Ubuzibala yini izihloko ezisanda kuphuma ku-Nqabayokulinda? Nxa kunjalo, ungenelisa yini ukuphendula imibuzo elandelayo?

Kutshoni ‘ukutshintsha indlela esicabanga ngayo’? (Rom. 12:2)

Kutsho ukuthi akumelanga sisuthiseke ngokuthi sesilungisile impilo zethu nxa sesenze imisebenzi emihle emilutshwana nje. Kodwa kumele sihlole lokho esiyikho ngaphakathi, besesitshintsha lapho okumele sitshintshe khona ukwenzela ukuthi lokho esikwenzayo kuhambelane lalokho okufunwa nguJehova.—w23.01, ikhasi 8-9.

Kumele senzeni nxa sibona izinto ezenzakala emhlabeni?

Siyafuna sibili ukwazi ukuthi izinto ezenzakala emhlabeni zisigcwalisa njani isiphrofetho. Kulokuthi sikhulume izinto esingelaqiniso lazo ezingenza kube lokwehlukana, esikukhulumayo kumele kuvele kulokho okukhitshwa yinhlanganiso kaJehova. (1 Khor. 1:10)—w23.02, ikhasi 16.

Yiwuphi umehluko okhona phakathi kokubhabhathizwa kukaJesu lokwabalandeli bakhe?

Kwakungadingeki ukuthi uJesu azinikele kuJehova ngoba wayezalelwe esizweni esizinikele kuNkulunkulu. Kwakungadingeki lokuthi aphenduke ezonweni zakhe ngoba wayephelele engelasono.—w23.03, ikhasi 5.

Singenzani ukuze abanengi bathole ithuba lokuphendula emihlanganweni?

Esingakwenza yikugcina izimpendulo zethu zizimfitshane ukuze sinike abanye ithuba lokuphendula. Zama ukuthi ungakhulumi ngemicijo eminenginengi. Ungenza njalo, abanye abasoze baswele okokutsho.—w23.04, ikhasi 23.

“INdlela yobuNgcwele” okukhulunywa ngayo ku-Isaya 35:8 itshoni?

Kuqala umgwaqo lo omkhulu wawusitsho indlela amaJuda ahamba ngayo esuka eBhabhiloni ebuyela elizweni lawo. Khathesi ilungiswa njani? Kungakafiki u-1919, “iNdlela yobuNgcwele” yaqalisa ukulungiswa. Okunye okwakusenziwa yikuphrintwa lokuhunyutshwa kwamaBhayibhili. Abantu bakaNkulunkulu bebehamba ‘eNdleleni yobuNgcwele’ ebanceda ukuthi baqhubeke bemkhonza besebethola izibusiso zoMbuso.—w23.05, ikhasi 15-19.

Sifundani kuZaga isahluko 9 okhuluma ngabesifazana ababili?

UZaga ukhuluma ‘ngowesifazana oyisiwula’ futhi labo abanxusayo ubasa ‘engcwabeni.’ Uphinda akhulume ngowesifazana omela “ukuhlakanipha kweqiniso.” Abanxusayo ubasa “endleleni yokuzwisisa,” bathole impilo engapheliyo. (Zaga. 9:​1, 6, 13, 18)—w23.06, ikhasi 22-24.

Indlela uNkulunkulu aphatha ngayo uLothi itshengisa njani ukuthi uthobekile lokuthi uyazwisisa?

UJehova watshela uLothi ukuthi asuke eSodoma abalekele ezintabeni. ULothi wacela ukuthi yena lemuli yakhe baye eZowari, uJehova wamvumela.—w23.07, ikhasi 21.

Owesifazana angenzani nxa umkakhe ebukela iphonografi?

Akumelanga azisole ngalokho okuyabe kwenziwe ngumkakhe. Kumele azame ukucabangisisa ngendlela angaqinisa ngayo ubungane bakhe loJehova njalo acabangisise ngabanye abesifazana okukhulunywa ngabo eBhayibhilini ababekhathazekile futhi abaduduzwa yikuthandaza kuJehova. Angancedisa umkakhe abalekele izimo ezingenza acine elingeka ukuyibukela.— w23.08, ikhasi 14-17.

Nxa umuntu engasibuza umbuzo ngesikukholwayo, ukuzwisisa kungasinceda njani ukuthi sibe mnene?

Nxa umuntu angasibuza umbuzo kumbe asiphikise, ukuzwisisa kungasinceda sibone ukuthi uqakathekisani kumbe ukuthi ucabangani. Lokho kungasinceda ukuthi siphendule kuhle langobumnene.—w23.09, ikhasi 17.

Sifundani kuMariya ngokudinga amandla?

UMariya wathi esetshelwe ukuthi uzakuba ngunina kaMesiya wadinga uncedo kwabanye ukuze athole amandla okwenza umsebenzi lo omkhulu. UGabriyeli lo-Elizabethi bakhuthaza uMariya besebenzisa iMibhalo. Lathi singaqiniswa ngabafowethu labodadewethu esikhonza labo.—w23.10, ikhasi 15.

UJehova angayiphendula njani imithandazo yethu?

Uthembisa ukuthi uzayiphendula imithandazo yethu njalo uyakhangela ukuthi ihambelana njani lenhloso yakhe. (Jer. 29:12) Abantu bangacela into eyodwa kodwa uJehova aphendule ngendlela ezitshiyeneyo. Lanxa kunjalo, uzahlala esincedisa.—w23.11, ikhasi 21-22.

URoma 5:2 ukhuluma “ngethemba.” Manje kungani uPhawuli waphinda wakhuluma ngalo kuvesi 4?

Nxa umuntu angezwa izindaba ezinhle angaba lethemba lokuphila emhlabeni olipharadayisi. Nxa angahlangana lobunzima aqhubeke ebekezela, uyakubona ukuthi uNkulunkulu uyamamukela futhi ithemba lakhe liyaqina kakhulu, ligxile enhliziyweni yakhe.—w23.12, ikhasi 12-13.