1. Kuyini amadoda angamaKhristu okumele akwenze ukuze athuthuke?

 INKOSI uDavida yalaya uSolomoni yathi: “Qina ube yindoda.” (1 Amakho. 2:​1-3) Wonke amadoda angamaKhristu afuna ukuthuthuka kungawanceda ukulalela amazwi la. Kumele afunde ukulalela imithetho kaNkulunkulu lokusebenzisa izimiso eziseBhayibhilini kukho konke akwenzayo ukuze athuthuke. (Luk. 2:52) Kungani kuqakathekile ukuthi abafowethu abasakhulayo bathuthuke?

2-3. Kungani kuqakathekile ukuthi umfowethu osakhulayo athuthuke?

² Indoda engumKhristu ilemisebenzi eqakathekileyo emulini lasebandleni. Bafowethu abasakhulayo akuthandabuzwa ukuthi liyake licabange ngemisebenzi elingaba layo esikhathini esizayo. Mhlawumbe ufuna ukuba senkonzweni yesikhathi sonke kumbe ukuba yinceku ekhonzayo lokuthi ngokuhamba kwesikhathi ube ngumdala webandla. Engxenye uyafisa ukuthi utshade futhi ube labantwana. (Efe. 6:4; 1 Thim. 3:1) Nxa ufuna ukuphumelela ukwenza izinto lezi kumele uthuthuke. b

³ Kuyini okuzakunceda ukuthi uthuthuke? Kulezinto eziqakathekileyo okumele uzifunde futhi uzenze kuhle. Manje kuyini ongakwenza khathesi ukuze ulungiselele imisebenzi ongayenza esikhathini esizayo futhi uphumelele ukuyenza?

4. Ungabathola ngaphi abantu abalobuntu obuhle ongabalingisela? (Khangela lomfanekiso.)

⁴ Khetha abantu abenza kuhle ongabalingisela. Abafowethu abasakhulayo bangalingisela izibonelo ezinengi eziseBhayibhilini  ezamadoda ayesenza kuhle. Amadoda lawo ayemthanda uNkulunkulu futhi enza imisebenzi eminengi ukuze ancedise abantu bakhe. Lalamuhla akhona amanye amadoda ayenza kuhle ongawalingisela. Ungawathola emulini yangakini lasebandleni. (Heb. 13:7) Kanti njalo omunye umuntu owayesenza kuhle kakhulu ongamlingisela nguJesu Khristu. (1 Phet. 2:21) Ngesikhathi ufunda ngabantu laba njalo uhlola indlela ababephila ngayo, cabangisisa ngobuntu babo obuhle. (Heb. 12:​1, 2) Ngemva kwalokho uzame ukubona ukuthi ungabalingisela njani.

5. Ungenzani ukuze wenelise ukusebenzisa kuhle ingqondo futhi kungani kuqakathekile lokhu? (IHubo 119:9)

⁵ ‘Hlala usebenzisa kuhle ingqondo.’ (Zaga. 3:21) Indoda esebenzisa kuhle ingqondo kayenzi izinto ngamawala kodwa iqala icabangisise ibisikhetha kuhle ezakwenza. Ngakho sebenza nzima ukuze lawe wenelise ukusebenzisa kuhle ingqondo. Kungani kuqakathekile? Kungenxa yokuthi emhlabeni lo abasakhulayo abanengi balandela lokho abakutshelwa zinhliziyo zabo labazicabangela khona. (Zaga. 7:7; 29:11) Okunye okungaphambanisa indlela ocabanga ngayo yizinto eziphuma kuma-TV, amafilimu, ku-inthanethi lakwezokukhulumisana zakulezinsuku. Manje ungenzani ukuze wenelise ukusebenzisa kuhle ingqondo? Okokuqala ongakwenza yikuhlola izimiso eziseBhayibhilini ubusucabangisisa ngokuthi zingakunceda njani. Ngemva kwalokho sebenzisa izimiso lezo nxa usenza izinqumo ukuze ukhethe lokho okuzathokozisa uJehova. (Bala iHubo 119:9.) Nxa ungafunda ukusebenzisa kuhle ingqondo uyabe usufunde into eqakathekileyo ezakunceda ukuthi uthuthuke. (Zaga. 2:​11, 12; Heb. 5:14) Khathesi asixoxeni ngokuthi ukusebenzisa kuhle ingqondo kuzakunceda njani (1) endleleni ophatha ngayo odadewethu, (2) nxa usenza izinqumo eziphathelane lokugqoka lokuzilungisa.

