1. Kuyini okumele sonke sikwenze?

KUMELE ukuthi awungeke ufune ukugijima emncintiswaneni okwaziyo ukuthi unzima, ikakhulu nxa ugula kumbe udiniwe. Kodwa umphostoli uPhawuli wathi wonke amaKhristu eqiniso asemncintiswaneni. (Heb. 12:1) Kungelani lokuthi singanani kumbe ukuthi siyagula loba hatshi, sonke kumele siqinisele size siyetshaya intambo nxa sifuna ukuthola umvuzo uJehova asithembisa wona.—Mat. 24:13.

2. Ngokwalokho okutshiwo ku-2 Thimothi 4:7, 8, kungani uPhawuli wayekhululekile ukukhuluma ngokugijima emncintiswaneni?

² UPhawuli wayekhululekile ukukhuluma ngokugijima emncintiswaneni ngoba yena ‘wayegijime waze wayafika ekucineni.’ (Bala u-2 Thimothi 4:7, 8.) Kodwa yiwuphi umncintiswano ayekhuluma ngawo?

3. Yiwuphi umncintiswano uPhawuli ayekhuluma ngawo?

³ Kwezinye izikhathi uPhawuli wayekhuluma ngokunye okwakusenziwa emidlalweni yeGrisi ukuze acacise izifundo eziqakathekileyo. (1 Khor. 9:25-27; 2 Tim. 2:5) Izikhathi ezinengi wayefananisa umncintiswano wokuphila lowokugijima. (1 Khor. 9:24; Gal. 2:2; Flp. 2:16) Umuntu ungena emncintiswaneni wokuphila ngesikhathi ezinikela kuJehova futhi ebhabhathizwa. (1 Phet. 3:21) Intambo uyitshaya nxa uJehova esemnika umvuzo wokuphila okungapheliyo.—Mat. 25:31-34, 46; 2 Tim. 4:8.

4. Sizaxoxa ngani esihlokweni lesi?

⁴ Ukugijima emncintiswaneni omude kuhambelana lempilo yomKhristu ngendlela ezinengi. Sizaxoxa ngezintathu zakhona. Eyokuqala, kumele sigijime endleleni eyiyo; eyesibili, kumele sihlale sicabanga ngomvuzo; eyesithathu, kumele  siqhubeke sigijima lanxa sisehlelwa zinhlupho.

5. Yiphi indlela okumele sigijime kuyo futhi kungani?

⁵ Nxa abantu abasemncintiswaneni befuna ukuthola umvuzo kumele bagijime endleleni ekhethwe ngabahlele umncintiswano. Lathi kumele sigijime endleleni amaKhristu akhangelelwe ukuthi agijime kuyo nxa sifuna ukuthola umvuzo wokuphila okungapheliyo. (ImiSeb. 20:24; 1 Phet. 2:21) Kodwa uSathane lalabo abamlingiselayo bafuna ‘siqhubeke sigijima labo.’ (1 Phet. 4:4) Bayayichothoza indlela esiphila ngayo futhi bathi eyabo ingcono njalo ibanika inkululeko. Kodwa abakutshoyo kungamanga.—2 Phet. 2:19.

6. Ufundani kuBrian?

⁶ Bonke abagijima lalabo abonakaliswe ngumhlaba kaSathane bacina benanzelela ukuthi indlela abayikhethileyo ayibaniki inkululeko kodwa ibenza babe yizigqili. (Rom. 6:16) Asixoxeni ngalokho okwenzakala kuBrian. Abazali bakhe bamkhuthaza ukuthi agijime endleleni amaKhristu okumele agijime kuyo. Kodwa esekhulakhulile waqalisa ukuthandabuza ukuthi indlela le izamenza athokoze. Wakhetha ukugijima lalabo abenza okufunwa nguSathane. Uthi: “Ngangingakwazi ukuthi lokho engangicabanga ukuthi yinkululeko kuzacina kungenza ngibe yisigqili sezinto eziyingozi. Ngokuhamba kwesikhathi ngaqalisa ukusebenzisa kubi izidakamizwa lokunatha kakhulu njalo ngasengiziphatha kubi kwezemacansini. Okweminyaka eminengi eyalandelayo ngasengisebenzisa izidakamizwa ezaziyingozi kakhulu njalo ngacina sengiyisigqili sezinengi zazo. . . . Ngaqalisa ukuthengisa izidakamizwa ukuze ngithole imali yokuthi ngiphile ngendlela le.” Kodwa uBrian wacina ekhetha ukulalela imithetho kaJehova. Watshiya indlela ayegijima kuyo wasebhabhathizwa ngo-2001. Khathesi uyathokoza sibili ngoba ugijima endleleni eyiyo. *

