1. Kuyini okumele sikwenze ukuze sithuthuke?

 UMUNTU kalutho. Iyamangalisa indlela umntwana akhula ngayo aze abe ngumuntu omdala futhi lokhu kuyazenzakalela. Kodwa akuzenzakaleli ukuthi umKhristu abe lokholo oluqinileyo futhi abe lobuntu obuhle. b (1 Khor. 13:11; Heb. 6:1) Kuyabe kumele aqale abe ngumngane kaJehova futhi abeseduze kakhulu laye. Okunye okuqakathekileyo ngumoya ongcwele ngoba uzasinceda ukuthi sibe lobuntu obufunwa nguJehova, sifundele izinto ezizasinceda empilweni njalo silungiselele imisebenzi esingaba layo esikhathini esizayo.—Zaga. 1:5.

2. Kuyini esikufunda kuGenesisi 1:27 njalo sizaxoxa ngani esihlokweni lesi?

² UJehova wadala abantu kwaba labesilisa labesifazana. (Bala uGenesisi 1:27.) Kusegcekeni ukuthi abantu besilisa labesifazana babunjwa ngendlela etshiyeneyo. Kodwa batshiyene langezinye izindlela futhi. Ngokwesibonelo, uJehova wadala amadoda labesifazana ukuze benze imisebenzi etshiyeneyo. Ngakho badinga ubuntu lolwazi oluzabanceda ukuthi bayenze kuhle leyomisebenzi. (Gen. 2:18) Esihlokweni lesi sizaxoxa ngokuthi odadewethu abasakhulayo bangenzani ukuze bathuthuke futhi babe lobuntu obuhle. Esihlokweni esilandelayo sizabona ukuthi abazalwane abasakhulayo bona bangenzani.

3-4. Odadewethu abasakhulayo bangabathola ngaphi abesifazana abalobuntu obuhle abangabalingisela? (Khangela lomfanekiso.)

³ IBhayibhili likhuluma ngabesifazana abanengi ababethanda uJehova futhi bemkhonza bethembekile. (Khangela isihloko  esithi “Esikufunda Kwabesifazana Okukhulunywa Ngabo EBhayibhilini” ku-jw.org.) Abesifazana laba ‘babezibamba kukho konke abakwenzayo njalo babethembekile ezintweni zonke’ njengoba umbhalo wethu okhokhelayo usitsho. Kanti njalo odadewethu abasakhulayo bangafunda kwabanye odade abathanda uJehova abasemabandleni abo.

⁴ Bodadewethu abasakhulayo, cabangani ngokuthi yibaphi odade abayisibonelo esihle elingabalingisela. Nanzelelani ubuntu babo obuhle beselicabanga ngokuthi lingabalingisela njani. Endimeni ezilandelayo sizaxoxa ngobuntu abesifazana okumele babe labo ukuze bathuthuke.

5. Kungani kuqakathekile ukuthi abesifazana bazithobe?

⁵ Okunye okuqakatheke kakhulu okungasinceda sithuthuke yikuthobeka. Nxa owesifazana ethobekile uba lobudlelwano obuhle kakhulu loJehova kanye labanye. (Jak. 4:6) Ngokwesibonelo owesifazana othanda uJehova uyazithoba akhethe ukulalela inhloko yemuli kanye lalabo uJehova ababeke ukuthi bakhokhele ibandla.—1 Khor. 11:3. c

6. Kuyini odadewethu abasakhulayo abangakufunda kuRabheka?

⁶ Cabanga ngesibonelo sikaRabheka. Wayekhaliphile futhi esukumela phezulu ukuze enze okuqondileyo. (Gen. 24:58; 27:​5-17) Kanti njalo wayehlonipha futhi ezehlisa. (Gen. 24:​17, 18, 65) Nxa ungathobeka njengoRabheka njalo usekele labo uJehova ababeke ukuthi bakhokhele uzakuba yisibonelo esihle kubo bonke emulini yakho lasebandleni.

7. Odadewethu abasakhulayo bangamlingisela njani u-Esta?

⁷ Wonke amaKhristu afuna ukuthuthuka kumele athobeke. IBhayibhili lithi “ukuhlakanipha ngokwabazithobayo.” (Zaga. 11:2) U-Esta wayethembekile kuNkulunkulu futhi wayezithoba. Lokhu kwamnceda ukuthi angazikhukhumezi lalapho eseyindlovukazi. Walalela lokho uModekhayi amtshela khona  futhi wakwenza. (Esta. 2:​10, 20, 22) Lathi singalingisela u-Esta ngokucela ukuthi abanye basicebise besesisenza lokho abasitshela khona.—Tit. 2:​3-5.