6. Umfowethu osakhulayo angatshengisa njani ukuthi uyabahlonipha odadewethu?

⁶ Ukusebenzisa kuhle ingqondo kuzakunceda ukuthi uhloniphe abesifazana. Kuqondile ukuthi umfowethu osakhulayo afise ukuba lobudlelwano lomunye udade ebandleni. Lanxa kunjalo, umfowethu osakhulayo osebenzisa kuhle ingqondo ngeke atsho kumbe abhale loba enze  izinto ezingenza udade acabange ukuthi ufuna bathandane ngaphandle nxa kuyikuthi ulesifiso sokuthi ngelinye ilanga angatshada lodade lo. (1 Thim. 5:​1, 2) Nxa kulodade athandana laye, kumele abe leqiniso lokuthi kababi bodwa endaweni engelabantu ukuze udade ahlale ekhulunyelwa kuhle.—1 Khor. 6:18.

7. Umfowethu osakhulayo angatshengisa njani ukuthi uyisebenzisa kuhle ingqondo nxa ekhetha lokho azakugqoka kumbe ezilungisa?

⁷ Indlela umfowethu osakhulayo agqoka ngayo lazilungisa ngayo layo iyatshengisa ukuthi uyisebenzisa kuhle yini ingqondo. Abantu abanengi ababuya lezitayila ezintsha zefeshini ngabantu abangelandaba lemithetho kaJehova loba abangaziphathanga. Ngakho izigqoko abazenzayo ziyabamba kakhulu futhi ezinye zenza amadoda akhangeleke njengabesifazana. Okunye okutshengisa ukuthi umfowethu osakhulayo uyathuthuka yikulandela izimiso eziseBhayibhilini nxa ekhetha lokho azakugqoka lokulingisela izibonelo zabanye abenza kuhle abasebandleni. Angazibuza ukuthi: ‘Izinto engizikhethayo ziyatshengisa yini ukuthi ngiyazwisisa izimiso eziseBhayibhilini lokuthi ngilendaba labanye? Indlela engigqoka ngayo iyatshengisa yini ukuthi ngikhonza uNkulunkulu?’ (1 Khor. 10:​31-33; Tit. 2:6) Umfowethu osakhulayo oyisebenzisa kuhle ingqondo yakhe uzahlonitshwa ngabafowabo labodadewabo futhi athandwe nguYise osezulwini.

8. Umfowethu osakhulayo angenzani ukuze athenjwe?

⁸ Woba ngumuntu othenjwayo. Kulula ukuthi abantu bathembe umfowethu osakhulayo oyenza kuhle yonke imisebenzi ayiphiwayo. (Luk. 16:10) Cabanga ngalokho okwenziwa nguJesu. Wayengayithathi lula imisebenzi ayeyiphiwa nguJehova kodwa wayeyenza ngenhliziyo yonke lanxa kwezinye izikhathi kwakunzima ukuthi ayenze. UJesu wayebathanda abantu ikakhulu abafundi bakhe, yikho waze wazimisela ukubafela. (Joh. 13:1) Lingisela uJesu ngokusebenza nzima kuyo yonke imisebenzi oyiphiwayo. Nxa ungakwazi ukuthi umsebenzi othile kumele uwenze njani, zithobe ucele ukuncediswa ngabazalwane abalolwazi. Woba ngumuntu okhutheleyo, ungenzi okulutshwana nje okukhangelelweyo. (Rom. 12:11) Kodwa wenze wonke umsebenzi owuphiweyo futhi uwenze kuhle ‘angathi usebenzela uJehova hatshi abantu.’ (Kol. 3:23) Ukunanzelela ukuthi ulesono kuzakunceda ukuthi uthobeke uvume nxa uphambanisile.—Zaga. 11:2.

9. Kungani kuqakathekile ukuthi umfowethu osakhulayo afunde imisebenzi ethile?

⁹ Ukufunda imisebenzi ongayenza empilweni kuzakwenza uthuthuke. Lokho kuzakunceda ukuthi uyenze kuhle imisebenzi oyiphiwayo ebandleni lokuthi uthole umsebenzi ozakunceda uzinakekele wena kanye lemuli yakho. Kanti njalo kuzakunceda ube lobudlelwano obuhle labanye. Asixoxeni ngezinto ongazifunda.

10-11. Kungani kuqakathekile ukuthi umfowethu osakhulayo abekwazi ukubala kuhle lokubhala? (IHubo 1:​1-3) (Khangela lomfanekiso.)

¹⁰ Funda ukubala lokubhala. IBhayibhili lithi  nxa indoda ifuna ukuthokoza lokuphumelela kumele izinike isikhathi sokubala iLizwi likaNkulunkulu njalo icabangisise ngekubalayo. (Bala iHubo 1:​1-3.) Nxa ingabala iBhayibhili nsuku zonke izazwisisa ngcono indlela uJehova acabanga ngayo. Lokhu kuzayinceda ukuthi ikhaliphe futhi yenelise ukusebenzisa lokho ekufundayo empilweni yayo. (Zaga. 1:​3, 4) Kungani amadoda anjalo efuneka ebandleni?