7. UMathewu 7:13, 14 ukhuluma ngaziphi indlela ezimbili?

⁷ Kuqakathekile sibili ukuthi sikhethe indlela eqondileyo esizagijima kuyo. USathane ufuna sonke sisuke endleleni encinyane ‘eyisa ekuphileni’ siye endleleni ebanzi ehanjwa ngabantu abanengi bomhlaba lo. Abanengi bagijima kuyo futhi kulula ukuhamba kuyo. Kodwa ‘iyisa ekubhujisweni.’ (Bala uMathewu 7:13, 14.) Kumele sithembe uJehova njalo simlalele ukuze sihlale sisendleleni eyiyo futhi singaphambukiswa.

8. Umuntu ogijimayo wenzani angakhubeka?

⁸ Abantu abagijima emncintiswaneni omude bagijima benanzelela okuphambili ukuze bangakhubeki. Lanxa kunjalo kungenzeka bagwenxwe ngomunye ngephutha kumbe banyathele egodini. Nxa bangawa bayavuka baqhubeke begijima. Abazihluphi kangako ngalokho okubenze bakhubeka kodwa baqakathekisa ukutshaya intambo lomvuzo abakhangelele ukuwuthola.

9. Kuyini okumele sikwenze nxa singakhubeka?

⁹ Emncintiswaneni esikuwo singakhubeka kanengi ngalokho esikutshoyo loba esikwenzayo. Kwesinye isikhathi esigijima labo bangasiphambanisela besesisizwa ubuhlungu. Lokhu akumelanga kusimangalise. Sonke silesono futhi sigijima ndawonye endleleni encinyane eyisa ekuphileni. Yikho kwesinye isikhathi sizakhubana. UPhawuli watsho ukuthi ngezinye izikhathi sizaba ‘lesizatho sokusolana.’ (Kol. 3:13) Kodwa kulokuthi sizihluphe ngalokho okusikhubileyo kasihlaleni sicabanga ngomvuzo ophambili. Singakhubeka kasivukeni siqhubeke sigijima. Nxa singazonda sibe silokhu sibhazalele, kasisoze siyitshaye intambo futhi sithole umvuzo. Kanti njalo singavala indlela yabanye abazama ukugijima endleleni encinyane eyisa ekuphileni.

10. Kuyini esingakwenza ukuze ‘singakhubi’ abanye?

¹⁰ Okunye esingakwenza ukuze ‘singakhubi’ abanye yikuvuma ukuthi izinto zenziwe ngendlela yabo nxa kuvuma kulokufuna ukuthi zihlale zisenziwa ngendlela yethu. (Rom. 14:13, 19-21; 1 Khor. 8:9, 13) Lokhu ngokunye okwenza singafanani labantu abasemncintiswaneni wokugijima. Bona bayancintisana futhi umuntu ngamunye ulwisa ukuthi kube nguye othola umvuzo. Baqakathekisa kakhulu okufunwa yibo, yikho bangazama ukufuqela abanye eceleni ukuze bona baye phambili. Kodwa thina kasincintisani. (Gal. 5:26; 6:4) Sifuna ukunceda abantu abanengi ukuthi labo batshaye intambo futhi bathole umvuzo wokuphila. Ngakho siyazama ukulalela iseluleko sikaPhawuli esiphefumulelweyo esithi: “Lingaqakathekisi lokho okufunwa yini kuphela kodwa liqakathekise lalokho okufunwa ngabanye.”—Flp. 2:4.

11. Umuntu osemncintiswaneni wokugijima uhlala ecabangani futhi kungani?

 ¹¹ Abantu abagijimayo abananzeleli kuphela lokho okuphambi kwabo kodwa bahlala becabanga ngokutshaya intambo. Lanxa bengabe bengayiboni, engqondweni bazibona beyitshaya futhi bethola umvuzo. Ukuhlala becabanga ngomvuzo abazawuthola kubanika amandla okuqhubeka begijima.