8. Odadewethu bafundani ku-1 Thimothi 2:​9, 10 endabeni yokugqoka lokuzilungisa?

⁸ Kulokunye u-Esta akwenzayo okwatshengisa ukuthi wayethobekile. Lanxa “wayelitshatshazi futhi elomzimba omuhle” kazange adinge ukubukwa ngabantu. (Esta. 2:​7, 15) Bodadewethu lingamlingisela njani u-Esta? Enye indlela elingamlingisela ngayo ibhalwe ku-1 Thimothi 2:​9, 10. (Bala.) Umphostoli uPhawuli watshela abesifazana abangamaKhristu ukuthi bagqoke izigqoko ezilesithunzi, ezingadlulisi amalawulo futhi ezitshengisa ukuthi bazisebenzisa kuhle ingqondo zabo. Amabala esiGrikhi awasebenzisayo aveza ukuthi abesifazana abangamaKhristu kumele bagqoke ngendlela ehloniphekayo. Kumele itshengise lokuthi balendaba lokuthi abanye baphatheka njani lokuthi bathini ngendlela abagqoka ngayo. Siyaziqhenya ngani lonke bodadewethu eligqoka ngendlela elesithunzi.

9. Ufundani ku-Abhigeli?

⁹ Okunye okuqakathekileyo odadewethu abangamaKhristu okumele babe lakho ukuze bathuthuke yikuqedisisa. Kuyini ukuqedisisa? Yikwenelisa ukwehlukanisa phakathi kokulungileyo lokungalunganga ubusukhetha ukwenza okulungileyo. Cabanga ngesibonelo sika-Abhigeli. Umkakhe wenza isinqumo esibi esasingabulalisa bonke ababesemzini wakhe. U-Abhigeli wasukumela phezulu walungisa izinto. Ukuqedisisa kwakhe kwasindisa impilo zabanengi. (1 Sam. 25:​14-23, 32-35) Ukuqedisisa kuphinda kusincede sazi isikhathi sokukhuluma lesokuthula. Kuyasinceda lokuthi sibe lendaba labanye kodwa singabatshiyi bengahlalisekanga.—1 Thes. 4:11.

10-11. Ukufunda ukubhala lokubala kuzakunceda njani? (Khangela lomfanekiso.)

¹⁰ Owesifazana ongumKhristu kumele afunde ukwenza izinto kanye lemisebenzi ezamnceda empilweni. Ezinye izinto umntwana oyinkazana azifunda esasemncane zingamnceda okwempilo yakhe yonke. Nanzi ezinye izibonelo.

¹¹ Funda ukubhala lokubala. Kwezinye indawo bathi akuqakathekanga ukuthi abantu besifazana bafunde ukubhala lokubala. Kodwa kuqakathekile ukuthi wonke amaKhristu abekwazi ukubhala lokubala. d (1 Thim. 4:13) Lanxa kungaba nzima, ungavumeli lutho lukuyekelise ukufunda ukubhala lokubala. Kuzakunceda ngani? Ukufunda izinto lezi kungakunceda  ukuthi uthole umsebenzi. Kuzakunceda lokuthi wenelise ukubala iBhayibhili kanye lokulifundisa abanye. Okuhle kakhulu yikuthi ukubala iLizwi likaNkulunkulu lokucabangisisa ngalo kuzakunceda ukuthi usondele kakhulu kuye.—Josh. 1:8; 1 Thim. 4:15.

12. UZaga 31:26 ukunceda njani ukuthi wenelise ukukhuluma labanye?

¹² Funda ukukhuluma kuhle labanye. Kuqakathekile ukuthi amaKhristu enelise ukukhuluma kuhle labanye. Umfundi uJakhobe wasinika iseluleko esihle endabeni le. Wathi: “Wonke umuntu kumele aphangise ukulalela, aphuze ukukhuluma.” (Jak. 1:19) Ungalalelisisa nxa abanye bekhuluma uyabe utshengisa ukuthi ‘ulesisa’ sibili. (1 Phet. 3:8) Nxa ungazwisisi indlela omunye umuntu azizwa ngayo loba lokho akutshoyo, zama ukumbuza imibuzo ezakunceda ukuthi uzwisise kodwa ungajahi ukukhuluma, qala ucabange. (Zaga. 15:​28, amabala ngaphansi.) Zibuze: ‘Engifuna ukukukhuluma kuliqiniso futhi kuyakhuthaza yini? Kuyatshengisa ukuthi ngiyamhlonipha futhi ngiyamthanda yini?’ Funda kubodadewethu abakwazi ukukhuluma kuhle labanye ubusubalingisela. (Bala iZaga 31:26.) Nanzelela indlela okhuluma ngayo labanye. Nxa ungafunda ukukhuluma kuhle uzaba labangane futhi uhlalisane labanye ngokuthula.

