifuyo zakhe zonke futhi ezinye zabulawa. Watshelwa lokuthi izinceku zakhe lazo zazibulewe. Okubuhlungu kakhulu yikuthi labantwabakhe bafa. (Jobe. 1:13-19) Esathi usakhalela abantwabakhe, uJobe wabanjwa ngumkhuhlane obuhlungu. (Jobe. 2:7) Wayephakathi kobuhlungu obukhulu waze wathi: “Ngiyayeyisa impilo yami; kangiloyisi ukuphila okwaphakade.”—Jobe. 7:16.

10. UJehova wamncedisa njani uJobe ukuthi abekezelele inhlupho ayelazo? (Khangela umfanekiso ongaphandle.)

¹⁰ UJehova wayekubona konke okwakusenzakala kuJobe. Wamncedisa ukuthi abekezelele inhlupho ayelazo lokuthi aqhubeke ethembekile ngoba wayemthanda. Wakhuluma laye emkhumbuza ukuthi inhlakanipho yakhe ijule kakhulu lokuthi uyakunakekela konke akudalayo. UJehova wakhuluma langezinyamazana ezinengi ezimangalisayo. (Jobe. 38:1, 2; 39:9, 13, 19, 27; 40:15; 41:1, 2) UJehova waphinda wasebenzisa u-Elihu ukuthi akhuthaze uJobe njalo amduduze. U-Elihu wamqinisekisa ukuthi uJehova uyazipha umvuzo zonke izinceku zakhe eziqiniselayo phakathi kobunzima. UJehova wameluleka kuhle uJobe esebenzisa u-Elihu. U-Elihu wanceda uJobe ukuthi angacabangi kakhulu ngenhlupho zakhe ngokumkhumbuza ukuthi thina sibancane kakhulu nxa siqathaniswa loMdali womhlaba wonke. (Jobe. 37:14) UJehova waphinda watshela uJobe ukuthi kwakumele athandazele abangane bakhe abathathu ababewonile. (Jobe. 42:8-10) Thina uJehova usisekela njani nxa siphakathi kwenhlupho?

11. IBhayibhili lisiduduza njani nxa siphakathi kwenhlupho?

¹¹ Khathesi uJehova usebenzisa iBhayibhili ukuze akhulume lathi. (Rom. 15:4) Uyasiduduza ngokusinika ithemba. Akucabange amanye amavesi asiduduzayo nxa siphakathi kwenhlupho. EBhayibhilini uJehova uyasiqinisekisa ukuthi akulalutho ‘olungasehlukanisa lothando lwakhe,’ ngitsho lenhlupho ezinzima ngeke zisehlukanise laye. (Rom. 8:38, 39) Uphinda asitshele ukuthi “useduze kulabo” abathandaza kuye. (Hubo. 145:18) UJehova usitshela ukuthi nxa singamthemba singenelisa ukubekezelela loba yibuphi ubunzima esiphakathi kwabo, sithokoze lanxa siphakathi kwenhlupho. (1 Khor. 10:13; Jak. 1:2, 12)  ILizwi likaNkulunkulu liphinda lisikhumbuze ukuthi inhlupho zethu ngezesikhathi esifitshane nxa ziqathaniswa lomvuzo wempilo engapheliyo esizawuthola. (2 Khor. 4:16-18) UJehova uphinda asithembise ukuthi uzasusa uSathane uDeveli obangela inhlupho zethu, aphinde asuse labo bonke abalingisela izenzo zakhe ezimbi. (Hubo. 37:10) Akhona yini amavesi owabambe ngekhanda akunceda ukuthi uqinisele nxa uphakathi kwenhlupho?

12. UJehova ukhangelele ukuthi senzeni ukuze sincedwe liLizwi lakhe?

¹² UJehova ukhangelele ukuthi sizinike isikhathi sokubala iBhayibhili nsuku zonke futhi sicabangisise ngalo. Nxa sisebenzisa lokho esikufundayo ukholo lwethu luyaqina njalo siyasondela kuBaba wethu osezulwini. Lokhu kuyasinceda ukuthi siqinisele nxa siphakathi kwenhlupho. UJehova uphinda abaphe umoya wakhe ongcwele labo abathemba iLizwi lakhe. Umoya wakhe usinika “amandla amakhulu futhi angajayelekanga” ukuze sibekezelele loba yibuphi ubunzima esiphakathi kwabo.—2 Khor. 4:7-10.