12. UJehova usithembiseni?

¹² Emncintiswaneni esikuwo uJehova usithembise umvuzo esingathandabuziyo ukuthi uzawunika labo abazagijima baze bayefika ekucineni. Umvuzo lo yikuphila kuze kube nini lanini ezulwini loba emhlabeni olipharadayisi. IMibhalo iyawuchasisa umvuzo lo ukuze sicabange ngokuthi impilo iyabe isimnandi njani ngalesosikhathi. Nxa singahlala sicabanga ngalokho esikuthenjiswa nguJehova esikhathini esizayo, sizazimisela kakhulu ukuqinisela size sitshaye intambo.

13. Sitshiyene njani labantu abasemncintiswaneni wokugijima?

¹³ Ababegijima emncintiswaneni yamaGrikhi babeqinisela lanxa babedinwa futhi besizwa ubuhlungu. Babencedwa yikuqeqetshwa ababekuthola lamandla abo nje kuphela. Lathi siyaqeqetshwa ukuze siwugijime umncintiswano wokuphila. Kodwa thina singcono kulabantu laba ngoba singathola amandla kuJehova njalo yena kaphelelwa ngamandla okusinceda kuloba yisiphi isimo esikuso. Nxa singamthemba uzasiqeqetsha aphinde asinike amandla.—1 Phet. 5:10.

14. U-2 Khorinte 12:9, 10 usinceda njani ukuthi silwisane lenhlupho?

¹⁴ UPhawuli wehlelwa zinhlupho ezinengi. Wayethethiswa, ehlukuluzwa njalo kwezinye izikhathi wayephela amandla futhi ekhathazwa yilokho akubiza ngokuthi ‘ngameva enyameni.’ (2 Khor. 12:7) Kulokuthi akhalale ukukhonza uJehova wabona inhlupho lezo njengethuba lokumthemba. (Bala u-2 Khorinte 12:9, 10.) Lokhu kwenza uJehova wamnika amandla okuqinisela kuloba yiluphi uhlupho olwalumehlela.

15. Kuzakwenzakalani nxa singalingisela uPhawuli?

¹⁵ Lathi singathethiswa loba sihlukuluzwe ngenxa yalokho esikukholwayo. Kanti njalo singathwaliswa nzima yikugula kumbe yikuphela amandla. Kodwa nxa singalingisela uPhawuli, sizabona ukuthi uJehova uyasithanda lokuthi uyasisekela nxa sisebunzimeni.

16. Kuyini ongakwenza lanxa ungaphilanga kuhle emzimbeni?

¹⁶ Utshona ulele embhedeni ngenxa yokugula loba uhamba nge-wheelchair yini? Amadolo kawasavumi yini kumbe amehlo asefiphele? Nxa ukhathazwa yizinto lezi, ungenelisa yini ukugijima lalabo abasesebatsha futhi abalempilakahle? Ye ungenelisa! Banengi abafowethu labodadewethu asebekhulile labagulayo abagijima endleleni eya ekuphileni. Abangeke bakwenze lokhu ngamandla abo. Kodwa imihlangano yebandla erekhodiweyo iyabanceda bathole amandla avela kuJehova. Kanti njalo batshumayeza odokotela, labonesi kanye lezihlobo.

17. UJehova ubabona njani labo abangaphilanga kuhle emzimbeni?

¹⁷ Nxa ungenelisi ukwenza konke ofisa ukukwenzela uJehova, ungadani uzitshela ukuthi awusoze wenelise ukugijima endleleni eya ekuphileni. UJehova uyakuthanda ngenxa yakho konke omenzele khona  lokuthi ulokholo kuye. Khathesi yikho oludinga khona kakhulu uncedo lwakhe futhi kasoze akutshiye. (Hubo. 9:10) Uzasondela kakhulu kuwe. Nanku okwatshiwo ngomunye udade ongaphilanga kuhle emzimbeni: “Sekusiba nzima ukuthi ngitshumayele njengoba imikhuhlane yami ilokhu isanda. Kodwa kuyangithokozisa ukwazi ukuthi uJehova uyathokoza ngalokho engikwenzayo lanxa kukuncane.” Nxa udanile ungakhohlwa ukuthi uJehova ulawe. Khumbula okwenziwa nguPhawuli kanye lamazwi akhe akhuthazayo athi: “Kuyangijabulisa ukuba buthakathaka, . . . ngoba nxa ngibuthakathaka kulapho engilamandla khona.”—2 Khor. 12:10.