¹¹ Abafowethu labodadewethu bayancedakala kakhulu nxa ebandleni kulamadoda enelisa ukufundisa kuhle futhi anika izeluleko ezivela eBhayibhilini. (Tit. 1:9) Nxa ukwazi ukubhala lokubala uzenelisa ukulungiselela izinkulumo lezimpendulo ezizanceda abanye njalo ziqinise ukholo lwabo. Uzenelisa lokubhala imicijo oyitholileyo ngesikhathi utaditsha kumbe usemhlanganweni webandla, owesiqinti kumbe owesabelo. Imicijo leyo izakunceda ukuthi uqinise ukholo lwakho futhi ukhuthaze labanye.

12. Kuyini okuzakunceda ukuthi ukhulume kuhle labanye?

¹² Funda ukukhuluma kuhle labanye. Indoda engumKhristu kumele ifunde ukukhuluma kuhle labanye. Indoda ekhuluma kuhle labanye iyalalelisisa nxa bekhuluma, yamukele imibono yabo futhi izwisise lendlela abazizwa ngayo. (Zaga. 20:5) Iyenelisa ukuzwisisa indlela umuntu azizwa ngayo ngokunanzelela indlela akhuluma ngayo lesimo sobuso bakhe kanye lalokho akwenzayo. Okuzakunceda ukuthi ukufunde lokhu yikuzinika isikhathi sokutshona labantu. Ukuhlala ukhuluma labantu ngezempucuko kungenza kube nzima ukukhuluma labo likhangelene. Ngakho zinike isikhathi sokuxoxa labanye likhangelene.—2 Joh. 12.

13. Kuyini okunye okumele umzalwane osakhulayo akufunde? (U-1 Thimothi 5:8) (Khangela lomfanekiso.)

¹³ Dinga indlela yokuziphilisa. Indoda eqinileyo ekukhonzeni kumele yenelise ukuzinakekela lokondla imuli yayo. (Bala u-1 Thimothi 5:8.) Kwamanye amazwe abafowethu abasakhulayo bafundiswa ngoyise kumbe yizihlobo ukwenza imisebenzi etshiyeneyo. Kwezinye indawo amajaha asakhulayo angafunda imisebenzi yezandla esasesikolo. Kungelani lokuthi kuyini okujayelekileyo endaweni yakini, okuqakathekileyo yikuthi ufundele umsebenzi ozakunceda empilweni. (Imiseb. 18:​2, 3; 20:34; Efe. 4:28) Sebenza nzima kuloba yiwuphi umsebenzi owenzayo futhi uzimisele ukuqeda konke okuqalisayo. Nxa ungenza njalo kuzakuba lula ukuthi uthole umsebenzi futhi uwugcine. Nxa ungaba lobuntu obuthokozisa uJehova futhi ufunde lezinto ezingakunceda empilweni kuzakuba lula ukwenza imisebenzi ongaba layo esikhathini esizayo. Asixoxeni ngeminye yakhona.

14. Umfowethu osakhulayo angakulungiselela njani ukuba senkonzweni yesikhathi sonke?

¹⁴ Ukuba senkonzweni yesikhathi sonke. Amadoda amanengi athanda uJehova ajayele ukuqalisa inkonzo yesikhathi sonke esesengamajaha. Ukuphayona kunganceda ijaha ukuthi lenelise ukusebenza kuhle labantu abatshiyeneyo. Kuyalinceda lokuthi lenelise ukusebenzisa kuhle imali lokusuthiseka. (Flp. 4:​11-13) Okuzakunceda ukuthi uqalise inkonzo yesikhathi sonke yikuba liphayona elisizayo. Abanengi baba ngamaphayona asizayo okwesikhathi esithile njalo lokhu kuyabanceda nxa sebeqalisa ukuphayona okwesikhathi sonke. Ukuphayona kungakunceda ukuthi uthole ithuba lokwenza eminye imisebenzi yesikhathi sonke, njengokusebenza eBhetheli lokwakha izakhiwo zenhlanganiso.

15-16. Umfowethu osakhulayo kumele enzeni ukuze enelise ukuba yinceku ekhonzayo kumbe ukuba ngumdala?

¹⁵ Ukuba yinceku ekhonzayo kumbe ukuba ngumdala. Amadoda angamaKhristu kumele asebenze nzima ukuthi abe ngabadala bebandla ukuze ancedise abafowethu labodadewethu. IBhayibhili lithi amadoda alalamela umsebenzi lo ‘afisa umsebenzi omuhle.’ (1 Thim. 3:1) Umzalwane kumele aqale abe yinceku ekhonzayo engakabi ngumdala webandla. Inceku ezikhonzayo zincedisa abadala ngemisebenzi eminengi etshiyeneyo. Abadala lezinceku ezikhonzayo bayazithoba bancedise abafowethu labodadewethu futhi bakhuthele emsebenzini wokutshumayela. Umfowethu osakhulayo angenelisa ukuba yinceku ekhonzayo lanxa engakafikisi iminyaka engu-20. Kanti njalo umfowethu oyinceku ekhonzayo angabekwa ukuthi abe ngumdala kusukela eleminyaka engu-20 nje.