13. Ungayifunda njani imisebenzi yangekhaya? (Khangela lomfanekiso.)

¹³ Funda ukwenza imisebenzi yangekhaya. Endaweni ezinengi abesifazana yibo abajayele ukwenza imisebenzi eminengi yangekhaya. Unyoko kumbe omunye udade oyazi kuhle imisebenzi yangekhaya angakufundisa ukuyenza. Omunye udadewethu okuthiwa nguCindy uthi: “Enye into eligugu umama angifundisa yona yikuthi ukusebenza nzima kwenza umuntu athokoze. Ukufunda izinto ezinjengokupheka, ukuklina, ukuthunga kanye lokusebenzisa kuhle imali kwenza ukuthi impilo yami ibe lula. Kwanginceda lokuthi ngithole ithuba lokwenza okunengi enkonzweni kaJehova. Umama wangifundisa lokuba lomusa ebantwini. Lokho kwanginceda ngazana labafowethu labodadewethu abanengi abenza kuhle engingabalingisela.” (Zaga. 31:​15, 21, 22) Owesifazana osebenza nzima, olomusa futhi okwazi ukwenza imisebenzi yangekhaya uyisibusiso emulini yakhe lasebandleni.—Zaga. 31:​13, 17, 27; Imiseb. 16:15.

14. Ufundani kuCrystal njalo kuyini okuqakathekileyo okumele ukwenze?

¹⁴ Funda ukuzimela. Kuqakathekile ukuthi wonke amaKhristu afuna ukuthuthuka afunde ukuzimela. (Flp. 4:11) Udadewethu okuthiwa nguCrystal uthi: “Abazali bami bangincedisa ukuthi ngikhethe izifundo engangizazenza esikolo. Izifundo lezi zazizangisiza ukuthi ngifundele imisebenzi ezanginceda empilweni. Ubaba wangikhuthaza ukuthi ngifundele umsebenzi wokuphatha imali zekhampani (i-accounts) njalo lokhu kwanginceda kakhulu.”  Ngakho lina abasakhulayo akumelanga lifundele imisebenzi kuphela, kodwa zamani lokufunda ukusebenzisa kuhle imali. (Zaga. 31:​16, 18) Nxa lingasuthiseka ngezinto ezilutshwana njalo libalekele ukuba lezikwelede, lizenelisa ukwenza okunengi enkonzweni kaJehova.—1 Thim. 6:8.

15-16. Odadewethu abangatshadanga bangabanceda njani abanye? (UMakho 10:​29, 30)

¹⁵ Nxa ungaba lobuntu obuthokozisa uJehova futhi ufunde lezinto ezingakunceda empilweni, kuzakuba lula ukwenza imisebenzi ongaba layo esikhathini esizayo. Asixoxeni ngokunye ongakwenza.

¹⁶ Ungakhetha ukuhlala ungatshadanga okwesikhathi esithile. Njengoba uJesu watsho, abanye abesifazana bakhetha ukuhlala bengatshadanga lanxa lokhu kusenza bakhangelelwe phansi endaweni yakibo. (Mat. 19:​10-12) Abanye bahlala bengatshadanga ngenxa yezizathu ezitshiyeneyo. Qiniseka ukuthi uJehova loJesu kababakhangeleli phansi odadewethu abangatshadanga. Emhlabeni wonke odadewethu abangatshadanga bayisibonelo esihle emabandleni abo. Odadewethu laba balothando njalo balendaba labanye. Lokhu kwenza babe ngomama labosisi babanengi ebandleni.—Bala uMakho 10:​29, 30; 1 Thim. 5:2.

