Omunye udadewethu weNew Zealand wabukela ividiyo ethi “Kumele Linanzane.” Ividiyo le ikhuluma ngokuthi uJehova kaphonguba lozwelo nje kodwa utshengisa ngezenzo ukuthi uyabazwela abantu. (Isaya. 63:​7-9) Wacabanga ukuthi akwenze lokho ayekubone kuvidiyo ngokuthi ancedise abanye. Ngalelolanga wahamba wayathenga ezitolo. Wahlangana lomama owayengelandawo yokuhlala wasecela ukumthengela ukudla. Umama lo wavuma ukuthi amthengele. Udadewethu wathi esephenduke lokudla wamtshumayeza esebenzisa iphetshana elithi Ukuhlupheka Kuzaphela Yini?

Umama lo waqalisa ukukhala wasechasisela udadewethu ukuthi abazali bakhe babengoFakazi kodwa yena watshiya ukukhonza kudala. Wamtshela ukuthi ubeseqalisile ukukhuleka kuJehova ecela ukuthi amncede abuyele kuye. Udadewethu wanika umama lo iBhayibhili wahlela lokuthi baqalise ukufunda iBhayibhili ndawonye. a

Lathi singalingisela uJehova ngokuba lozwelo kwabanye, okugoqela izihlobo zethu labafowethu labodadewethu ebandleni. Enye indlela esingatshengisa ngayo ukuthi silozwelo yikudinga amathuba okutshumayeza abanye.