¹⁶ Ungenzani ukuze wenelise ukuba yinceku ekhonzayo kumbe ukuba ngumdala? Akulamthetho obekiweyo walokho okumele ukwenze. Kodwa okungakunceda ukuthi uphumelele yikuba lobuntu okukhulunywa ngabo eBhayibhilini, lokuthanda uJehova lemuli yakho kanye lebandla. (1 Thim. 3:​1-13; Tit. 1:​6-9; 1 Phet. 5:​2, 3) Zama ukuzwisisa ubuntu ngabunye okumele ube labo ubusuthandaza kuJehova ucela ukuthi akuncedise ube lobuntu lobo. c

17. Umfowethu osakhulayo angenzani ukuze alungele ukuba ngubaba womuzi? (Khangela lomfanekiso.)

¹⁷ Ukuba ngubaba womuzi. Njengoba uJesu watsho, amanye amadoda ayenza kuhle ekukhonzeni akhetha ukungatshadi. (Mat. 19:12) Kodwa nxa ungakhetha ukutshada uyabe usulomunye umsebenzi wokuba yinhloko yemuli.  (1 Khor. 11:3) UJehova ukhangelele ukuthi indoda imthande umkayo, imnakekele, ibe lendaba lendlela azizwa ngayo futhi imncedise ukuthi ahlale eseduze laye. (Efe. 5:​28, 29) Esihlokweni lesi sixoxe ngokusebenzisa kuhle ingqondo, lokuhlonipha abesifazana kanye lokuba ngumuntu othenjwayo. Izinto lezi lemisebenzi ongayifundela kuzakunceda ukuthi ube yindoda enhle. Uyabe usukulungele ukukhokhela kuhle imuli yakho lokuba yindoda elothando.

18. Umfowethu osakhulayo angakulungiselela njani ukuba ngumzali?

¹⁸ Ukuba ngumzali. Nxa usutshadile kungenzakala ukuthi ube labantwana. Kuyini ongakufunda kuJehova mayelana lokuba ngubaba omuhle? Kunengi ongakufunda kuye. (Efe. 6:4) UJehova watshela iNdodana yakhe uJesu phambi kwabantu ukuthi uyayithanda lokuthi uyayamukela. (Mat. 3:17) Nxa ungaba labantwana hlala ubaqinisekisa ukuthi uyabathanda. Hlala ubancoma ngokuhle abakwenzayo. Obaba abalingisela okwenziwa nguJehova banceda abantwababo ukuthi bathuthuke babe ngamadoda labesifazana abathanda uJehova. Ungalungiselela khathesi ukuba ngumzali ngokuba lendaba labangakini kanye lebandla langokutshengisa ukuthi uyabathanda. Batshele ukuthi uyabathanda lokuthi baligugu kuwe. (Joh. 15:9) Lokhu kuzakunceda ukuthi uwenze kuhle umsebenzi wakho wokuba ngumzali lokuba ngubaba womuzi. Okwakhathesi uJehova uzakusebenzisa futhi uzakuba luncedo emulini yangakini lasebandleni.

19-20. Kuyini okuzanceda abafowethu abasakhulayo ukuthi bathuthuke? (Khangela umfanekiso ongaphandle.)

¹⁹ Bafowethu abasakhulayo akusoze kuzenzakalele ukuthi lithuthuke, kumele lisebenze nzima. Kumele likhethe abantu abenza okuhle elingabalingisela, lisebenzise kuhle ingqondo, libe ngabantu abathenjwayo, lifundele imisebenzi engalinceda empilweni futhi lilungiselele imisebenzi elingaba layo esikhathini esizayo.

²⁰ Kwezinye izikhathi ungazizwa uphela amandla nxa ucabanga ngomsebenzi okumele uwenze. Lanxa kunjalo ungaphumelela. Khumbula ukuthi uJehova uzimisele ukukuncedisa. (Isaya. 41:​10, 13) Abafowethu labodadewethu labo bazakuncedisa. Nxa ungasebenza nzima ukuthi uthuthuke uzayikholisa impilo futhi uzasuthiseka. Siyalithanda lonke bafowethu abasakhulayo! Kwangathi uJehova angalibusisa kakhulu njengoba lisebenza nzima ukuthi lithuthuke.—Zaga. 22:4.