17. Udadewethu osakhulayo angenzani khathesi ukuze alungiselele ukuba senkonzweni yesikhathi sonke?

¹⁷ Ungaba senkonzweni yesikhathi sonke. Abesifazana abangamaKhristu yibo abenza okunengi kakhulu emsebenzini wokutshumayela emhlabeni wonke. (Hubo. 68:11) Ungahlela yini izimo zakho ukuze lawe ungene enkonzweni yesikhathi sonke? Ungaba liphayona kumbe usebenze ekwakhiweni kwezakhiwo zenhlanganiso loba uyesebenza eBhetheli. Thandaza ngalokho ofuna ukukwenza. Xoxa labanye abenza lokho ofisa ukukwenza ubabuze ukuthi ungenzani ukuze ufanele ukwenza lowomsebenzi. Ngemva kwalokho yenza uhlelo oluzakunceda uphumelele ukwenza lokho okufisayo. Nxa ungaphumelela ukuba senkonzweni yesikhathi sonke uzenelisa ukwenzela uJehova okunengi njalo uzathokoza.

18. Kungani kumele udadewethu akhethe kuhle umuntu azatshada laye? (Khangela lomfanekiso.)

¹⁸ Ungakhetha ukutshada. Ubuntu kanye lemisebenzi ongayifundela esixoxe ngakho kuzakunceda ukuthi ube yinkosikazi enhle. Nxa ufisa ukutshada kumele ukhethe kuhle umuntu  ofuna ukutshada laye. Ukukhetha umuntu ozatshada laye yisinqumo esiqakatheke kakhulu empilweni. Khumbula ukuthi indoda ozatshada layo izakuba yinhloko yakho. (Rom. 7:2; Efe. 5:​23, 33) Zibuze, ‘Umuntu lo ulingisela uKhristu yini? Uyakuqakathekisa yini ukukhonza ukwedlula loba yini empilweni yakhe? Wenza izinqumo ezinhle yini? Uyavuma yini nxa ephambanisile? Uyabahlonipha yini abesifazana? Angenelisa yini ukungincedisa ukuthi ngihlale ngiqinile ekukhonzeni? Angenelisa yini ukungigcina? Ulozwelo yini? Uyenza kuhle yini imisebenzi ayiphiweyo? Yiphi imisebenzi yebandla alayo futhi uyenza njani?’ (Luk. 16:10; 1 Thim. 5:8) Nxa ufuna ukuthola indoda elobuntu obuhle lawe kumele usebenze nzima ukuze ube yinkosikazi enhle.

19. Kungani kungehlisi isithunzi ukuthi inkosikazi ‘ingumsizi’ womkayo?

¹⁹ IBhayibhili lithi inkosikazi enhle ‘ingumsizi’ womkayo. (Gen. 2:18) Lokho kutsho ukuthi umfazi kaqakathekanga yini? Hatshi. Umsebenzi owenziwa ngumfazi emulini uqakathekile sibili. Khumbula ukuthi leBhayibhili lithi uJehova “ungumsizi.” (Hubo. 54:4; Heb. 13:6) Inkosikazi iba ngumsizi omuhle nxa isekela umkayo. Ngokwesibonelo, nxa umkayo angenza izinqumo iyabambisana laye ukuze lokho afuna ukukwenza kuphumelele. Inkosikazi ethanda uJehova yenza konke okusemandleni ayo ukuthi ingenzi izinto ezingenza abanye bacine bengasamhloniphi umkayo. (Zaga. 31:​11, 12; 1 Thim. 3:11) Ungakulungiselela khathesi ukuba yinkosikazi enhle ngokuqhubeka umthanda kakhulu uJehova langokusiza abanye emulini lasebandleni.

20. Kuba njani emulini nxa umama esenza kuhle?

²⁰ Ungaba labantwana. Nxa ungatshada wena lomkakho lingaba labantwana. (Hubo. 127:3) Ngakho kuqakathekile ukuthi ucabangisise ngokuthi kuyini okudingekayo ukuze umuntu abe ngumzali omuhle. Ubuntu obuhle kanye lemisebenzi engakunceda esixoxe ngayo kungakunceda nxa usutshadile kumbe nxa usulabantwana. Uthando, lomusa lokubekezela kuzakwenza ukuthi lichelese, kwenze labantwabakho bakhule kuhle njalo bevikelekile.—Zaga. 24:3.

21. Sithini ngabodadewethu njalo kungani? (Khangela umfanekiso ongaphandle.)

²¹ Siyalithanda kakhulu bodadewethu ngenxa yakho konke elikwenzela uJehova labantu bakhe. (Heb. 6:10) Lisebenza nzima ukuze libe lobuntu obuthokozisa uJehova. Lifundela lemisebenzi ezalinceda empilweni iphinde incede labanye. Kanti njalo liyalungiselela ukwenza imisebenzi elingaba layo esikhathini esizayo. Liligugu kakhulu enhlanganisweni kaJehova!