13. Ukudla okuqinisa ukholo esikunikwa ‘yinceku ethembekileyo lehlakaniphileyo’ kusinceda njani?

¹³ UJehova uncedisa ‘inceku ethembekileyo lehlakaniphileyo’ ukuthi ibhale izihloko ezisiqinisa ukholo njalo yenze amavidiyo lengoma ezisinceda ukuthi sihlale siseduze laye. (Mat. 24:45) Kumele sikusebenzise konke uJehova asipha khona. Omunye udadewethu ohlala e-United States wathi: “Okweminyaka engu-40 ngikhonza uJehova, bengihlala ngisehlelwa yizinto ebezingaxegisa ukholo lwami.” Ukhulu kadade lo watshaywa yimota eyayitshayelwa ngumuntu odakiweyo, wafa. Phezu kwalokho abazali bakhe babulawa ngumkhuhlane oyingozi, yena wabanjwa yimvukuzane kabili. Kuyini okwamnceda ukuthi aqinisele? Uyabonga kakhulu ngakho konke esikunikwa nguJehova ukuthi siqinise ukholo lwethu. Uthi: “UJehova uhlala enginakekela. Ukudla okuqinisa ukholo asinika khona esebenzisa inceku ethembekileyo lehlakaniphileyo kungincede ukuthi ngiqinisele. Lami ngingawatsho ngikhululekile amazwi akhulunywa nguJobe owathi, ‘Ngizaze ngiyekufa ngingabulandulanga ubuqotho bami.’”—Jobe. 27:5.

14. UJehova usincedisa njani esebenzisa abafowethu labodadewethu? (U-1 Thesalonika 4:9)

¹⁴ UJehova ufundise abantu bakhe ukuthi bathandane njalo baduduzane ngezikhathi ezinzima. (2 Khor. 1:3, 4; bala u-1 Thesalonika 4:9.) Abafowethu labodadewethu balingisela u-Elihu ngokuzimisela ukusinceda ukuthi sihlale sithembekile kuJehova nxa siphakathi  kobunzima. (ImiSeb. 14:22) Lokhu yikho okwenziwa ngabafowethu labodadewethu abasebandleni likaDiane. Bamnceda ukuthi aqhubeke emkhonza kuhle uJehova ngesikhathi umkakhe ebanjwe umkhuhlane oyingozi. UDiane wathi: “Kwakunzima. Kodwa sazibonela ngawethu isandla sikaJehova esilamandla kanye lokuthi uyasithanda. Abafowethu ebandleni babezimisele ukusincedisa. Babesigona basiduduze futhi babesivakatshela baphinde basifonele. Konke lokhu kwenza sathola amandla okuqinisela. Njengoba ngingakwazi ukudrayiva, abafowethu labodadewethu baba leqiniso lokuthi bayangihambisa emihlanganweni lasekutshumayeleni.” Kuyasithokozisa kakhulu ukuthi ebandleni kulabafowethu labodadewethu abalothando olungaka!

15. Kungani singathandabuzi ukuthi singenelisa ukubekezelela inhlupho esiphakathi kwazo?

¹⁵ Sonke sizakwehlelwa zinhlupho. Kodwa esesikufundile kwenza sibone ukuthi asisoze silwisane lenhlupho zethu sisodwa. UJehova uBaba wethu osithandayo uzahlala esinakekela. Useduze lathi njalo uzimisele ukuzwa imithandazo yethu lokusincedisa. (Isaya. 43:2) Sileqiniso lokuthi sizakwenelisa ukubekezelela inhlupho ngoba usinike konke okusinceda ukuthi siqinisele. Usinike iBhayibhili lezinto ezinengi ezisiqinisa ukholo njalo uyasivumela ukuthi sithandaze kuye. Kanti njalo usinike labafowethu labodadewethu ukuze basincedise ngezikhathi ezinzima.

16. Singenzani ukuze uJehova ahlale esinakekela?

¹⁶ Siyambonga kakhulu uBaba wethu osezulwini ngokusinakekela. “Izinhliziyo zethu zithokoza ngaye.” (Hubo. 33:21) Kodwa kukhona okumele lathi sikwenze ukuze aqhubeke esinakekela. Singatshengisa ukuthi siyambonga uJehova ngokusebenzisa konke asinike khona ukuze asincedise. Nxa singaqhubeka sizama ngamandla ethu wonke ukumlalela lokwenza okulungileyo, uzasincedisa kuze kube nini lanini!—1 Phet. 3:12.