18. Yibuphi ubunzima abanye abalwisana labo?

¹⁸ Abanye abagijima endleleni eya ekuphileni baphakathi kobunye ubunzima. Bahlutshwa ngokunye abantu abangakuboniyo futhi okungenzeka abakuzwisisi. Ngokwesibonelo, balwisana lokuhlulukelwa kumbe ukukhathazeka kakhulu. Kungani uhlupho lwabafowethu labodadewethu laba abathandwa nguJehova lunzima kakhulu? Nxa umuntu ephuke ingalo kumbe ehamba nge-wheelchair, bonke abantu bayakubona lokhu futhi bangafuna ukumnceda. Kodwa umuntu ohlulukelweyo kumbe okhathazeke kakhulu angakhanya engelanhlupho. Lanxa ubuhlungu abuzwayo bufanana lobalowo owephuke ingalo loba unyawo, abantu bangehluleka ukumtshengisa uthando aludingayo lokumzwela njengoba bayabe bengaboni ukuthi kukhona okumkhathazayo.

19. Sifundani kulokho okwenziwa nguMefibhoshethi?

¹⁹ Okwenziwa nguMefibhoshethi kungakunceda nxa ulenhlupho ezenza kube nzima ukuthi wenze konke ofisa ukukwenzela uJehova futhi ubona angani abantu abaluzwisisi uhlupho lwakho. (2 Sam. 4:4) Wayegogekile njalo iNkosi uDavida yake yamcabangela okungayisikho futhi yamphatha kubi. UMefibhoshethi kazidalelanga inhlupho lezi. Lanxa kunjalo kazange azonde, watshengisa ukuthi uyabonga ngakho konke okuhle ayekwenzelwe. Wayebonga umusa ayewutshengiswe nguDavida. (2 Sam. 9:6-10) Yikho ngesikhathi ephathwa kubi nguDavida wazama ukuzwisisa indaba yonke. Kazange azondiswe liphutha likaDavida. Kanti njalo kazange asole uJehova ngenxa yalokho okwenziwa nguDavida. UMefibhoshethi wenza konke ayesenelisa ukukwenza ukuze asekele inkosi eyayikhethwe nguJehova. (2 Sam. 16:1-4; 19:24-30) UJehova wenza ukuthi indaba kaMefibhoshethi ibhalwe eBhayibhilini ukuze isincede.—Rom. 15:4.

20. Ukukhathazeka kakhulu kungabangela ukuthi abanye benzeni kodwa bangaqiniseka ngani?

 ²⁰ Abanye abafowethu labodadewethu abahlutshwa yikukhathazeka kakhulu abakhululeki nxa bephakathi kwabantu. Kungabe kubathwalisa nzima ukuba lapho okulabantu abanengi khona kodwa abayekeli ukuya emihlanganweni yebandla, eyeziqinti leyezabelo. Bayatshumayela lanxa kubathwalisa nzima ukukhuluma labantu abangabaziyo. Nxa lawe unjalo, awuwedwa. Banengi abantu abalohlupho olunjengolwakho. Ungakhohlwa ukuthi uJehova uyathokoza ngalokho omenzela khona ngenhliziyo yonke. Ukungakhalali kwakho kuyibufakazi bokuthi uyakubusisa futhi ukunika amandla owadingayo. * (Flp. 4:6, 7; 1 Phet. 5:7) Nxa ukhonza uJehova ngapha ugula kumbe ukhathazeka kakhulu loba uhlulukelwa, qiniseka ukuthi lokho okwenzayo kuyamthokozisa.

21. UJehova uzasincedisa ukuthi senelise ukwenzani?

²¹ Sesifundile ukuthi kulomehluko phakathi komncintiswano wokugijima lalowo uPhawuli akhuluma ngawo. Emncintiswaneni wokugijima owawusenziwa ngezikhathi zeBhayibhili umvuzo wawutholwa ngumuntu oyedwa. Kodwa emncintiswaneni wamaKhristu, wonke umuntu oqinisela kuze kube sekucineni uzathola umvuzo wokuphila okungapheliyo. (Joh. 3:16) Kanti njalo emncintiswaneni wokugijima umuntu ogijimayo kwakumele abe lempilakahle ngoba nxa wayengaphilanga kuhle emzimbeni kwakungabanzima ukuthi anqobe. Kodwa emncintiswaneni wokuphila abanengi bethu siyaqinisela lanxa singaphilanga kuhle emzimbeni. (2 Khor. 4:16) UJehova uzasincedisa sonke ukuthi sigijime size sifike ekucineni.